Karan Johar IIFA 2027: ਇੱਕ ਵਾਰ ਫਿਰ ਹੋਸਟ ਦੀ ਭੂਮਿਕਾ ਵਿੱਚ ਨਜ਼ਰ ਆਉਣਗੇ ਕਰਨ ਜੌਹਰ, ਬੋਲੇ- ਲਾਈਵ ਨਾਈਟ ਦਾ ਰੋਮਾਂਚ ਵੱਖਰਾ ਹੈ

13 hours ਪਹਿਲਾ

IIFA 2027: ਬਾਲੀਵੁੱਡ ਦੇ ਮਸ਼ਹੂਰ ਫਿਲਮਮੇਕਰ ਕਰਨ ਜੌਹਰ ਇੱਕ ਵਾਰ ਫਿਰ ਆਈਫਾ ਦੇ ਮੰਚ ‘ਤੇ ਹੋਸਟ ਦੀ ਭੂਮਿਕਾ ਵਿੱਚ ਨਜ਼ਰ ਆਉਣਗੇ। ਇਸ ਵਾਰ ਉਹ ਅਦਾਕਾਰ ਵਰੁਣ ਧਵਨ ਨਾਲ ਮਿਲ ਕੇ ਐਵਾਰਡ ਨਾਈਟ ਨੂੰ ਹੋਸਟ ਕਰਨਗੇ। ਆਈਫਾ ਨਾਲ ਕਰਨ ਦਾ ਲੰਬੇ ਸਮੇਂ ਤੋਂ ਜੁੜਾਅ ਰਿਹਾ ਹੈ ਅਤੇ ਛੇਵੀਂ ਵਾਰ ਇਸ ਮਸ਼ਹੂਰ ਸਮਾਰੋਹ ਦੀ ਮੇਜ਼ਬਾਨੀ ਕਰਨ ਨੂੰ ਲੈ ਕੇ ਉਹ ਕਾਫੀ ਉਤਸ਼ਾਹਿਤ ਹਨ।

ਆਈਫਾ ਦਾ 27ਵਾਂ ਐਡੀਸ਼ਨ ਅਗਲੇ ਸਾਲ 22 ਅਤੇ 23 ਜਨਵਰੀ ਨੂੰ ਅਬੂ ਧਾਬੀ ਦੇ ਯਾਸ ਆਈਲੈਂਡ ਸਥਿਤ ਏਤਿਹਾਦ ਅਰੀਨਾ ਵਿੱਚ ਆਯੋਜਿਤ ਕੀਤਾ ਜਾਵੇਗਾ। ਆਈਫਾ ਵੀਕੈਂਡ ਐਂਡ ਐਵਾਰਡਜ਼ ਵਿੱਚ ਬਾਲੀਵੁੱਡ ਦੇ ਕਈ ਵੱਡੇ ਸਿਤਾਰਿਆਂ ਦੇ ਸ਼ਾਮਲ ਹੋਣ ਦੀ ਉਮੀਦ ਹੈ। ਪ੍ਰੋਗਰਾਮ ਵਿੱਚ ਹੋਸਟਿੰਗ, ਮਿਊਜ਼ਿਕ ਅਤੇ ਸ਼ਾਨਦਾਰ ਸਟੇਜ ਪਰਫਾਰਮੈਂਸ ਦੇ ਨਾਲ ਦਰਸ਼ਕਾਂ ਨੂੰ ਮਨੋਰੰਜਨ ਨਾਲ ਭਰਪੂਰ ਸ਼ਾਮ ਦੇਖਣ ਨੂੰ ਮਿਲੇਗੀ।

ਆਈਫਾ 2027 ਵਿੱਚ ਆਪਣੀ ਵਾਪਸੀ ਨੂੰ ਲੈ ਕੇ ਕਰਨ ਜੌਹਰ ਨੇ ਕਿਹਾ ਕਿ ਇਸ ਐਵਾਰਡ ਸਮਾਰੋਹ ਨਾਲ ਉਨ੍ਹਾਂ ਦਾ ਰਿਸ਼ਤਾ ਕਾਫੀ ਪੁਰਾਣਾ ਹੈ ਅਤੇ ਇਸ ਮੰਚ ਤੋਂ ਉਨ੍ਹਾਂ ਨੂੰ ਕਈ ਯਾਦਗਾਰ ਪਲ ਮਿਲੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਛੇ ਵਾਰ ਹੋਸਟ ਕਰਨਾ ਭਾਵੇਂ ਵੱਡੀ ਗਿਣਤੀ ਲੱਗਦੀ ਹੈ, ਪਰ ਲਾਈਵ ਸ਼ੋਅ ਦਾ ਉਤਸ਼ਾਹ, ਦਰਸ਼ਕਾਂ ਦੀ ਊਰਜਾ ਅਤੇ ਅਚਾਨਕ ਸਾਹਮਣੇ ਆਉਣ ਵਾਲੇ ਸਰਪ੍ਰਾਈਜ਼ ਅੱਜ ਵੀ ਉਨ੍ਹਾਂ ਨੂੰ ਰੋਮਾਂਚਿਤ ਕਰਦੇ ਹਨ।

