FSSAI Action: ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ (FSSAI) ਨੇ ਸਿਹਤ ਨਾਲ ਜੁੜੇ ਉਤਪਾਦ ਬਣਾਉਣ ਵਾਲੀਆਂ ਕਈ ਕੰਪਨੀਆਂ ਖ਼ਿਲਾਫ਼ ਸਖ਼ਤ ਕਦਮ ਚੁੱਕੇ ਹਨ। ਜਾਂਚ ਦੌਰਾਨ ਖੁਰਾਕ ਸੁਰੱਖਿਆ ਨਿਯਮਾਂ ਅਤੇ ਨਿਰਧਾਰਤ ਮਾਪਦੰਡਾਂ ਦੀ ਉਲੰਘਣਾ ਸਾਹਮਣੇ ਆਉਣ ਤੋਂ ਬਾਅਦ ਅਥਾਰਟੀ ਨੇ ਕੁਝ ਕੰਪਨੀਆਂ ਦੇ ਲਾਇਸੈਂਸ ਮੁਅੱਤਲ ਕਰਨ ਸਮੇਤ ਵੱਖ-ਵੱਖ ਰੈਗੂਲੇਟਰੀ ਕਾਰਵਾਈਆਂ ਕੀਤੀਆਂ ਹਨ।
ਅਥਾਰਟੀ ਮੁਤਾਬਕ ਪਿਛਲੇ ਕੁਝ ਮਹੀਨਿਆਂ ਤੋਂ ਨਿਊਟ੍ਰਾਸਿਊਟੀਕਲ ਉਦਯੋਗ ‘ਤੇ ਨਿਗਰਾਨੀ ਵਧਾਈ ਗਈ ਸੀ। ਇਸ ਤਹਿਤ ਵੱਖ-ਵੱਖ ਉਤਪਾਦਨ ਇਕਾਈਆਂ ਦੀ ਜਾਂਚ ਕੀਤੀ ਗਈ, ਜਿਸ ਦੌਰਾਨ ਨਿਰਮਾਣ ਪ੍ਰਕਿਰਿਆ, ਉਤਪਾਦਾਂ ਦੇ ਲੇਬਲ, ਸਫ਼ਾਈ ਅਤੇ ਗੁਣਵੱਤਾ ਨਿਯਮਾਂ ਦੀ ਪਾਲਣਾ ਵਿੱਚ ਕਈ ਖਾਮੀਆਂ ਮਿਲੀਆਂ। ਕਾਰਵਾਈ ਦੇ ਘੇਰੇ ਵਿੱਚ ਆਈਆਂ ਛੇ ਕੰਪਨੀਆਂ ਵਿੱਚ ਐਰੇਨ ਹਰਬਲਜ਼, ਐਕਵਾਬਲਿਸ ਲਾਈਫਸਾਇੰਸਿਜ਼, ਰਾਸਕੈਮ ਹੈਲਥਕੇਅਰ, ਸੁਪਰਕਿਓਰ ਬਾਇਓਟੈਕ, ਐਂਬੀਕੋ ਆਯੁਰਵੈਦਿਕ ਹੈਲਥਕੇਅਰ ਅਤੇ ਵੇਦਾਂਤ ਰੈਮੇਡੀਜ਼ ਸ਼ਾਮਲ ਹਨ।
