Weather Update: ਮੌਸਮ ਨੇ ਬਦਲੀ ਕਰਵਟ, ਦਿਨ ਵੇਲੇ ਤੇਜ਼ ਧੁੱਪ ਤੇ ਰਾਤ ਨੂੰ ਹਲਕੀ ਠੰਢ ਦਾ ਅਹਿਸਾਸ; ਹਵਾ ਪ੍ਰਦੂਸ਼ਣ ਵਿੱਚ ਵੀ ਮਾਮੂਲੀ ਕਮੀ

19 October 2026 ਅੱਪਡੇਟ ਕੀਤਾ ਗਿਆ

Delhi NCR Weather: ਦਿੱਲੀ ਸਮੇਤ ਪੂਰੇ ਰਾਸ਼ਟਰੀ ਰਾਜਧਾਨੀ ਖੇਤਰ (NCR) ਵਿੱਚ ਆਉਣ ਵਾਲੇ ਦਿਨਾਂ ਦੌਰਾਨ ਮੌਸਮ ਸਾਫ਼ ਰਹਿਣ ਦੀ ਸੰਭਾਵਨਾ ਹੈ। ਭਾਰਤੀ ਮੌਸਮ ਵਿਭਾਗ ਦੇ ਤਾਜ਼ਾ ਅਨੁਮਾਨ ਮੁਤਾਬਕ ਅਸਮਾਨ ਜ਼ਿਆਦਾਤਰ ਸਾਫ਼ ਰਹੇਗਾ ਅਤੇ ਲੋਕਾਂ ਨੂੰ ਧੁੱਪ ਮਿਲੇਗੀ। ਹਾਲਾਂਕਿ ਦਿਨ ਵੇਲੇ ਗਰਮੀ ਮਹਿਸੂਸ ਹੋਵੇਗੀ, ਜਦਕਿ ਰਾਤ ਨੂੰ ਹਲਕੀ ਠੰਢ ਰਹਿਣ ਦੀ ਉਮੀਦ ਹੈ। ਇਸ ਤਰ੍ਹਾਂ ਦਿਨ ਅਤੇ ਰਾਤ ਦੇ ਤਾਪਮਾਨ ਵਿੱਚ ਫ਼ਰਕ ਦੇਖਣ ਨੂੰ ਮਿਲ ਸਕਦਾ ਹੈ।

ਮੌਸਮ ਵਿਭਾਗ ਦੇ ਅਨੁਮਾਨ ਅਨੁਸਾਰ, 19 ਤੋਂ 24 ਅਕਤੂਬਰ ਤੱਕ ਦਿੱਲੀ ਵਿੱਚ ਵੱਧ ਤੋਂ ਵੱਧ ਤਾਪਮਾਨ ਹੌਲੀ-ਹੌਲੀ ਵਧ ਸਕਦਾ ਹੈ। 19 ਅਤੇ 20 ਅਕਤੂਬਰ ਨੂੰ ਵੱਧ ਤੋਂ ਵੱਧ ਤਾਪਮਾਨ 32 ਡਿਗਰੀ ਸੈਲਸੀਅਸ ਅਤੇ ਘੱਟੋ-ਘੱਟ ਤਾਪਮਾਨ 19 ਡਿਗਰੀ ਰਹਿਣ ਦੀ ਸੰਭਾਵਨਾ ਹੈ। ਇਸ ਤੋਂ ਬਾਅਦ 21, 22 ਅਤੇ 23 ਅਕਤੂਬਰ ਨੂੰ ਵੱਧ ਤੋਂ ਵੱਧ ਤਾਪਮਾਨ 33 ਡਿਗਰੀ ਤੱਕ ਪਹੁੰਚ ਸਕਦਾ ਹੈ, ਜਦਕਿ ਘੱਟੋ-ਘੱਟ ਤਾਪਮਾਨ 20 ਡਿਗਰੀ ਦੇ ਨੇੜੇ ਰਹਿਣ ਦਾ ਅਨੁਮਾਨ ਹੈ।

