ਸ਼ਲਾਘਾਯੋਗ : ਭਾਰਤ-US ‘ਚ ‘ਵੱਡੀ ਡੀਲ’! ਪਹਿਲੀ ਵਾਰ ਅਮਰੀਕਾ ਤੋਂ ਆਵੇਗੀ LPG

17 November 2025 ਅੱਪਡੇਟ ਕੀਤਾ ਗਿਆ

ਨਵੀਂ ਦਿੱਲੀ : ਭਾਰਤ ਨੇ ਆਪਣੀ ਊਰਜਾ ਸੁਰੱਖਿਆ ਨੂੰ ਮਜ਼ਬੂਤ ਕਰਦਿਆਂ, ਪਹਿਲੀ ਵਾਰ ਸੰਯੁਕਤ ਰਾਜ ਅਮਰੀਕਾ ਤੋਂ LPG ਆਯਾਤ ਕਰਨ ਲਈ ਇੱਕ ਇਤਿਹਾਸਕ ਸਮਝੌਤੇ ‘ਤੇ ਹਸਤਾਖਰ ਕੀਤੇ ਹਨ। ਕੇਂਦਰੀ ਪੈਟਰੋਲੀਅਮ ਮੰਤਰੀ ਹਰਦੀਪ ਸਿੰਘ ਪੁਰੀ (Hardeep Singh Puri) ਨੇ ਸੋਮਵਾਰ ਨੂੰ ਇਹ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਭਾਰਤੀ ਜਨਤਕ ਖੇਤਰ (PSU) ਦੀਆਂ ਤੇਲ ਕੰਪਨੀਆਂ ਨੇ 2.2 ਮਿਲੀਅਨ ਟਨ LPG ਦੇ ਆਯਾਤ ਲਈ ਇਹ ਇੱਕ-ਸਾਲਾ ਸਮਝੌਤਾ ਕੀਤਾ ਹੈ।

ਕੇਂਦਰੀ ਮੰਤਰੀ ਹਰਦੀਪ ਪੁਰੀ (Hardeep Puri) ਨੇ ਸੋਸ਼ਲ ਮੀਡੀਆ ‘X’ (ਐਕਸ) ‘ਤੇ ਇੱਕ ਪੋਸਟ ‘ਚ ਲਿਖਿਆ, ਇਤਿਹਾਸ ‘ਚ ਪਹਿਲੀ ਵਾਰ ਦੁਨੀਆ ਦੇ ਸਭ ਤੋਂ ਵੱਡੇ ਐਲਪੀਜੀ ਬਾਜ਼ਾਰਾਂ ‘ਚੋਂ ਇੱਕ ਭਾਰਤ ਹੁਣ ਸੰਯੁਕਤ ਰਾਜ ਅਮਰੀਕਾ ਲਈ ਖੁੱਲ੍ਹ ਗਿਆ ਹੈ। ਭਾਰਤ ਦੇ ਲੋਕਾਂ ਨੂੰ ਸੁਰੱਖਿਅਤ ਅਤੇ ਸਸਤੀ ਐਲਪੀਜੀ ਸਪਲਾਈ ਉਪਲਬਧ ਕਰਾਉਣ ਦੇ ਸਾਡੇ ਯਤਨਾਂ ‘ਚ, ਅਸੀਂ ਆਪਣੀ ਐਲਪੀਜੀ ਸੋਰਸਿੰਗ ਦਾ ਵਿਭਿੰਨਤਾ ਕਰ ਰਹੇ ਹਾਂ। ਉਨ੍ਹਾਂ ਅੱਗੇ ਲਿਖੇ ਇੱਕ ਮਹੱਤਵਪੂਰਨ ਘਟਨਾਕ੍ਰਮ ‘ਚ, ਭਾਰਤੀ PSU ਤੇਲ ਕੰਪਨੀਆਂ ਨੇ ਲਗਭਗ 2.2 MTPA ਐਲਪੀਜੀ ਦੇ ਆਯਾਤ ਲਈ ਇੱਕ ਸਾਲ ਦਾ ਸੌਦਾ ਸਫਲਤਾਪੂਰਵਕ ਪੂਰਾ ਕੀਤਾ ਹੈ। ਇਹ ਸਾਡੇ ਸਾਲਾਨਾ ਆਯਾਤ ਦਾ ਲਗਭਗ 10% ਹੈ।”