ਕਰਨ ਜੌਹਰ ਨੇ ਅੱਗੇ ਕਿਹਾ ਕਿ ਆਈਫਾ ਦਾ ਮਾਹੌਲ ਆਪਣੇ ਆਪ ਵਿੱਚ ਵੱਖਰਾ ਹੈ, ਜਿੱਥੇ ਮਨੋਰੰਜਨ ਅਤੇ ਉਤਸ਼ਾਹ ਦੇ ਨਾਲ ਇੱਕ ਖਾਸ ਤਰ੍ਹਾਂ ਦਾ ਜਾਦੂ ਦੇਖਣ ਨੂੰ ਮਿਲਦਾ ਹੈ। ਅਬੂ ਧਾਬੀ ਵਾਪਸ ਆਉਣਾ ਉਨ੍ਹਾਂ ਲਈ ਇਸ ਤਜਰਬੇ ਨੂੰ ਹੋਰ ਖਾਸ ਬਣਾ ਰਿਹਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਉਹ ਆਈਫਾ 2027 ਵਿੱਚ ਹਾਸੇ-ਮਜ਼ਾਕ, ਸਰਪ੍ਰਾਈਜ਼ ਅਤੇ ਕਈ ਖਾਸ ਪਲਾਂ ਲਈ ਪੂਰੀ ਤਰ੍ਹਾਂ ਤਿਆਰ ਹਨ।

ਇਸ ਵਾਰ ਆਈਫਾ ਦੇ ਵੱਖ-ਵੱਖ ਪ੍ਰੋਗਰਾਮਾਂ ਦੀ ਮੇਜ਼ਬਾਨੀ ਲਈ ਦੋ ਜੋੜੀਆਂ ਨਜ਼ਰ ਆਉਣਗੀਆਂ। ਆਈਫਾ ਡਿਜੀਟਲ ਐਵਾਰਡਜ਼ 2027 ਦੀ ਜ਼ਿੰਮੇਵਾਰੀ ਪੰਕਜ ਤ੍ਰਿਪਾਠੀ ਅਤੇ ਅਲੀ ਫਜ਼ਲ ਸੰਭਾਲਣਗੇ, ਜਦਕਿ ਮੁੱਖ ਆਈਫਾ ਐਵਾਰਡਜ਼ 2027 ਨੂੰ ਕਰਨ ਜੌਹਰ ਅਤੇ ਵਰੁਣ ਧਵਨ ਹੋਸਟ ਕਰਨਗੇ। ਦੋਵਾਂ ਦੀ ਜੋੜੀ ਮੰਚ ‘ਤੇ ਆਪਣੀ ਖਾਸ ਕੈਮਿਸਟਰੀ ਅਤੇ ਮਨੋਰੰਜਕ ਅੰਦਾਜ਼ ਨਾਲ ਦਰਸ਼ਕਾਂ ਦਾ ਮਨੋਰੰਜਨ ਕਰਦੀ ਦਿਖਾਈ ਦੇਵੇਗੀ।

ਆਈਫਾ 2027 ਵਿੱਚ ਹੋਸਟਿੰਗ ਦੇ ਨਾਲ ਕਈ ਵੱਡੇ ਸਿਤਾਰਿਆਂ ਦੀ ਸ਼ਾਨਦਾਰ ਪਰਫਾਰਮੈਂਸ ਵੀ ਖਿੱਚ ਦਾ ਕੇਂਦਰ ਰਹੇਗੀ। ਸਲਮਾਨ ਖਾਨ, ਸ਼ਾਹਿਦ ਕਪੂਰ, ਕਰੀਨਾ ਕਪੂਰ ਖਾਨ ਅਤੇ ਜਾਨ੍ਹਵੀ ਕਪੂਰ ਵਰਗੇ ਕਲਾਕਾਰ ਮੰਚ ‘ਤੇ ਪਰਫਾਰਮ ਕਰਦੇ ਨਜ਼ਰ ਆਉਣਗੇ। ਸਲਮਾਨ ਖਾਨ ਵੀ ਆਈਫਾ ਦੇ ਮੰਚ ‘ਤੇ ਵਾਪਸੀ ਕਰ ਰਹੇ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਆਈਫਾ ਨਾਲ ਉਨ੍ਹਾਂ ਦਾ ਜੁੜਾਅ ਸ਼ੁਰੂਆਤੀ ਸਾਲਾਂ ਤੋਂ ਰਿਹਾ ਹੈ ਅਤੇ ਜਦੋਂ ਵੀ ਇਸ ਸਮਾਰੋਹ ਵੱਲੋਂ ਉਨ੍ਹਾਂ ਨੂੰ ਸੱਦਾ ਮਿਲਦਾ ਹੈ, ਤਾਂ ਉਨ੍ਹਾਂ ਲਈ ਇਹ ਹਮੇਸ਼ਾ ਖਾਸ ਤਜਰਬਾ ਹੁੰਦਾ ਹੈ।