Cruise Boat Accident: ਅਮਰੀਕਾ ਵਿੱਚ ਵੱਡਾ ਕਿਸ਼ਤੀ ਹਾਦਸਾ, ਟੈਂਕਰ ਨਾਲ ਟੱਕਰ ਮਗਰੋਂ 180 ਯਾਤਰੀਆਂ ਨਾਲ ਭਰੀ ਕਰੂਜ਼ ਬੋਟ ਪਲਟੀ, ਨਦੀ ਵਿੱਚ ਡਿੱਗੇ ਲੋਕ (ਵੀਡੀਓ)

14 November 2026 ਅੱਪਡੇਟ ਕੀਤਾ ਗਿਆ

New Orleans Cruise Boat Accident: ਅਮਰੀਕਾ ਦੇ ਨਿਊ ਓਰਲੀਨਜ਼ ਵਿੱਚ ਮਿਸਿਸਿਪੀ ਨਦੀ ‘ਤੇ ਇੱਕ ਵੱਡਾ ਹਾਦਸਾ ਵਾਪਰਿਆ, ਜਿੱਥੇ ਇੱਕ ਤੇਲ ਟੈਂਕਰ ਨੇ ਡੌਕ ‘ਤੇ ਖੜ੍ਹੀ ਯਾਤਰੀਆਂ ਨਾਲ ਭਰੀ ਕਰੂਜ਼ ਬੋਟ ਨੂੰ ਜ਼ੋਰਦਾਰ ਟੱਕਰ ਮਾਰ ਦਿੱਤੀ। ਟੱਕਰ ਇੰਨੀ ਭਿਆਨਕ ਸੀ ਕਿ ਕਰੂਜ਼ ਬੋਟ ਵਿੱਚ ਤੇਜ਼ੀ ਨਾਲ ਪਾਣੀ ਭਰਨ ਲੱਗਾ ਅਤੇ ਕੁਝ ਹੀ ਸਮੇਂ ਵਿੱਚ ਜਹਾਜ਼ ਪਲਟ ਗਿਆ। ਇਸ ਦੌਰਾਨ ਕਈ ਯਾਤਰੀ ਨਦੀ ਵਿੱਚ ਡਿੱਗ ਪਏ। ਹਾਲਾਂਕਿ, ਬਚਾਅ ਟੀਮਾਂ ਦੀ ਤੁਰੰਤ ਕਾਰਵਾਈ ਕਾਰਨ ਜਹਾਜ਼ ਵਿੱਚ ਸਵਾਰ ਸਾਰੇ 180 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਇਸ ਘਟਨਾ ਨੂੰ ਨਿਊ ਓਰਲੀਨਜ਼ ਦੀ ਮੇਅਰ ਹੇਲੇਨਾ ਮੋਰੇਨੋ ਨੇ ‘ਮਿਸਿਸਿਪੀ ਦਾ ਚਮਤਕਾਰ’ ਕਰਾਰ ਦਿੱਤਾ।

ਐਸੋਸੀਏਟਿਡ ਪ੍ਰੈੱਸ (AP) ਦੀ ਰਿਪੋਰਟ ਮੁਤਾਬਕ ਇਹ ਹਾਦਸਾ ਉਸ ਸਮੇਂ ਹੋਇਆ ਜਦੋਂ ‘ਅਟਲਾਂਟਿਕ ਐਸਫਾਲਟ’ ਨਾਮ ਦਾ ਵਿਸ਼ਾਲ ਟੈਂਕਰ ਨਿਊ ਓਰਲੀਨਜ਼ ਬੰਦਰਗਾਹ ਵੱਲ ਆ ਰਿਹਾ ਸੀ। ਇਸੇ ਦੌਰਾਨ ਟੈਂਕਰ ਨੇ ਡੌਕ ‘ਤੇ ਖੜ੍ਹੀ ‘ਅਮਰੀਕਨ ਹੈਰੀਟੇਜ’ ਕਰੂਜ਼ ਬੋਟ ਨੂੰ ਟੱਕਰ ਮਾਰ ਦਿੱਤੀ। ਮੁੱਢਲੀ ਜਾਣਕਾਰੀ ਅਨੁਸਾਰ ਟੈਂਕਰ ਦਾ ਸਟੀਅਰਿੰਗ ਫੇਲ੍ਹ ਹੋਣ ਕਾਰਨ ਇਹ ਹਾਦਸਾ ਵਾਪਰਿਆ ਹੋ ਸਕਦਾ ਹੈ, ਪਰ ਅਸਲ ਕਾਰਨ ਦੀ ਪੁਸ਼ਟੀ ਜਾਂਚ ਪੂਰੀ ਹੋਣ ਤੋਂ ਬਾਅਦ ਹੀ ਹੋਵੇਗੀ। ਟੱਕਰ ਕਾਰਨ ਕਰੂਜ਼ ਬੋਟ ਦੇ ਕਈ ਹਿੱਸੇ ਨੁਕਸਾਨੇ ਗਏ ਅਤੇ ਜਹਾਜ਼ ਇੱਕ ਪਾਸੇ ਝੁਕਣ ਤੋਂ ਬਾਅਦ ਨਦੀ ਵਿੱਚ ਪਲਟ ਗਿਆ।

ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਬੰਦਰਗਾਹ ‘ਤੇ ਮੌਜੂਦ ਕਰਮਚਾਰੀ, ਟਗਬੋਟ ਚਾਲਕ, ਪੁਲਿਸ ਅਤੇ ਐਮਰਜੈਂਸੀ ਬਚਾਅ ਟੀਮਾਂ ਮੌਕੇ ‘ਤੇ ਪਹੁੰਚ ਗਈਆਂ। ਸਾਰਿਆਂ ਨੇ ਮਿਲ ਕੇ ਨਦੀ ਵਿੱਚ ਡਿੱਗੇ ਲੋਕਾਂ ਨੂੰ ਬਚਾਉਣ ਲਈ ਮੁਹਿੰਮ ਚਲਾਈ। ਇਸ ਦੌਰਾਨ ਘੱਟੋ-ਘੱਟ ਦੋ ਪੁਲਿਸ ਅਧਿਕਾਰੀ ਵੀ ਨਦੀ ਵਿੱਚ ਡਿੱਗ ਗਏ। ਪਾਣੀ ਦਾ ਤਾਪਮਾਨ ਲਗਭਗ 19 ਡਿਗਰੀ ਸੈਲਸੀਅਸ ਦੱਸਿਆ ਗਿਆ। ਬਚਾਅ ਕਰਮਚਾਰੀਆਂ ਨੇ ਨੇੜੇ ਮੌਜੂਦ ਹੋਰ ਜਹਾਜ਼ਾਂ ਦੀ ਮਦਦ ਨਾਲ ਯਾਤਰੀਆਂ ਨੂੰ ਬਾਹਰ ਕੱਢਿਆ। ਹਾਦਸੇ ਤੋਂ ਬਾਅਦ ਕੁੱਲ 32 ਲੋਕਾਂ ਨੂੰ ਇਲਾਜ ਲਈ ਹਸਪਤਾਲ ਪਹੁੰਚਾਇਆ ਗਿਆ, ਪਰ ਕਿਸੇ ਦੀ ਹਾਲਤ ਗੰਭੀਰ ਨਹੀਂ ਦੱਸੀ ਗਈ।

ਨਿਊ ਓਰਲੀਨਜ਼ ਦੀ ਮੇਅਰ ਹੇਲੇਨਾ ਮੋਰੇਨੋ ਨੇ ਪ੍ਰੈੱਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਕਰੂਜ਼ ਬੋਟ ਵਿੱਚ ਮੌਜੂਦ ਸਾਰੇ 180 ਯਾਤਰੀਆਂ ਅਤੇ ਚਾਲਕ ਦਲ ਦੇ ਮੈਂਬਰਾਂ ਦਾ ਪਤਾ ਲਗਾ ਲਿਆ ਗਿਆ ਹੈ। ਕੋਈ ਵੀ ਵਿਅਕਤੀ ਲਾਪਤਾ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਇੰਨੇ ਵੱਡੇ ਹਾਦਸੇ ਦੇ ਬਾਵਜੂਦ ਸਾਰੇ ਲੋਕਾਂ ਦਾ ਸੁਰੱਖਿਅਤ ਮਿਲਣਾ ਕਿਸੇ ਚਮਤਕਾਰ ਤੋਂ ਘੱਟ ਨਹੀਂ ਹੈ। ਹਾਦਸੇ ਦੌਰਾਨ ਕਈ ਲੋਕਾਂ ਦੇ ਮੋਬਾਈਲ ਫੋਨ, ਪਛਾਣ ਪੱਤਰ ਅਤੇ ਵਾਹਨਾਂ ਦੀਆਂ ਚਾਬੀਆਂ ਨਦੀ ਵਿੱਚ ਡਿੱਗ ਗਈਆਂ। ਕਈ ਯਾਤਰੀ ਦੂਜੇ ਸ਼ਹਿਰਾਂ ਤੋਂ ਆਏ ਹੋਏ ਸਨ ਅਤੇ ਆਪਣੇ ਪਰਿਵਾਰਾਂ ਨਾਲ ਸੰਪਰਕ ਕਰਨ ਵਿੱਚ ਮੁਸ਼ਕਲ ਮਹਿਸੂਸ ਕਰ ਰਹੇ ਸਨ। ਇਸ ਲਈ ਸਥਾਨਕ ਪ੍ਰਸ਼ਾਸਨ ਨੇ ਪ੍ਰਭਾਵਿਤ ਲੋਕਾਂ ਲਈ ਖਾਣੇ, ਹੋਟਲਾਂ ਅਤੇ ਆਵਾਜਾਈ ਦਾ ਪ੍ਰਬੰਧ ਕੀਤਾ।

