Big Breaking : ਚਾਰ ਭਾਰਤੀ ਖਿਡਾਰੀ ਸਸਪੈਂਡ ! BCCI ਦੀ ਐਂਟੀ-ਕਰੱਪਸ਼ਨ ਯੂਨਿਟ ਨੇ ਕੀਤੀ ਜਾਂਚ, ਜਾਣੋ ਪੂਰਾ ਮਾਮਲਾ

13 December 2025 ਅੱਪਡੇਟ ਕੀਤਾ ਗਿਆ

ਗੁਹਾਟੀ : ਭਾਰਤੀ ਕ੍ਰਿਕਟ ਜਗਤ ਇੱਕ ਵਾਰ ਫਿਰ ਮੈਚ ਫਿਕਸਿੰਗ (Match Fixing) ਦੇ ਜਿੰਨ ਦੇ ਬਾਹਰ ਆਉਣ ਨਾਲ ਸ਼ਰਮਸਾਰ ਹੋ ਗਿਆ ਹੈ। ਦੇਸ਼ ਦੇ ਵੱਕਾਰੀ ਘਰੇਲੂ ਟੂਰਨਾਮੈਂਟ ਸਈਅਦ ਮੁਸ਼ਤਾਕ ਅਲੀ ਟਰਾਫੀ 2025 (Syed Mushtaq Ali Trophy 2025) ਦੌਰਾਨ ਭ੍ਰਿਸ਼ਟਾਚਾਰ ਦੀਆਂ ਕੋਸ਼ਿਸ਼ਾਂ ਨੂੰ ਲੈ ਕੇ ਅਸਾਮ ਕ੍ਰਿਕਟ ਐਸੋਸੀਏਸ਼ਨ (ACA) ਨੇ ਵੱਡਾ ਅਤੇ ਸਖ਼ਤ ਕਦਮ ਚੁੱਕਿਆ ਹੈ।

ਸ਼ੁੱਕਰਵਾਰ ਨੂੰ ਐਸੋਸੀਏਸ਼ਨ ਨੇ ਭ੍ਰਿਸ਼ਟਾਚਾਰ ਵਿੱਚ ਸ਼ਾਮਲ ਹੋਣ ਦੇ ਦੋਸ਼ ਵਿੱਚ ਆਪਣੇ ਚਾਰ ਖਿਡਾਰੀਆਂ ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ (Suspended) ਕਰ ਦਿੱਤਾ ਹੈ। ਮਾਮਲਾ ਇੰਨਾ ਗੰਭੀਰ ਹੈ ਕਿ ਕ੍ਰਿਕਟ ਬੋਰਡ ਨੇ ਇਨ੍ਹਾਂ ਖਿਡਾਰੀਆਂ ਖਿਲਾਫ਼ ਪੁਲਿਸ ਦੀ ਕ੍ਰਾਈਮ ਬ੍ਰਾਂਚ (Crime Branch) ਵਿੱਚ ਐਫਆਈਆਰ (FIR) ਵੀ ਦਰਜ ਕਰਵਾ ਦਿੱਤੀ ਹੈ।

ਇਨ੍ਹਾਂ 4 ਖਿਡਾਰੀਆਂ ‘ਤੇ ਡਿੱਗੀ ਗਾਜ

ਅਸਾਮ ਕ੍ਰਿਕਟ ਐਸੋਸੀਏਸ਼ਨ ਦੁਆਰਾ ਜਾਰੀ ਕੀਤੀ ਗਈ ਪ੍ਰੈਸ ਰਿਲੀਜ਼ ਅਨੁਸਾਰ, ਜਿਨ੍ਹਾਂ ਖਿਡਾਰੀਆਂ ‘ਤੇ ਕਾਰਵਾਈ ਹੋਈ ਹੈ, ਉਨ੍ਹਾਂ ਦੇ ਨਾਮ ਅਮਿਤ ਸਿਨਹਾ, ਈਸ਼ਾਨ ਅਹਿਮਦ, ਅਮਨ ਤ੍ਰਿਪਾਠੀ ਅਤੇ ਅਭਿਸ਼ੇਕ ਠਾਕੁਰੀ ਹਨ। ਇਹ ਚਾਰੇ ਖਿਡਾਰੀ ਵੱਖ-ਵੱਖ ਪੱਧਰ ‘ਤੇ ਅਸਾਮ ਰਾਜ ਦੀ ਨੁਮਾਇੰਦਗੀ ਕਰ ਚੁੱਕੇ ਹਨ।