ਜਾਂਚ ਵਿੱਚ ਐਰੇਨ ਹਰਬਲਜ਼ ਦੇ ‘ਲਾਈਕੋਵੇ ਸਿਰਪ’ ਵਿੱਚ ਥਾਇਮਿਨ, ਵਿਟਾਮਿਨ ਈ ਐਸੀਟੇਟ, ਤਾਂਬਾ, ਸੇਲੇਨੀਅਮ ਅਤੇ ਜ਼ਿੰਕ ਦੀ ਮਾਤਰਾ ਨਿਰਧਾਰਤ ਰੋਜ਼ਾਨਾ ਖੁਰਾਕ ਦੀ ਸਿਫ਼ਾਰਸ਼ੀ ਹੱਦ ਤੋਂ ਵੱਧ ਪਾਈ ਗਈ। ਇਸ ਤੋਂ ਇਲਾਵਾ ਕੰਪਨੀ ਦੇ ‘ਮੈਕਸਫੋਰਡ ਪੇਨ ਰਿਲੀਫ’ ਉਤਪਾਦ ਲਈ ਗੋਡਿਆਂ ਦੇ ਦਰਦ ਤੋਂ ਰਾਹਤ ਵਰਗੇ ਅਜਿਹੇ ਦਾਅਵੇ ਕੀਤੇ ਗਏ ਸਨ, ਜਿਨ੍ਹਾਂ ਨੂੰ ਮਨਜ਼ੂਰੀ ਨਹੀਂ ਸੀ। ਉਤਪਾਦ ਦੀ ਮਸ਼ਹੂਰੀ ਵਿੱਚ ਗੁੰਮਰਾਹਕੁੰਨ ਤਸਵੀਰਾਂ ਅਤੇ ਪੌਦਿਆਂ ਤੋਂ ਤਿਆਰ ਸਮੱਗਰੀ ਬਾਰੇ ਗਲਤ ਜਾਣਕਾਰੀ ਦੇਣ ਦੀਆਂ ਖਾਮੀਆਂ ਵੀ ਸਾਹਮਣੇ ਆਈਆਂ।
ਐਕਵਾਬਲਿਸ ਲਾਈਫਸਾਇੰਸਿਜ਼ ਦੀ ਉਤਪਾਦਨ ਇਕਾਈ ਵਿੱਚ ਮਿਆਦ ਪੁੱਗ ਚੁੱਕਾ ਕੱਚਾ ਮਾਲ ਮਿਲਿਆ ਅਤੇ ਸਫ਼ਾਈ ਦੇ ਪ੍ਰਬੰਧ ਵੀ ਤਸੱਲੀਬਖ਼ਸ਼ ਨਹੀਂ ਸਨ। ਦੂਜੇ ਪਾਸੇ ਰਾਸਕੈਮ ਹੈਲਥਕੇਅਰ ਵੱਲੋਂ ਅਜਿਹੇ ਉਤਪਾਦਾਂ ਵਿੱਚ ਸ਼ਿਲਾਜੀਤ ਦੀ ਵਰਤੋਂ ਕੀਤੀ ਜਾ ਰਹੀ ਸੀ, ਜਿਨ੍ਹਾਂ ਵਿੱਚ ਇਸ ਸਮੱਗਰੀ ਦੀ ਵਰਤੋਂ ਮਨਜ਼ੂਰ ਨਹੀਂ ਸੀ। ਕੰਪਨੀ ਦੇ ਰਿਕਾਰਡ ਅਤੇ ਦਸਤਾਵੇਜ਼ਾਂ ਦੀ ਸਾਂਭ-ਸੰਭਾਲ ਵਿੱਚ ਵੀ ਕਈ ਕਮੀਆਂ ਦਰਜ ਕੀਤੀਆਂ ਗਈਆਂ।
ਸੁਪਰਕਿਓਰ ਬਾਇਓਟੈਕ ਦੇ ‘ਜੈਮਕੋਲਿਨ 9ਜੀ ਸਾਫਟਜੈਲ ਕੈਪਸੂਲ’ ਵਿੱਚ ਬਾਇਓਟਿਨ ਦੀ ਮਾਤਰਾ ਮਨਜ਼ੂਰਸ਼ੁਦਾ ਹੱਦ ਤੋਂ ਵੱਧ ਮਿਲੀ। ਇਸ ਤੋਂ ਇਲਾਵਾ ਵਿਟਾਮਿਨ ਈ ਦੇ ਨਾਂ ‘ਤੇ ਵੇਚੇ ਜਾ ਰਹੇ ਇੱਕ ਹੋਰ ਉਤਪਾਦ ਵਿੱਚ ਅਸਲ ਵਿਟਾਮਿਨ ਈ ਦੀ ਬਜਾਏ ਕਣਕ ਦੇ ਜਰਮ ਦਾ ਤੇਲ ਪਾਇਆ ਗਿਆ। ਕੰਪਨੀ ਦੇ ਪ੍ਰੋਬਾਇਓਟਿਕ ਉਤਪਾਦਾਂ ਵਿੱਚ ਗੈਰ-ਮਨਜ਼ੂਰਸ਼ੁਦਾ ਅਤੇ ਬਿਮਾਰੀ ਪੈਦਾ ਕਰਨ ਵਾਲੇ ਸੂਖਮ ਜੀਵਾਂ ਦੀ ਮੌਜੂਦਗੀ ਵੀ ਸਾਹਮਣੇ ਆਈ। ਇਸੇ ਤਰ੍ਹਾਂ ਐਂਬੀਕੋ ਆਯੁਰਵੈਦਿਕ ਹੈਲਥਕੇਅਰ ਵਿੱਚ ਮਿਆਦ ਪੁੱਗੀ ਸਮੱਗਰੀ ਦੀ ਵਰਤੋਂ ਅਤੇ ਸਫ਼ਾਈ ਸਬੰਧੀ ਨਿਯਮਾਂ ਦੀ ਉਲੰਘਣਾ ਪਾਈ ਗਈ।
ਇਸ ਤੋਂ ਇਲਾਵਾ ਵੇਦਾਂਤ ਰੈਮੇਡੀਜ਼ ਦੀ ਇਕਾਈ ਵਿੱਚ ਫਲੇਵਰਿੰਗ ਉਤਪਾਦ ਤਿਆਰ ਕਰਨ ਲਈ ਮਿਆਦ ਪੁੱਗੀ ਸਮੱਗਰੀ ਵਰਤੇ ਜਾਣ ਦੇ ਸਬੂਤ ਮਿਲੇ। ਇੱਥੇ ਸਫ਼ਾਈ, ਹਾਊਸਕੀਪਿੰਗ, ਉਤਪਾਦਨ ਢਾਂਚੇ ਅਤੇ ਟੈਸਟਿੰਗ ਸਹੂਲਤਾਂ ਨਾਲ ਸਬੰਧਤ ਮਾਪਦੰਡਾਂ ਵਿੱਚ ਵੀ ਕਮੀਆਂ ਦਰਜ ਕੀਤੀਆਂ ਗਈਆਂ। FSSAI ਨੇ ਸਪੱਸ਼ਟ ਕੀਤਾ ਹੈ ਕਿ ਨਿਊਟ੍ਰਾਸਿਊਟੀਕਲ ਖੇਤਰ ਵਿੱਚ ਖਪਤਕਾਰਾਂ ਦੀ ਸਿਹਤ ਅਤੇ ਸੁਰੱਖਿਆ ਸਭ ਤੋਂ ਅਹਿਮ ਹੈ। ਇਸ ਲਈ ਉਤਪਾਦਾਂ ਦੀ ਗੁਣਵੱਤਾ, ਸਹੀ ਲੇਬਲਿੰਗ, ਵਿਗਿਆਨਕ ਮਾਪਦੰਡਾਂ ਅਤੇ ਨਿਰਮਾਣ ਪ੍ਰਕਿਰਿਆਵਾਂ ਦੀ ਪਾਰਦਰਸ਼ਤਾ ਯਕੀਨੀ ਬਣਾਉਣ ਲਈ ਜਾਂਚ ਅਤੇ ਕਾਰਵਾਈ ਜਾਰੀ ਰਹੇਗੀ।
मेष: दिन शुभ रहेगा...