ਸੋਨਾ ਤਸਕਰੀ ਮਾਮਲਾ: DGP ਰੈਂਕ ਦਾ ਅਧਿਕਾਰੀ ਸਸਪੈਂਡ, ਵਾਇਰਲ ਵੀਡੀਓ ਨਾਲ ਸ਼ੋਸ਼ਲ ਮੀਡੀਆ ਤੇ ਹੰਗਾਮਾ

20 January 2026 ਅੱਪਡੇਟ ਕੀਤਾ ਗਿਆ

ਕਰਨਾਟਕ ਵਿੱਚ ਸੋਨਾ ਤਸਕਰੀ ਮਾਮਲੇ ਨਾਲ ਜੁੜੇ ਇੱਕ ਨਵੇਂ ਵਿਵਾਦ ਨੇ ਰਾਜਨੀਤਕ ਅਤੇ ਪ੍ਰਸ਼ਾਸਨਿਕ ਹਲਕਿਆਂ ਵਿੱਚ ਭਾਰੀ ਹੰਗਾਮਾ ਖੜ੍ਹਾ ਕਰ ਦਿੱਤਾ ਹੈ। ਇਸ ਮਾਮਲੇ ਵਿੱਚ ਮੁਲਜ਼ਮ ਰਾਨਿਆ ਰਾਓ ਦੇ ਪਿਤਾ ਅਤੇ DGP ਰੈਂਕ ਦੇ ਸੀਨੀਅਰ ਪੁਲਿਸ ਅਧਿਕਾਰੀ ਰਾਮਚੰਦਰ ਰਾਓ ਦਾ ਇੱਕ ਕਥਿਤ ਅਪਮਾਨਜਨਕ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਸਰਕਾਰ ਨੇ ਉਨ੍ਹਾਂ ਨੂੰ ਸਸਪੈਂਡ ਕਰ ਦਿੱਤਾ ਹੈ।

ਵਾਇਰਲ ਹੋਏ ਵੀਡੀਓ ਵਿੱਚ ਕਥਿਤ ਤੌਰ ‘ਤੇ ਰਾਮਚੰਦਰ ਰਾਓ ਨੂੰ ਆਪਣੇ ਦਫ਼ਤਰ ਦੇ ਅੰਦਰ ਵਰਦੀ ਵਿੱਚ ਵੱਖ-ਵੱਖ ਔਰਤਾਂ ਨੂੰ ਗਲੇ ਲਗਾਉਂਦੇ ਅਤੇ ਚੁੰਮਦੇ ਹੋਏ ਦਿਖਾਇਆ ਗਿਆ ਹੈ। ਸੂਤਰਾਂ ਮੁਤਾਬਕ, ਇਹ ਦ੍ਰਿਸ਼ DGP ਦੇ ਦਫ਼ਤਰ ਦੇ ਅੰਦਰ ਗੁਪਤ ਤੌਰ ‘ਤੇ ਰਿਕਾਰਡ ਕੀਤੇ ਗਏ ਲੱਗਦੇ ਹਨ। ਵੀਡੀਓ ਵਿੱਚ ਵੱਖ-ਵੱਖ ਸਮਿਆਂ ‘ਤੇ ਵੱਖ-ਵੱਖ ਡਰੈੱਸ ਵਿੱਚ ਔਰਤਾਂ ਦਿਖਾਈ ਦੇ ਰਹੀਆਂ ਹਨ। ਹਾਲਾਂਕਿ, ਇਸ ਮਾਮਲੇ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਜ਼ਬਰਦਸਤੀ ਦੇ ਦੋਸ਼ ਸਾਹਮਣੇ ਨਹੀਂ ਆਏ ਹਨ।

