Gold Silver Price: ਧਨਤੇਰਸ ਮੌਕੇ ਸੋਨਾ-ਚਾਂਦੀ ਖਰੀਦਣ ਦਾ ਸੁਨਹਿਰੀ ਮੌਕਾ, Gold-Silver ਦੀਆਂ ਕੀਮਤਾਂ ‘ਚ ਆਈ ਵੱਡੀ ਕਮੀ

6 November 2026 ਅੱਪਡੇਟ ਕੀਤਾ ਗਿਆ

Gold Silver Price: ਧਨਤੇਰਸ ਦੇ ਤਿਉਹਾਰ ਮੌਕੇ ਸੋਨੇ ਅਤੇ ਚਾਂਦੀ ਦੀ ਖਰੀਦਦਾਰੀ ਕਰਨ ਦੀ ਯੋਜਨਾ ਬਣਾ ਰਹੇ ਲੋਕਾਂ ਲਈ ਰਾਹਤ ਦੀ ਖ਼ਬਰ ਸਾਹਮਣੇ ਆਈ ਹੈ। ਸ਼ੁੱਕਰਵਾਰ ਨੂੰ ਘਰੇਲੂ ਅਤੇ ਅੰਤਰਰਾਸ਼ਟਰੀ ਬਾਜ਼ਾਰਾਂ ਵਿੱਚ ਦੋਵਾਂ ਕੀਮਤੀ ਧਾਤਾਂ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਦਰਜ ਕੀਤੀ ਗਈ। ਪਿਛਲੇ ਕੁਝ ਦਿਨਾਂ ਤੋਂ ਸੋਨੇ-ਚਾਂਦੀ ਦੀਆਂ ਕੀਮਤਾਂ ਵਿੱਚ ਲਗਾਤਾਰ ਉਤਰਾਅ-ਚੜ੍ਹਾਅ ਦੇਖਣ ਨੂੰ ਮਿਲ ਰਿਹਾ ਸੀ, ਪਰ ਹਫ਼ਤੇ ਦੇ ਆਖਰੀ ਕਾਰੋਬਾਰੀ ਦਿਨ ਆਈ ਨਰਮੀ ਕਾਰਨ ਗਾਹਕਾਂ ਨੂੰ ਘੱਟ ਕੀਮਤ ‘ਤੇ ਖਰੀਦਦਾਰੀ ਦਾ ਮੌਕਾ ਮਿਲਿਆ ਹੈ।

ਮਲਟੀ ਕਮੋਡਿਟੀ ਐਕਸਚੇਂਜ (MCX) ‘ਤੇ ਦਸੰਬਰ ਡਿਲੀਵਰੀ ਵਾਲੇ ਸੋਨੇ ਦੀ ਕੀਮਤ ਆਪਣੇ ਪਿਛਲੇ ਬੰਦ ਭਾਅ 1,44,095 ਰੁਪਏ ਦੇ ਮੁਕਾਬਲੇ 1,934 ਰੁਪਏ ਜਾਂ 1.34 ਫ਼ੀਸਦੀ ਦੀ ਗਿਰਾਵਟ ਨਾਲ 1,42,161 ਰੁਪਏ ਪ੍ਰਤੀ 10 ਗ੍ਰਾਮ ‘ਤੇ ਖੁੱਲ੍ਹੀ। ਕਾਰੋਬਾਰ ਦੌਰਾਨ ਇਸ ਦੀ ਗਿਰਾਵਟ ਵਧ ਕੇ 2,651 ਰੁਪਏ ਯਾਨੀ 1.83 ਫ਼ੀਸਦੀ ਤੱਕ ਪਹੁੰਚ ਗਈ। ਚਾਂਦੀ ਦੇ ਭਾਅ ਵਿੱਚ ਵੀ ਸੋਨੇ ਦੇ ਮੁਕਾਬਲੇ ਵਧੇਰੇ ਕਮਜ਼ੋਰੀ ਦੇਖਣ ਨੂੰ ਮਿਲੀ।

ਦਸੰਬਰ ਡਿਲੀਵਰੀ ਵਾਲੀ ਚਾਂਦੀ ਦੀ ਕੀਮਤ ਸ਼ੁਰੂਆਤੀ ਕਾਰੋਬਾਰ ਵਿੱਚ 4,555 ਰੁਪਏ ਜਾਂ 2.43 ਫ਼ੀਸਦੀ ਡਿੱਗ ਕੇ 1,82,585 ਰੁਪਏ ਪ੍ਰਤੀ ਕਿਲੋਗ੍ਰਾਮ ਦੇ ਹੇਠਲੇ ਪੱਧਰ ‘ਤੇ ਪਹੁੰਚ ਗਈ। ਇਸ ਦਾ ਪਿਛਲਾ ਬੰਦ ਭਾਅ 1,87,140 ਰੁਪਏ ਸੀ, ਜਦਕਿ ਸ਼ੁੱਕਰਵਾਰ ਨੂੰ ਇਹ 1,641 ਰੁਪਏ ਜਾਂ 0.87 ਫ਼ੀਸਦੀ ਦੀ ਕਮੀ ਨਾਲ 1,85,499 ਰੁਪਏ ਪ੍ਰਤੀ ਕਿਲੋਗ੍ਰਾਮ ‘ਤੇ ਖੁੱਲ੍ਹੀ।

