California Boat Accident: ਕੈਲੀਫੋਰਨੀਆ ਕਿਸ਼ਤੀ ਹਾਦਸੇ ‘ਚ ਦੋ ਮੈਕਸੀਕਨ ਪਾਇਲਟਾਂ ਨੂੰ 70-70 ਮਹੀਨਿਆਂ ਦੀ ਕੈਦ, ਦੋ ਭਾਰਤੀ ਬੱਚਿਆਂ ਸਮੇਤ ਚਾਰ ਦੀ ਹੋਈ ਸੀ ਮੌਤ।

10 November 2026 ਅੱਪਡੇਟ ਕੀਤਾ ਗਿਆ

California Boat Accident: ਅਮਰੀਕਾ ਵਿੱਚ ਗੈਰ-ਕਾਨੂੰਨੀ ਤਰੀਕੇ ਨਾਲ ਪ੍ਰਵਾਸੀਆਂ ਨੂੰ ਲਿਜਾਣ ਦੇ ਮਾਮਲੇ ਵਿੱਚ ਦੋ ਮੈਕਸੀਕਨ ਬੋਟ ਪਾਇਲਟਾਂ ਨੂੰ 70-70 ਮਹੀਨਿਆਂ ਦੀ ਜੇਲ੍ਹ ਸੁਣਾਈ ਗਈ ਹੈ। ਇਹ ਮਾਮਲਾ ਮਈ 2025 ਵਿੱਚ ਕੈਲੀਫੋਰਨੀਆ ਦੇ ਡੇਲ ਮਾਰ ਤੱਟ ਨੇੜੇ ਵਾਪਰੇ ਕਿਸ਼ਤੀ ਹਾਦਸੇ ਨਾਲ ਜੁੜਿਆ ਹੈ, ਜਿਸ ਵਿੱਚ ਦੋ ਭਾਰਤੀ ਬੱਚਿਆਂ ਸਮੇਤ ਚਾਰ ਲੋਕਾਂ ਦੀ ਜਾਨ ਚਲੀ ਗਈ ਸੀ।

ਸਜ਼ਾ ਪ੍ਰਾਪਤ ਕਰਨ ਵਾਲਿਆਂ ਦੀ ਪਛਾਣ 28 ਸਾਲਾ ਜੀਸਸ ਇਵਾਨ ਰੋਡਰਿਗੇਜ਼ ਲੇਵਾ ਅਤੇ 32 ਸਾਲਾ ਜੂਲਿਓ ਸੀਜ਼ਰ ਜ਼ੁਨਿਗਾ ਲੂਨਾ ਵਜੋਂ ਹੋਈ ਹੈ। ਅਦਾਲਤ ਵਿੱਚ ਦੋਵਾਂ ਨੇ ਮੰਨਿਆ ਕਿ ਕਿਸ਼ਤੀ ਵਿੱਚ ਉਸ ਦੀ ਸੁਰੱਖਿਅਤ ਸਮਰੱਥਾ ਤੋਂ ਕਿਤੇ ਵੱਧ ਲੋਕ ਸਵਾਰ ਸਨ। ਇਸ ਵਿੱਚ ਨਾ ਤਾਂ ਲਾਈਟਾਂ ਸਨ ਅਤੇ ਨਾ ਹੀ ਰੇਡੀਓ। ਹਾਦਸੇ ਵਿੱਚ ਮਾਰੇ ਗਏ ਭਾਰਤੀ ਬੱਚਿਆਂ ਦੀ ਉਮਰ 14 ਅਤੇ 10 ਸਾਲ ਸੀ, ਜਦਕਿ ਬਾਕੀ ਦੋ ਮ੍ਰਿਤਕ ਮੈਕਸੀਕਨ ਨਾਗਰਿਕ ਸਨ।