ਇਨ੍ਹਾਂ ‘ਤੇ ਦੋਸ਼ ਹੈ ਕਿ ਇਨ੍ਹਾਂ ਨੇ ਸਈਅਦ ਮੁਸ਼ਤਾਕ ਅਲੀ ਟਰਾਫੀ ਦੌਰਾਨ ਅਸਾਮ ਦੀ ਟੀਮ ਵਿੱਚ ਸ਼ਾਮਲ ਮੌਜੂਦਾ ਖਿਡਾਰੀਆਂ ਨੂੰ ਪ੍ਰਭਾਵਿਤ ਕਰਨ ਅਤੇ ਉਨ੍ਹਾਂ ਨੂੰ ਗਲਤ ਗਤੀਵਿਧੀਆਂ ਲਈ ਉਕਸਾਉਣ ਦੀ ਕੋਸ਼ਿਸ਼ ਕੀਤੀ ਸੀ।

BCCI ਦੀ ਐਂਟੀ ਕਰੱਪਸ਼ਨ ਯੂਨਿਟ ਨੇ ਕੀਤੀ ਜਾਂਚ

ਇਸ ਮਾਮਲੇ ਦਾ ਖੁਲਾਸਾ ਉਦੋਂ ਹੋਇਆ ਜਦੋਂ ਕੁਝ ਖਿਡਾਰੀਆਂ ਨੇ ਇਸਦੀ ਸ਼ਿਕਾਇਤ ਕੀਤੀ। ਇਸਤੋਂ ਤੁਰੰਤ ਬਾਅਦ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਦੀ ਐਂਟੀ-ਕਰੱਪਸ਼ਨ ਯੂਨਿਟ (ACSU) ਨੇ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕੀਤੀ। ਏਸੀਏ ਸਕੱਤਰ ਸਨਾਤਨ ਦਾਸ ਨੇ ਦੱਸਿਆ ਕਿ ਪਹਿਲੀ ਨਜ਼ਰ ਵਿੱਚ ਇਹ ਖਿਡਾਰੀ ਗੰਭੀਰ ਦੁਰਵਿਹਾਰ (Misconduct) ਵਿੱਚ ਸ਼ਾਮਲ ਪਾਏ ਗਏ ਹਨ, ਜਿਸ ਨਾਲ ਖੇਡ ਦੀ ਅਖੰਡਤਾ ‘ਤੇ ਅਸਰ ਪਿਆ ਹੈ। ਇਸੇ ਵਜ੍ਹਾ ਨਾਲ ਸਥਿਤੀ ਨੂੰ ਹੋਰ ਵਿਗੜਨ ਤੋਂ ਰੋਕਣ ਲਈ ਪੁਲਿਸ ਵਿੱਚ ਮਾਮਲਾ ਦਰਜ ਕਰਵਾਉਣ ਦੇ ਨਾਲ-ਨਾਲ ਇਨ੍ਹਾਂ ਨੂੰ ਸਸਪੈਂਡ ਕੀਤਾ ਗਿਆ ਹੈ।