ਅੰਤਰਰਾਸ਼ਟਰੀ ਬਾਜ਼ਾਰ ਕਾਮੈਕਸ ਵਿੱਚ ਵੀ ਪਿਛਲੇ ਦਿਨ ਦੀ ਤੇਜ਼ੀ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਨਿਵੇਸ਼ਕਾਂ ਵੱਲੋਂ ਮੁਨਾਫ਼ਾ ਵਸੂਲੀ ਦੇਖਣ ਨੂੰ ਮਿਲੀ। ਸੋਨੇ ਦੀ ਕੀਮਤ 1.51 ਫ਼ੀਸਦੀ ਡਿੱਗ ਕੇ 4,051.40 ਡਾਲਰ ਪ੍ਰਤੀ ਔਂਸ ‘ਤੇ ਆ ਗਈ, ਜਦਕਿ ਚਾਂਦੀ 2.13 ਫ਼ੀਸਦੀ ਦੀ ਗਿਰਾਵਟ ਨਾਲ 51.260 ਡਾਲਰ ਪ੍ਰਤੀ ਔਂਸ ‘ਤੇ ਪਹੁੰਚ ਗਈ। ਮਾਹਿਰਾਂ ਮੁਤਾਬਕ ਨਿਵੇਸ਼ਕਾਂ ਦੀ ਨਜ਼ਰ ਹੁਣ ਅਮਰੀਕਾ ਦੇ ਨਾਨ-ਫਾਰਮ ਪੇਰੋਲ ਅੰਕੜਿਆਂ ਅਤੇ ਫੈਡਰਲ ਰਿਜ਼ਰਵ ਦੀ ਵਿਆਜ ਦਰ ਨੀਤੀ ਨਾਲ ਜੁੜੇ ਸੰਕੇਤਾਂ ‘ਤੇ ਹੈ। ਇਸ ਕਾਰਨ ਬਾਜ਼ਾਰ ਵਿੱਚ ਸਾਵਧਾਨੀ ਵਾਲਾ ਰੁਖ ਦੇਖਣ ਨੂੰ ਮਿਲ ਰਿਹਾ ਹੈ।

ਤਕਨੀਕੀ ਮਾਹਿਰਾਂ ਅਨੁਸਾਰ ਕਾਮੈਕਸ ‘ਤੇ ਸੋਨੇ ਲਈ 4,070 ਤੋਂ 4,100 ਡਾਲਰ ਪ੍ਰਤੀ ਔਂਸ ਦਾ ਪੱਧਰ ਅਹਿਮ ਰੁਕਾਵਟ ਬਣਿਆ ਹੋਇਆ ਹੈ, ਜਦਕਿ 4,000 ਡਾਲਰ ਦਾ ਪੱਧਰ ਮਜ਼ਬੂਤ ਸਹਾਰੇ ਵਜੋਂ ਦੇਖਿਆ ਜਾ ਰਿਹਾ ਹੈ। ਇਸੇ ਤਰ੍ਹਾਂ MCX ‘ਤੇ ਸੋਨੇ ਲਈ 1.43 ਲੱਖ ਤੋਂ 1.437 ਲੱਖ ਰੁਪਏ ਦਾ ਦਾਇਰਾ ਰੇਜ਼ਿਸਟੈਂਸ ਹੈ ਅਤੇ 1.40 ਲੱਖ ਰੁਪਏ ਦਾ ਪੱਧਰ ਮਹੱਤਵਪੂਰਨ ਸਪੋਰਟ ਮੰਨਿਆ ਜਾ ਰਿਹਾ ਹੈ। ਚਾਂਦੀ ਲਈ MCX ‘ਤੇ 1.86 ਲੱਖ ਤੋਂ 1.88 ਲੱਖ ਰੁਪਏ ਦਾ ਪੱਧਰ ਰੁਕਾਵਟ ਬਣ ਸਕਦਾ ਹੈ, ਜਦਕਿ 1.78 ਲੱਖ ਤੋਂ 1.80 ਲੱਖ ਰੁਪਏ ਦਾ ਦਾਇਰਾ ਅਹਿਮ ਸਹਾਰਾ ਮੰਨਿਆ ਜਾ ਰਿਹਾ ਹੈ।

ਬਾਜ਼ਾਰ ਮਾਹਿਰਾਂ ਦਾ ਮੰਨਣਾ ਹੈ ਕਿ ਧਨਤੇਰਸ ਮੌਕੇ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਆਈ ਇਹ ਗਿਰਾਵਟ ਖਰੀਦਦਾਰੀ ਕਰਨ ਵਾਲੇ ਗਾਹਕਾਂ ਲਈ ਚੰਗਾ ਮੌਕਾ ਹੋ ਸਕਦੀ ਹੈ। ਹਾਲਾਂਕਿ ਨਿਵੇਸ਼ ਦੇ ਮਕਸਦ ਨਾਲ ਕੀਮਤੀ ਧਾਤਾਂ ਖਰੀਦਣ ਵਾਲੇ ਲੋਕਾਂ ਨੂੰ ਸਿਰਫ਼ ਤਿਉਹਾਰ ਜਾਂ ਮੌਜੂਦਾ ਕੀਮਤਾਂ ਨੂੰ ਦੇਖ ਕੇ ਫ਼ੈਸਲਾ ਨਹੀਂ ਕਰਨਾ ਚਾਹੀਦਾ। ਉਨ੍ਹਾਂ ਨੂੰ ਆਪਣੇ ਵਿੱਤੀ ਟੀਚਿਆਂ, ਨਿਵੇਸ਼ ਦੀ ਮਿਆਦ ਅਤੇ ਜੋਖਮ ਸਹਿਣ ਦੀ ਸਮਰੱਥਾ ਨੂੰ ਧਿਆਨ ਵਿੱਚ ਰੱਖ ਕੇ ਹੀ ਖਰੀਦਦਾਰੀ ਕਰਨੀ ਚਾਹੀਦੀ ਹੈ।