24 ਅਕਤੂਬਰ ਤੱਕ ਦਿਨ ਦਾ ਤਾਪਮਾਨ 34 ਡਿਗਰੀ ਸੈਲਸੀਅਸ ਤੱਕ ਪਹੁੰਚਣ ਦੀ ਸੰਭਾਵਨਾ ਜਤਾਈ ਗਈ ਹੈ। ਇਸ ਸਮੇਂ ਦੌਰਾਨ ਮੌਸਮ ਵਿੱਚ ਕਿਸੇ ਵੱਡੇ ਬਦਲਾਅ ਦੇ ਸੰਕੇਤ ਨਹੀਂ ਹਨ। ਮੌਸਮ ਵਿਭਾਗ ਨੇ 19 ਤੋਂ 24 ਅਕਤੂਬਰ ਤੱਕ ਕਿਸੇ ਵੀ ਤਰ੍ਹਾਂ ਦੀ ਮੌਸਮੀ ਚਿਤਾਵਨੀ ਜਾਰੀ ਨਹੀਂ ਕੀਤੀ ਹੈ। ਸਾਫ਼ ਅਸਮਾਨ ਕਾਰਨ ਦਿਨ ਵੇਲੇ ਧੁੱਪ ਤੇਜ਼ ਮਹਿਸੂਸ ਹੋ ਸਕਦੀ ਹੈ, ਜਦਕਿ ਰਾਤਾਂ ਮੁਕਾਬਲਤਨ ਠੰਢੀਆਂ ਰਹਿਣਗੀਆਂ।

ਦੂਜੇ ਪਾਸੇ, ਦਿੱਲੀ ਵਿੱਚ ਕਈ ਇਲਾਕਿਆਂ ਦੀ ਹਵਾ ਦੀ ਗੁਣਵੱਤਾ ਵਿੱਚ ਸੁਧਾਰ ਦਰਜ ਕੀਤਾ ਗਿਆ ਹੈ। ਰਿਪੋਰਟ ਮੁਤਾਬਕ ਲੰਬੀਆਂ ਛੁੱਟੀਆਂ ਦੌਰਾਨ ਕਈ ਥਾਵਾਂ ’ਤੇ ਏਅਰ ਕੁਆਲਿਟੀ ਇੰਡੈਕਸ (AQI) ਗ੍ਰੀਨ ਅਤੇ ਯੈਲੋ ਜ਼ੋਨ ਵਿੱਚ ਰਿਹਾ। ਬਦਰਪੁਰ ਵਿੱਚ AQI 83 ਦਰਜ ਕੀਤਾ ਗਿਆ, ਜੋ ਸੰਤੋਸ਼ਜਨਕ ਸ਼੍ਰੇਣੀ ਵਿੱਚ ਆਉਂਦਾ ਹੈ। ਇਸ ਤੋਂ ਇਲਾਵਾ ਅਸ਼ੋਕ ਵਿਹਾਰ ਵਿੱਚ 104, ਆਨੰਦ ਵਿਹਾਰ ਵਿੱਚ 110, ਕੈਂਟੋਨਮੈਂਟ ਖੇਤਰ ਵਿੱਚ 121, ਬੁਰਾੜੀ ਵਿੱਚ 123, ਆਇਆ ਨਗਰ ਵਿੱਚ 129, ਬੁਰਾੜੀ ਕਰਾਸਿੰਗ ਵਿੱਚ 136, ਬਵਾਨਾ ਵਿੱਚ 144 ਅਤੇ ਅਲੀਪੁਰ ਵਿੱਚ 145 AQI ਦਰਜ ਹੋਇਆ। ਇਹ ਅੰਕੜੇ ਦਰਮਿਆਨੀ ਹਵਾ ਗੁਣਵੱਤਾ ਵੱਲ ਇਸ਼ਾਰਾ ਕਰਦੇ ਹਨ।