ਮੁੱਖ ਮੰਤਰੀ ਸਿੱਧਾਰਮੈਯਾ ਤੱਕ ਪਹੁੰਚਿਆ ਮਾਮਲਾ

ਇਹ ਵਿਵਾਦ ਮੁੱਖ ਮੰਤਰੀ ਸਿੱਧਾਰਮੈਯਾ ਤੱਕ ਪਹੁੰਚ ਗਿਆ, ਜਿਨ੍ਹਾਂ ਨੇ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਸੰਬੰਧਤ ਵਿਭਾਗ ਤੋਂ ਤੁਰੰਤ ਜਾਣਕਾਰੀ ਮੰਗੀ। ਸੂਤਰਾਂ ਅਨੁਸਾਰ, ਵੀਡੀਓ ਦੇਖਣ ਤੋਂ ਬਾਅਦ ਮੁੱਖ ਮੰਤਰੀ ਕਾਫ਼ੀ ਨਾਰਾਜ਼ ਨਜ਼ਰ ਆਏ ਅਤੇ ਪੁਲਿਸ ਵਿਭਾਗ ਦੇ ਅੰਦਰ ਅਜਿਹੀ ਘਟਨਾ ਕਿਵੇਂ ਹੋ ਸਕੀ, ਇਸ ਬਾਰੇ ਵਿਸਥਾਰ ਨਾਲ ਰਿਪੋਰਟ ਮੰਗੀ। ਵਧਦੇ ਦਬਾਅ ਦੇ ਮੱਦੇਨਜ਼ਰ ਸਰਕਾਰ ਨੇ ਦੋਸ਼ੀ ਅਧਿਕਾਰੀ ਨੂੰ ਸਸਪੈਂਡ ਕਰਨ ਦਾ ਫ਼ੈਸਲਾ ਲਿਆ।

READ ALSO : AI ਗੋਲਡ ATM: ਹੁਣ ਜਵੈਲਰ ਨਹੀਂ, ਮਸ਼ੀਨ ਕਰੇਗੀ ਤੁਹਾਡਾ ਸੋਨਾ ਕੈਸ਼

ਦੋਸ਼ਾਂ ‘ਤੇ ਰਾਮਚੰਦਰ ਰਾਓ ਦਾ ਇਨਕਾਰ

ਦੂਜੇ ਪਾਸੇ, ਰਾਮਚੰਦਰ ਰਾਓ ਨੇ ਆਪਣੇ ਉੱਤੇ ਲੱਗੇ ਸਾਰੇ ਦੋਸ਼ਾਂ ਨੂੰ ਸਿਰੇ ਤੋਂ ਖ਼ਾਰਜ ਕਰ ਦਿੱਤਾ ਹੈ। ਇੰਡੀਆ ਟੁਡੇ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਵਾਇਰਲ ਵੀਡੀਓ ਮਨਗੜੰਤ ਹੈ ਅਤੇ ਆਧੁਨਿਕ ਟੈਕਨਾਲੋਜੀ ਦੀ ਮਦਦ ਨਾਲ ਤਿਆਰ ਕੀਤੀ ਗਈ ਹੈ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੂੰ ਜਾਣਬੂਝ ਕੇ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ।

ਰਾਓ ਨੇ ਕਿਹਾ, “ਮੈਂ ਅੱਠ ਸਾਲ ਪਹਿਲਾਂ ਬੈਲਗਾਵੀ ਵਿੱਚ ਸੀ। ਇਹ ਮਾਮਲਾ ਬਹੁਤ ਪੁਰਾਣਾ ਦੱਸਿਆ ਜਾ ਰਿਹਾ ਹੈ। ਅਸੀਂ ਆਪਣੇ ਵਕੀਲ ਨਾਲ ਸਲਾਹ ਕਰ ਰਹੇ ਹਾਂ ਅਤੇ ਕਾਨੂੰਨੀ ਕਾਰਵਾਈ ਕਰਾਂਗੇ। ਇਹ ਵੀਡੀਓ ਪੂਰੀ ਤਰ੍ਹਾਂ ਝੂਠੀ ਹੈ। ਬਿਨਾਂ ਪੂਰੀ ਜਾਂਚ ਦੇ ਕਿਸੇ ਨਤੀਜੇ ‘ਤੇ ਪਹੁੰਚਣਾ ਗਲਤ ਹੈ।”

ਦੱਸਣਯੋਗ ਹੈ ਕਿ ਇਸ ਵਿਵਾਦ ਦੇ ਦਰਮਿਆਨ ਰਾਮਚੰਦਰ ਰਾਓ ਨੇ ਰਾਜ ਦੇ ਗ੍ਰਹਿ ਮੰਤਰੀ ਨਾਲ ਵੀ ਮੁਲਾਕਾਤ ਕੀਤੀ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਸਰਕਾਰ ਵੱਲੋਂ ਅਗਲੇ ਕਦਮਾਂ ‘ਤੇ ਸਭ ਦੀ ਨਜ਼ਰ ਬਣੀ ਹੋਈ ਹੈ।

ਦਿੱਲੀ ਦਾ ਅੰਤਰਰਾਸ਼ਟਰੀ ਅੱਡਾ ਪੰਜ ਮਹੀਨੇ ਲਈ ਬੰਦ, ਜਾਣੋਂ ਕਾਰਨ…