ਬੰਦਰਗਾਹ ‘ਤੇ ਕੰਮ ਕਰਨ ਵਾਲੇ ਇੱਕ ਚਸ਼ਮਦੀਦ ਡੇਵੋਨ ਫਲੈਨਗਨ ਨੇ ਦੱਸਿਆ ਕਿ ਉਨ੍ਹਾਂ ਨੇ ਕਰੂਜ਼ ਬੋਟ ਨੂੰ ਟੱਕਰ ਤੋਂ ਬਾਅਦ ਇੱਕ ਪਾਸੇ ਝੁਕਦੇ ਦੇਖਿਆ ਸੀ। ਉਸ ਸਮੇਂ ਕਈ ਯਾਤਰੀ ਪਹਿਲਾਂ ਹੀ ਨਦੀ ਵਿੱਚ ਡਿੱਗ ਚੁੱਕੇ ਸਨ ਅਤੇ ਆਲੇ-ਦੁਆਲੇ ਮੌਜੂਦ ਹੋਰ ਜਹਾਜ਼ਾਂ ਦੇ ਕਰਮਚਾਰੀ ਵੀ ਬਚਾਅ ਕਾਰਜ ਵਿੱਚ ਜੁਟ ਗਏ ਸਨ। ਇਸ ਦੌਰਾਨ ਪਾਣੀ ਵਿੱਚ ਕਈ ਲੋਕਾਂ ਦੀ ਮੌਜੂਦਗੀ ਕਾਰਨ ਰਾਹਤ ਕਾਰਜ ਕਾਫ਼ੀ ਚੁਣੌਤੀਪੂਰਨ ਬਣ ਗਿਆ ਸੀ। ਦੂਜੇ ਪਾਸੇ, ਅਮਰੀਕਾ ਦੇ ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (NTSB) ਨੇ ਹਾਦਸੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਜਾਂਚ ਟੀਮ ਇਹ ਪਤਾ ਲਗਾਏਗੀ ਕਿ ਟੈਂਕਰ ਕਰੂਜ਼ ਬੋਟ ਨਾਲ ਕਿਵੇਂ ਟਕਰਾਇਆ ਅਤੇ ਕੀ ਸਟੀਅਰਿੰਗ ਸਿਸਟਮ ਦੀ ਖ਼ਰਾਬੀ ਇਸ ਦੀ ਵਜ੍ਹਾ ਸੀ।

ਹਾਦਸੇ ਦਾ ਸ਼ਿਕਾਰ ਹੋਈ ‘ਅਮਰੀਕਨ ਹੈਰੀਟੇਜ’ ਕਰੂਜ਼ ਬੋਟ ਦਾ ਨਿਰਮਾਣ ਸਾਲ 2015 ਵਿੱਚ ਹੋਇਆ ਸੀ ਅਤੇ ਇਸ ਦਾ ਸੰਚਾਲਨ ਅਮਰੀਕਨ ਕਰੂਜ਼ ਲਾਈਨਜ਼ ਕੰਪਨੀ ਕਰਦੀ ਹੈ। ਪੰਜ ਮੰਜ਼ਿਲਾ ਇਸ ਜਹਾਜ਼ ਵਿੱਚ ਲਗਭਗ 150 ਯਾਤਰੀਆਂ ਨੂੰ ਲਿਜਾਣ ਦੀ ਸਮਰੱਥਾ ਹੈ। ਇਹ ਅੱਠ ਦਿਨਾਂ ਦੀ ਨਦੀ ਯਾਤਰਾ ਪੂਰੀ ਕਰਕੇ ਨਿਊ ਓਰਲੀਨਜ਼ ਪਹੁੰਚੀ ਸੀ ਅਤੇ ਹਾਦਸੇ ਸਮੇਂ ਯਾਤਰੀ ਜਹਾਜ਼ ਤੋਂ ਉਤਰਨ ਦੀ ਤਿਆਰੀ ਕਰ ਰਹੇ ਸਨ। ਦੂਜੇ ਪਾਸੇ ਟੱਕਰ ਮਾਰਨ ਵਾਲਾ ‘ਅਟਲਾਂਟਿਕ ਐਸਫਾਲਟ’ ਟੈਂਕਰ ਲਗਭਗ 520 ਫੁੱਟ ਲੰਬਾ ਹੈ ਅਤੇ ਮਾਰਸ਼ਲ ਆਈਲੈਂਡਜ਼ ਦੇ ਝੰਡੇ ਹੇਠ ਚੱਲਦਾ ਹੈ। ਇਹ ਸੜਕ ਨਿਰਮਾਣ ਵਿੱਚ ਵਰਤੇ ਜਾਣ ਵਾਲੇ ਐਸਫਾਲਟ ਅਤੇ ਬਿਟੂਮਨ ਦੀ ਢੋਆ-ਢੁਆਈ ਕਰਦਾ ਹੈ। ਟੈਂਕਰ ਦੇ ਮਾਲਕਾਨਾ ਹੱਕ ਅਤੇ ਸੰਚਾਲਨ ਨਾਲ ਜੁੜੇ ਵੇਰਵਿਆਂ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।