ਕੁਝ ਮਹੀਨਿਆਂ ਤੋਂ ਚੱਲ ਰਹੀ ਸੀ ਚਰਚਾ

ਪੁਰੀ ਨੇ ਅੱਗੇ ਲਿਖਿਆ, “ਇਹ LPG ਅਮਰੀਕਾ ਦੇ Gulf Coast ਤੋਂ ਪ੍ਰਾਪਤ ਕੀਤੀ ਜਾਵੇਗੀ। ਇਹ ਭਾਰਤੀ ਬਾਜ਼ਾਰ ਲਈ ਅਮਰੀਕੀ ਐਲਪੀਜੀ ਦਾ ਪਹਿਲਾ ਸਟ੍ਰਕਚਰਡ ਕਾਂਟਰੈਕਟ ਹੈ। ਇਹ ਖਰੀਦ ਪ੍ਰਕਿਰਿਆ Mount Bellevue ਨੂੰ ਐਲਪੀਜੀ ਖਰੀਦ ਦਾ ਬੈਂਚਮਾਰਕ (benchmark) ਮੰਨ ਕੇ ਕੀਤੀ ਗਈ ਹੈ। ਪਿਛਲੇ ਕੁਝ ਮਹੀਨਿਆਂ ‘ਚ ਸਾਡੀ ਟੀਮ- Indian Oil Corporation Limited, BPCL Limited ਅਤੇ HPCL ਦੇ ਅਧਿਕਾਰੀਆਂ ਨੇ ਅਮਰੀਕਾ ਦਾ ਦੌਰਾ ਕੀਤਾ ਅਤੇ ਉੱਥੋਂ ਦੇ ਪ੍ਰਮੁੱਖ ਪ੍ਰੋਡਿਊਸਰਾਂ (producers) ਨਾਲ ਚਰਚਾਵਾਂ ਕੀਤੀਆਂ, ਜੋ ਹੁਣ ਸਫਲਤਾਪੂਰਵਕ ਪੂਰੀਆਂ ਹੋ ਗਈਆਂ ਹਨ।”

ਪਿਛਲੇ ਸਾਲ 60% ਵਧੀਆਂ ਸਨ ਆਲਮੀ ਕੀਮਤਾਂ

ਇਸ ਮੌਕੇ ਪੁਰੀ ਨੇ ਕਿਹਾ, “ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ‘ਚ, ਸਾਡੀਆਂ ਸਰਕਾਰੀ ਤੇਲ ਕੰਪਨੀਆਂ ਦੁਨੀਆ ‘ਚ ਸਭ ਤੋਂ ਘੱਟ ਕੀਮਤਾਂ ‘ਤੇ ਐਲਪੀਜੀ ਉਪਲਬਧ ਕਰਵਾ ਰਹੀਆਂ ਹਨ। ਪਿਛਲੇ ਸਾਲ ਆਲਮੀ ਕੀਮਤਾਂ ‘ਚ 60% ਤੋਂ ਵੱਧ ਵਾਧਾ ਹੋਣ ਦੇ ਬਾਵਜੂਦ, PM ਮੋਦੀ ਨੇ ਯਕੀਨੀ ਬਣਾਇਆ ਕਿ ਉੱਜਵਲਾ ਖਪਤਕਾਰਾਂ ਨੂੰ ਸਿਰਫ਼ 500 ਤੋਂ 550 ਰੁਪਏ ‘ਚ ਹੀ ਐਲਪੀਜੀ ਸਿਲੰਡਰ ਮਿਲਦਾ ਰਹੇ, ਜਦਕਿ ਸਿਲੰਡਰ ਦੀ ਅਸਲ ਲਾਗਤ 1100 ਰੁਪਏ ਤੋਂ ਵੱਧ ਸੀ।