ਅਮਰੀਕੀ ਅਟਾਰਨੀ ਐਡਮ ਗੋਰਡਨ ਨੇ ਕਿਹਾ ਕਿ ਇਹ ਸਜ਼ਾ ਦਰਸਾਉਂਦੀ ਹੈ ਕਿ ਮਨੁੱਖੀ ਜ਼ਿੰਦਗੀ ਨਾਲੋਂ ਲਾਲਚ ਨੂੰ ਤਰਜੀਹ ਦੇਣ ਦੇ ਕਿੰਨੇ ਗੰਭੀਰ ਨਤੀਜੇ ਹੋ ਸਕਦੇ ਹਨ। ਦੋਵਾਂ ਮੁਲਜ਼ਮਾਂ ਨੇ 14 ਅਪ੍ਰੈਲ ਨੂੰ ਆਪਣੇ ਦੋਸ਼ ਕਬੂਲ ਕੀਤੇ ਸਨ। ਉਨ੍ਹਾਂ ਨੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਲੋਕਾਂ ਨੂੰ ਅਮਰੀਕਾ ਲਿਆਉਣ ਦੀ ਕੋਸ਼ਿਸ਼ ਕਰਨ ਅਤੇ ਇਸ ਦੌਰਾਨ ਮੌਤਾਂ ਹੋਣ ਨਾਲ ਸਬੰਧਤ ਦੋਸ਼ਾਂ ਦੇ ਨਾਲ-ਨਾਲ ਆਰਥਿਕ ਲਾਭ ਲਈ ਤਸਕਰੀ ਕਰਨ ਦੀ ਕੋਸ਼ਿਸ਼ ਵੀ ਮੰਨੀ ਸੀ।

ਦੋਵਾਂ ਦੇ ਇਕਬਾਲੀਆ ਬਿਆਨ ਮੁਤਾਬਕ, 5 ਮਈ 2025 ਨੂੰ ਉਹ ਮੈਕਸੀਕੋ ਦੇ ਪੋਪੋਟਲਾ ਤੋਂ 19 ਪ੍ਰਵਾਸੀਆਂ ਨੂੰ ਲੈ ਕੇ ਅਮਰੀਕਾ ਵੱਲ ਰਵਾਨਾ ਹੋਏ ਸਨ। ਇਨ੍ਹਾਂ ਵਿੱਚ ਤਿੰਨ ਨਾਬਾਲਗ ਵੀ ਸ਼ਾਮਲ ਸਨ। ਰਵਾਨਗੀ ਤੋਂ ਪਹਿਲਾਂ ਹੀ ਕਿਸ਼ਤੀ ਦੀ ਮੋਟਰ ਵਿੱਚ ਖਰਾਬੀ ਆ ਗਈ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਵਾਪਸ ਸ਼ੁਰੂਆਤੀ ਥਾਂ ‘ਤੇ ਜਾਣਾ ਪਿਆ। ਮੁਰੰਮਤ ਤੋਂ ਬਾਅਦ ਉਹ ਮੁੜ ਅਮਰੀਕੀ ਤੱਟ ਵੱਲ ਚੱਲ ਪਏ।

ਜਦੋਂ ਕਿਸ਼ਤੀ ਡੇਲ ਮਾਰ ਦੇ ਸਮੁੰਦਰੀ ਤੱਟ ਦੇ ਨੇੜੇ ਪਹੁੰਚੀ ਤਾਂ ਪਾਇਲਟਾਂ ਨੇ ਯਾਤਰੀਆਂ ਨੂੰ ਲਾਈਫ ਜੈਕਟਾਂ ਉਤਾਰਨ ਲਈ ਕਿਹਾ, ਤਾਂ ਜੋ ਉਹ ਜਲਦੀ ਕਿਸ਼ਤੀ ਤੋਂ ਉਤਰ ਕੇ ਉੱਥੇ ਉਡੀਕ ਰਹੀਆਂ ਗੱਡੀਆਂ ਤੱਕ ਪਹੁੰਚ ਸਕਣ। ਕਿਨਾਰੇ ਤੋਂ ਲਗਭਗ 200 ਗਜ਼ ਪਹਿਲਾਂ ਮੋਟਰ ਨੇ ਦੁਬਾਰਾ ਕੰਮ ਕਰਨਾ ਬੰਦ ਕਰ ਦਿੱਤਾ ਅਤੇ ਤੇਜ਼ ਲਹਿਰਾਂ ਵਿਚਕਾਰ ਕਿਸ਼ਤੀ ਪਲਟ ਗਈ। ਮੌਕੇ ‘ਤੇ ਮੌਜੂਦ ਲੋਕਾਂ ਨੇ ਹਾਦਸਾ ਦੇਖ ਕੇ ਉਸ ਦੀ ਵੀਡੀਓ ਬਣਾਈ ਅਤੇ ਸਬੰਧਤ ਏਜੰਸੀਆਂ ਨੂੰ ਸੂਚਨਾ ਦਿੱਤੀ।