ਦਿੱਲੀ ਦੇ ਮੁਕਾਬਲੇ NCR ਦੇ ਕੁਝ ਇਲਾਕਿਆਂ ਵਿੱਚ ਪ੍ਰਦੂਸ਼ਣ ਦੀ ਸਥਿਤੀ ਵਧੇਰੇ ਚਿੰਤਾਜਨਕ ਹੈ। ਗ੍ਰੇਟਰ ਨੋਇਡਾ ਦੇ ਨੋਲੇਜ ਪਾਰਕ-3 ਵਿੱਚ AQI 225 ਅਤੇ ਨੋਲੇਜ ਪਾਰਕ-5 ਵਿੱਚ 215 ਦਰਜ ਕੀਤਾ ਗਿਆ, ਜੋ ਖ਼ਰਾਬ ਸ਼੍ਰੇਣੀ ਵਿੱਚ ਆਉਂਦਾ ਹੈ। ਗਾਜ਼ੀਆਬਾਦ ਵਿੱਚ ਵੀ ਹਵਾ ਦੀ ਗੁਣਵੱਤਾ ਮਾੜੀ ਰਹੀ। ਲੋਨੀ ਵਿੱਚ AQI 243 ਤੱਕ ਪਹੁੰਚ ਗਿਆ, ਜਦਕਿ ਵਸੁੰਧਰਾ ਵਿੱਚ 218, ਵੇਵ ਸਿਟੀ ਵਿੱਚ 171, ਸੰਜੇ ਨਗਰ ਵਿੱਚ 162, ਵੇਦ ਵਿਹਾਰ-ਲੋਨੀ ਵਿੱਚ 119 ਅਤੇ ਗੋਵਿੰਦਪੁਰਮ ਵਿੱਚ 112 ਦਰਜ ਕੀਤਾ ਗਿਆ।

ਮੌਸਮ ਵਿਭਾਗ ਮੁਤਾਬਕ ਇਸ ਵੇਲੇ ਹਵਾ ਦੀ ਰਫ਼ਤਾਰ ਠੀਕ ਹੋਣ ਕਾਰਨ ਪ੍ਰਦੂਸ਼ਣ ਦੇ ਇਕੱਠੇ ਹੋਣ ਦੀ ਸਥਿਤੀ ਕੁਝ ਹੱਦ ਤੱਕ ਕਾਬੂ ਵਿੱਚ ਹੈ। ਪਰ ਸਰਦੀ ਵਧਣ ਦੇ ਨਾਲ ਜੇਕਰ ਹਵਾਵਾਂ ਦੀ ਰਫ਼ਤਾਰ ਘੱਟ ਜਾਂਦੀ ਹੈ, ਤਾਂ ਹਵਾ ਦੀ ਗੁਣਵੱਤਾ ਹੋਰ ਵਿਗੜ ਸਕਦੀ ਹੈ। ਇਸ ਲਈ ਆਉਣ ਵਾਲੇ ਦਿਨਾਂ ਵਿੱਚ ਮੌਸਮ ਦੇ ਨਾਲ-ਨਾਲ AQI ’ਤੇ ਵੀ ਨਜ਼ਰ ਰੱਖਣੀ ਜ਼ਰੂਰੀ ਹੋਵੇਗੀ, ਖ਼ਾਸ ਕਰਕੇ NCR ਦੇ ਉਨ੍ਹਾਂ ਇਲਾਕਿਆਂ ਵਿੱਚ ਜਿੱਥੇ ਪ੍ਰਦੂਸ਼ਣ ਦਾ ਪੱਧਰ ਪਹਿਲਾਂ ਹੀ ਖ਼ਰਾਬ ਦਰਜ ਕੀਤਾ ਜਾ ਰਿਹਾ ਹੈ।