ਏਸ਼ੀਆ ਕੱਪ ਫਾਈਨਲ: ਪੰਡਯਾ ਬਣ ਸਕਦੇ ਹਨ 100 ਵਿਕਟਾਂ ਵਾਲੇ ਦੂਜੇ ਭਾਰਤੀ

4 months पहले

ਨਵੀਂ ਦਿੱਲੀ: ਏਸ਼ੀਆ ਕੱਪ 2025 ਦਾ ਫਾਈਨਲ ਮੈਚ ਐਤਵਾਰ ਨੂੰ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਖੇਡਿਆ ਜਾਣਾ ਹੈ, ਜਿਸ ‘ਚ ਹਾਰਦਿਕ ਪੰਡਯਾ ਕੋਲ ਇੱਕ ਵਿਸ਼ੇਸ਼ ਮੀਲ ਪੱਥਰ ਹਾਸਲ ਕਰਨ ਦਾ ਮੌਕਾ ਹੋਵੇਗਾ। ਜੇਕਰ ਉਹ ਪਾਕਿਸਤਾਨ ਵਿਰੁੱਧ ਦੋ ਹੋਰ ਵਿਕਟਾਂ ਲੈ ਲੈਂਦਾ ਹੈ, ਤਾਂ ਉਹ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ 100 ਵਿਕਟਾਂ ਪੂਰੀ ਕਰਨ ਵਾਲਾ ਦੂਜਾ ਭਾਰਤੀ ਗੇਂਦਬਾਜ਼ ਬਣ ਜਾਵੇਗਾ।
ਹਾਰਦਿਕ ਪੰਡਯਾ ਨੇ 2016 ਤੋਂ ਲੈ ਕੇ ਹੁਣ ਤੱਕ ਭਾਰਤ ਲਈ 120 ਟੀ-20 ਮੈਚ ਖੇਡੇ ਹਨ, ਜਿਸ ‘ਚ 26.58 ਦੀ ਔਸਤ ਨਾਲ 98 ਵਿਕਟਾਂ ਲਈਆਂ ਹਨ। ਇਸ ਐਸ਼ੀਆ ਕੱਪ ਦੇ ਮੌਜੂਦਾ ਐਡੀਸ਼ਨ ‘ਚ ਉਹ ਚਾਰ ਵਿਕਟਾਂ ਹਾਸਲ ਕਰ ਚੁੱਕਾ ਹੈ।

ਭਾਰਤ ਦੇ ਅਰਸ਼ਦੀਪ ਸਿੰਘ ਇਸ ਸਮੇਂ 101 ਵਿਕਟਾਂ ਨਾਲ ਟੀ-20 ਫਾਰਮੈਟ ‘ਚ ਸਭ ਤੋਂ ਅੱਗੇ ਹਨ। ਉਨ੍ਹਾਂ ਨੇ 65 ਮੈਚਾਂ ‘ਚ 18.76 ਦੀ ਔਸਤ ਨਾਲ ਇਹ ਰਿਕਾਰਡ ਬਣਾਇਆ। ਵਿਸ਼ਵ ਪੱਧਰ ‘ਤੇ, ਅਫਗਾਨਿਸਤਾਨ ਦੇ ਰਾਸ਼ਿਦ ਖਾਨ 103 ਮੈਚਾਂ ‘ਚ 173 ਵਿਕਟਾਂ ਨਾਲ ਸਿਖਰ ‘ਤੇ ਹਨ।
ਭਾਰਤੀ ਟੀਮ ਲਗਾਤਾਰ ਛੇ ਮੈਚ ਜਿੱਤ ਕੇ ਫਾਈਨਲ ‘ਚ ਪਹੁੰਚੀ ਹੈ। ਦੂਜੇ ਪਾਸੇ, ਪਾਕਿਸਤਾਨ ਨੇ ਆਪਣੇ ਦੋਵੇਂ ਮੈਚ ਭਾਰਤ ਵਿਰੁੱਧ ਹਾਰੇ ਹਨ — 14 ਸਤੰਬਰ ਨੂੰ ਸੱਤ ਵਿਕਟਾਂ ਨਾਲ ਅਤੇ 21 ਸਤੰਬਰ ਨੂੰ ਛੇ ਵਿਕਟਾਂ ਨਾਲ।

ਹੁਣ 28 ਸਤੰਬਰ ਨੂੰ ਦੁਬਈ ਇੰਟਰਨੈਸ਼ਨਲ ਕ੍ਰਿਕਟ ਗਰਾਊਂਡ ‘ਤੇ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਪਹਿਲਾ ਟੀ-20 ਏਸ਼ੀਆ ਕੱਪ ਫਾਈਨਲ ਹੋਣ ਜਾ ਰਿਹਾ ਹੈ। ਪ੍ਰਸ਼ੰਸਕਾਂ ਨੂੰ ਉਮੀਦ ਹੈ ਕਿ ਟੀਮ ਇੰਡੀਆ ਫਾਈਨਲ ‘ਚ ਵੀ ਆਪਣੀ ਜਿੱਤ ਦੀ ਲੜੀ ਜਾਰੀ ਰੱਖੇਗੀ।
ਇਹ ਮੈਚ ਨਾ ਸਿਰਫ਼ ਖਿਤਾਬੀ ਜਿੱਤ ਲਈ ਮਹੱਤਵਪੂਰਨ ਹੈ, ਸਗੋਂ ਹਾਰਦਿਕ ਪੰਡਯਾ ਲਈ ਵੀ ਇੱਕ ਅਨੋਖਾ ਰਿਕਾਰਡ ਬਣਾਉਣ ਦਾ ਮੌਕਾ ਹੈ।