ਤਵਿਸ਼ਾ ਸ਼ਰਮਾ ਕੇਸ: ਭੋਪਾਲ ਜੇਲ੍ਹ ਵਿੱਚ ਪਤੀ ਤੇ ਸੱਸ ਨੂੰ ਮਿਲੀ ਕੈਦ, ਆਮ ਕੈਦੀਆਂ ਵਰਗੀਆਂ ਹੀ ਸਹੂਲਤਾਂ ਲਾਗੂ

3 June 2026 ਅੱਪਡੇਟ ਕੀਤਾ ਗਿਆ

Tawisha Sharma case: ਮੱਧ ਪ੍ਰਦੇਸ਼ ਦੀ ਰਾਜਧਾਨੀ ਭੋਪਾਲ ਵਿੱਚ ਤਵਿਸ਼ਾ ਸ਼ਰਮਾ ਖੁਦਕੁਸ਼ੀ ਮਾਮਲੇ ਨੇ ਨਵਾਂ ਮੋੜ ਲੈ ਲਿਆ ਹੈ। ਸੀਬੀਆਈ ਦੀ ਵਿਸ਼ੇਸ਼ ਅਦਾਲਤ ਵੱਲੋਂ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਦੇ ਹੁਕਮ ਤੋਂ ਬਾਅਦ ਮ੍ਰਿਤਕਾ ਦੀ ਸੇਵਾਮੁਕਤ ਜੱਜ ਸੱਸ Giribala Singh ਅਤੇ ਉਸ ਦੇ ਪਤੀ ਸਮਰਥ ਸਿੰਘ ਨੂੰ ਭੋਪਾਲ ਕੇਂਦਰੀ ਜੇਲ੍ਹ ਭੇਜ ਦਿੱਤਾ ਗਿਆ ਹੈ।

ਜੇਲ੍ਹ ਪ੍ਰਸ਼ਾਸਨ ਨੇ ਦੋਵਾਂ ਨੂੰ ਕੈਦੀ ਨੰਬਰ ਜਾਰੀ ਕਰਕੇ ਆਮ ਕੈਦੀਆਂ ਵਾਂਗ ਬੈਰਕਾਂ ਵਿੱਚ ਰੱਖਿਆ ਹੈ। ਰਿਪੋਰਟਾਂ ਅਨੁਸਾਰ, ਸੇਵਾਮੁਕਤ ਜੱਜ ਗਿਰੀਬਾਲਾ ਸਿੰਘ ਨੂੰ ਕੈਦੀ ਨੰਬਰ 71 ਅਤੇ ਸਮਰਥ ਸਿੰਘ ਨੂੰ ਕੈਦੀ ਨੰਬਰ 1782 ਦਿੱਤਾ ਗਿਆ ਹੈ। ਦੋਵਾਂ ਨੂੰ ਸਿਰਫ਼ ਇੱਕ ਪਲੇਟ, ਕਟੋਰਾ ਅਤੇ ਚਾਦਰ ਵਰਗੀਆਂ ਆਮ ਜੇਲ੍ਹ ਸਹੂਲਤਾਂ ਦਿੱਤੀਆਂ ਗਈਆਂ ਹਨ।

ਅਦਾਲਤ ਵਿੱਚ ਪੇਸ਼ੀ ਦੌਰਾਨ ਮਾਹੌਲ ਭਾਵੁਕ ਹੋ ਗਿਆ ਜਦੋਂ ਗਿਰੀਬਾਲਾ ਸਿੰਘ ਰੋ ਪਈਆਂ। ਸੀਬੀਆਈ ਦੀਆਂ ਦਲੀਲਾਂ ਦੇ ਆਧਾਰ ‘ਤੇ ਅਦਾਲਤ ਨੇ ਦੋਵਾਂ ਨੂੰ 16 ਜੂਨ ਤੱਕ ਨਿਆਂਇਕ ਹਿਰਾਸਤ ਵਿੱਚ ਭੇਜਣ ਦੇ ਹੁਕਮ ਦਿੱਤੇ।

ਮਾਮਲਾ 33 ਸਾਲਾ ਤਵਿਸ਼ਾ ਸ਼ਰਮਾ ਦੀ ਮੌਤ ਨਾਲ ਜੁੜਿਆ ਹੈ, ਜਿਨ੍ਹਾਂ ਨੂੰ 12 ਮਈ ਨੂੰ ਆਪਣੇ ਸਹੁਰੇ ਘਰ ਵਿੱਚ ਲਟਕਿਆ ਹੋਇਆ ਪਾਇਆ ਗਿਆ ਸੀ। ਪਰਿਵਾਰ ਵੱਲੋਂ ਸੱਸ ਅਤੇ ਪਤੀ ਉੱਤੇ ਤੰਗ-ਪਰੇਸ਼ਾਨੀ ਦੇ ਗੰਭੀਰ ਦੋਸ਼ ਲਗਾਏ ਗਏ ਸਨ। ਇਸ ਤੋਂ ਬਾਅਦ ਸੀਬੀਆਈ ਨੇ ਜਾਂਚ ਆਪਣੇ ਹੱਥ ਵਿੱਚ ਲੈ ਕੇ ਨਵੀਂ ਐਫਆਈਆਰ ਦਰਜ ਕੀਤੀ।

ਸੀਬੀਆਈ ਦਾ ਕਹਿਣਾ ਹੈ ਕਿ ਫੋਰੈਂਸਿਕ ਰਿਪੋਰਟਾਂ ਅਤੇ ਡਿਜ਼ੀਟਲ ਸਬੂਤ ਅਜੇ ਵੀ ਲੰਬਿਤ ਹਨ, ਇਸ ਲਈ ਸਬੂਤਾਂ ਨਾਲ ਛੇੜਛਾੜ ਰੋਕਣ ਲਈ ਦੋਵਾਂ ਨੂੰ ਹਿਰਾਸਤ ਵਿੱਚ ਰੱਖਣਾ ਜ਼ਰੂਰੀ ਸੀ।