ਘਟਨਾ ਤੋਂ ਬਾਅਦ ਹੋਮਲੈਂਡ ਸਕਿਓਰਿਟੀ ਇਨਵੈਸਟੀਗੇਸ਼ਨਜ਼, ਅਮਰੀਕੀ ਕੋਸਟ ਗਾਰਡ, ਸਥਾਨਕ ਲਾਈਫਗਾਰਡ ਅਤੇ ਬਾਰਡਰ ਪੈਟਰੋਲ ਨੇ ਸਾਂਝਾ ਬਚਾਅ ਅਭਿਆਨ ਚਲਾਇਆ। ਸਮੁੰਦਰੀ ਤੱਟ ਤੋਂ ਮਿਲੇ ਚਾਰ ਲੋਕਾਂ ਨੂੰ ਇਲਾਜ ਲਈ ਹਸਪਤਾਲ ਪਹੁੰਚਾਇਆ ਗਿਆ, ਜਦਕਿ ਚਾਰ ਦੀਆਂ ਲਾਸ਼ਾਂ ਹਾਦਸੇ ਵਾਲੀ ਥਾਂ ਤੋਂ ਬਰਾਮਦ ਹੋਈਆਂ। ਸੈਨ ਡਿਏਗੋ ਸੈਕਟਰ ਦੇ ਬਾਰਡਰ ਪੈਟਰੋਲ ਮੁਖੀ ਜਸਟਿਨ ਡੀ ਲਾ ਟੋਰੇ ਨੇ ਕਿਹਾ ਕਿ ਮਨੁੱਖੀ ਤਸਕਰੀ ਕਰਨ ਵਾਲੇ ਗਿਰੋਹ ਲੋਕਾਂ ਦੀਆਂ ਜਾਨਾਂ ਦੀ ਕੋਈ ਪਰਵਾਹ ਨਹੀਂ ਕਰਦੇ। ਅਦਾਲਤੀ ਦਸਤਾਵੇਜ਼ਾਂ ਵਿੱਚ ਇਸ ਤਸਕਰੀ ਨਾਲ ਜੁੜੇ ਇੱਕ ਨੈੱਟਵਰਕ ਦਾ ਵੀ ਜ਼ਿਕਰ ਹੈ, ਜਿਸ ਵਿੱਚ ਮੈਕਸੀਕੋ ਦੇ ਲੋਕ ਡਰਾਈਵਰਾਂ ਰਾਹੀਂ ਕਿਸ਼ਤੀਆਂ ਤੋਂ ਉਤਰੇ ਪ੍ਰਵਾਸੀਆਂ ਨੂੰ ਗੱਡੀਆਂ ਵਿੱਚ ਲੁਕਾ ਕੇ ਸੁਰੱਖਿਅਤ ਥਾਵਾਂ ਤੱਕ ਪਹੁੰਚਾਉਂਦੇ ਸਨ। ਇਹ ਡਰਾਈਵਰ ਮੈਕਸੀਕੋ ਅਤੇ ਅਮਰੀਕਾ ਵਿੱਚ ਮੌਜੂਦ ਆਪਣੇ ਸਾਥੀਆਂ ਨਾਲ ਤਾਲਮੇਲ ਕਰਕੇ ਕੰਮ ਕਰਦੇ ਸਨ।