ਰਣਜੀ ਖਿਡਾਰੀ ਦਾ ਨਾਮ ਆਉਣ ਨਾਲ ਸਭ ਹੈਰਾਨ

ਸਸਪੈਂਡ ਕੀਤੇ ਗਏ ਖਿਡਾਰੀਆਂ ਦੀ ਸੂਚੀ ਵਿੱਚ ਸਭ ਤੋਂ ਹੈਰਾਨ ਕਰਨ ਵਾਲਾ ਨਾਮ ਅਭਿਸ਼ੇਕ ਠਾਕੁਰੀ ਦਾ ਹੈ। ਠਾਕੁਰੀ ਅਸਾਮ ਲਈ ਇੱਕ ਜਾਣਿਆ-ਪਛਾਣਿਆ ਚਿਹਰਾ ਹਨ ਅਤੇ ਮੁਸ਼ਤਾਕ ਅਲੀ ਟਰਾਫੀ ਸ਼ੁਰੂ ਹੋਣ ਤੋਂ ਕੁਝ ਹੀ ਦਿਨ ਪਹਿਲਾਂ ਤੱਕ ਉਹ ਰਣਜੀ ਟਰਾਫੀ ਵਿੱਚ ਟੀਮ ਦਾ ਹਿੱਸਾ ਸਨ। ਉਨ੍ਹਾਂ ਨੇ ਸਰਵਿਸਿਜ਼ ਅਤੇ ਤ੍ਰਿਪੁਰਾ ਖਿਲਾਫ਼ ਮੈਚ ਵੀ ਖੇਡੇ ਸਨ। ਇੱਕ ਸਰਗਰਮ ਖਿਡਾਰੀ ਦਾ ਨਾਮ ਫਿਕਸਿੰਗ ਦੀਆਂ ਕੋਸ਼ਿਸ਼ਾਂ ਵਿੱਚ ਆਉਣਾ ਕ੍ਰਿਕਟ ਪ੍ਰਸ਼ਾਸਨ ਲਈ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ।

ਕ੍ਰਿਕਟ ਗਤੀਵਿਧੀਆਂ ‘ਤੇ ਲੱਗੀ ਮੁਕੰਮਲ ਰੋਕ

ਅਸਾਮ ਕ੍ਰਿਕਟ ਐਸੋਸੀਏਸ਼ਨ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਜਦੋਂ ਤੱਕ ਜਾਂਚ ਪੂਰੀ ਨਹੀਂ ਹੋ ਜਾਂਦੀ ਅਤੇ ਅੰਤਿਮ ਫੈਸਲਾ ਨਹੀਂ ਆ ਜਾਂਦਾ, ਇਹ ਚਾਰੇ ਖਿਡਾਰੀ ਕਿਸੇ ਵੀ ਤਰ੍ਹਾਂ ਦੀ ਕ੍ਰਿਕਟ ਗਤੀਵਿਧੀ (Cricket Activity) ਵਿੱਚ ਹਿੱਸਾ ਨਹੀਂ ਲੈ ਸਕਣਗੇ।

1. ਉਹ ਰਾਜ ਵਿੱਚ ਕਿਸੇ ਵੀ ਟੂਰਨਾਮੈਂਟ ਵਿੱਚ ਨਹੀਂ ਖੇਡ ਸਕਦੇ।
2. ਉਨ੍ਹਾਂ ਨੂੰ ਕੋਚ, ਅੰਪਾਇਰ ਜਾਂ ਮੈਚ ਰੈਫਰੀ ਬਣਨ ਦੀ ਵੀ ਇਜਾਜ਼ਤ ਨਹੀਂ ਹੋਵੇਗੀ।
3. ਸਾਰੇ ਜ਼ਿਲ੍ਹਾ ਸੰਘਾਂ ਅਤੇ ਕਲੱਬਾਂ ਨੂੰ ਇਸ ਆਦੇਸ਼ ਦੀ ਸਖ਼ਤੀ ਨਾਲ ਪਾਲਣਾ ਕਰਨ ਦਾ ਨਿਰਦੇਸ਼ ਦਿੱਤਾ ਗਿਆ ਹੈ।

ਜ਼ਿਕਰਯੋਗ ਹੈ ਕਿ ਅਸਾਮ ਦੀ ਟੀਮ ਵਿੱਚ ਰਿਆਨ ਪਰਾਗ ਵਰਗੇ ਸਟਾਰ ਖਿਡਾਰੀ ਵੀ ਸ਼ਾਮਲ ਸਨ, ਪਰ ਟੀਮ ਦਾ ਪ੍ਰਦਰਸ਼ਨ ਟੂਰਨਾਮੈਂਟ ਵਿੱਚ ਕੁਝ ਖਾਸ ਨਹੀਂ ਰਿਹਾ ਸੀ।