Davis Cup: ਦੂਜੇ ਰਾਊਂਡ ਵਿੱਚ ਭਾਰਤ ਦਾ ਨਿਰਾਸ਼ਾਜਨਕ ਪ੍ਰਦਰਸ਼ਨ, ਸਾਊਥ ਕੋਰੀਆ ਤੋਂ 3-1 ਨਾਲ ਮਿਲੀ ਹਾਰ

19 September 2026 ਅੱਪਡੇਟ ਕੀਤਾ ਗਿਆ

Davis Cup : ਡੇਵਿਸ ਕੱਪ ਦੇ ਦੂਜੇ ਰਾਊਂਡ ਵਿੱਚ ਭਾਰਤੀ ਟੈਨਿਸ ਟੀਮ ਨੂੰ ਸਾਊਥ ਕੋਰੀਆ ਖ਼ਿਲਾਫ਼ 1-3 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। 18 ਅਤੇ 19 ਸਤੰਬਰ ਨੂੰ ਸਿਓਲ ਦੇ ਓਲੰਪਿਕ ਟੈਨਿਸ ਕੋਰਟ ‘ਤੇ ਹੋਏ ਇਸ ਮੁਕਾਬਲੇ ਵਿੱਚ ਭਾਰਤ ਚਾਰ ਮੈਚਾਂ ਵਿੱਚ ਸਿਰਫ਼ ਇੱਕ ਜਿੱਤ ਦਰਜ ਕਰ ਸਕਿਆ। ਹਾਰ ਦੇ ਨਾਲ ਹੀ ਭਾਰਤੀ ਟੀਮ ਦਾ ਆਖਰੀ-8 ਵਿੱਚ ਜਗ੍ਹਾ ਬਣਾਉਣ ਦਾ ਅਭਿਆਨ ਵੀ ਖ਼ਤਮ ਹੋ ਗਿਆ।

ਪਹਿਲੇ ਦਿਨ ਭਾਰਤ ਦੇ ਦੋਵੇਂ ਸਿੰਗਲਜ਼ ਮੁਕਾਬਲੇ ਹਾਰ ਗਏ। ਡੀਕੇ ਸੁਰੇਸ਼ ਦੇ ਸਾਹਮਣੇ ਸਾਊਥ ਕੋਰੀਆ ਦੇ ਸੂਨਵੂ ਕਵੋਨ ਸਨ। ਸੁਰੇਸ਼ ਨੇ ਪਹਿਲਾ ਸੈੱਟ 6-3 ਨਾਲ ਆਪਣੇ ਨਾਮ ਕਰਕੇ ਬੜ੍ਹਤ ਬਣਾਈ, ਪਰ ਕਵੋਨ ਨੇ ਅਗਲੇ ਸੈੱਟ ਵਿੱਚ 6-3 ਨਾਲ ਵਾਪਸੀ ਕੀਤੀ। ਫ਼ੈਸਲਾਕੁੰਨ ਤੀਜੇ ਸੈੱਟ ਵਿੱਚ ਵੀ ਦੋਵਾਂ ਵਿਚਾਲੇ ਸਖ਼ਤ ਮੁਕਾਬਲਾ ਹੋਇਆ, ਜਿਸ ਵਿੱਚ ਕਵੋਨ ਨੇ 6-4 ਨਾਲ ਜਿੱਤ ਹਾਸਲ ਕਰਕੇ ਕੋਰੀਆ ਨੂੰ 1-0 ਦੀ ਬੜ੍ਹਤ ਦਿਵਾਈ।

ਇਸ ਤੋਂ ਬਾਅਦ ਸੁਮਿਤ ਨਾਗਲ ਅਤੇ ਹਿਊਨ ਚੁੰਗ ਵਿਚਾਲੇ ਮੁਕਾਬਲਾ ਹੋਇਆ। ਨਾਗਲ ਨੇ ਸ਼ੁਰੂਆਤ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਪਹਿਲਾ ਸੈੱਟ 6-2 ਨਾਲ ਜਿੱਤ ਲਿਆ। ਹਾਲਾਂਕਿ, ਚੁੰਗ ਨੇ ਦੂਜੇ ਸੈੱਟ ਵਿੱਚ 6-4 ਨਾਲ ਬਾਜ਼ੀ ਮਾਰ ਕੇ ਮੈਚ ਵਿੱਚ ਵਾਪਸੀ ਕੀਤੀ। ਤੀਜੇ ਸੈੱਟ ਵਿੱਚ ਵੀ ਦੋਵਾਂ ਖਿਡਾਰੀਆਂ ਵਿਚਾਲੇ ਸਖ਼ਤ ਟੱਕਰ ਰਹੀ, ਪਰ ਚੁੰਗ ਨੇ 7-5 ਨਾਲ ਸੈੱਟ ਜਿੱਤ ਕੇ ਮੁਕਾਬਲਾ ਆਪਣੇ ਨਾਮ ਕਰ ਲਿਆ ਅਤੇ ਸਾਊਥ ਕੋਰੀਆ ਦੀ ਬੜ੍ਹਤ 2-0 ਹੋ ਗਈ।

19 ਸਤੰਬਰ ਨੂੰ ਡਬਲਜ਼ ਮੈਚ ਵਿੱਚ ਐੱਨ. ਸ਼੍ਰੀਰਾਮ ਬਾਲਾਜੀ ਅਤੇ ਡੀਕੇ ਸੁਰੇਸ਼ ਦੀ ਜੋੜੀ ਨੇ ਭਾਰਤ ਨੂੰ ਪਹਿਲੀ ਜਿੱਤ ਦਿਵਾਈ। ਭਾਰਤੀ ਜੋੜੀ ਨੇ ਜਿਸੁੰਗ ਨਾਮ ਅਤੇ ਉਇਸੁੰਗ ਪਾਰਕ ਦੀ ਕੋਰੀਆਈ ਜੋੜੀ ਨੂੰ ਤਿੰਨ ਸੈੱਟਾਂ ਤੱਕ ਚੱਲੇ ਮੁਕਾਬਲੇ ਵਿੱਚ 6-3, 3-6, 6-3 ਨਾਲ ਹਰਾਇਆ। ਇਸ ਜਿੱਤ ਤੋਂ ਬਾਅਦ ਭਾਰਤੀ ਟੀਮ ਨੇ ਮੁਕਾਬਲੇ ਵਿੱਚ ਵਾਪਸੀ ਦੀ ਉਮੀਦ ਜ਼ਰੂਰ ਕਾਇਮ ਰੱਖੀ।

ਪਰ ਚੌਥੇ ਮੈਚ ਵਿੱਚ ਸੁਮਿਤ ਨਾਗਲ ਨੂੰ ਸੂਨਵੂ ਕਵੋਨ ਖ਼ਿਲਾਫ਼ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਕਵੋਨ ਨੇ ਨਾਗਲ ਨੂੰ ਸਿੱਧੇ ਸੈੱਟਾਂ ਵਿੱਚ 6-1, 6-2 ਨਾਲ ਮਾਤ ਦਿੱਤੀ। ਇਸ ਜਿੱਤ ਦੇ ਨਾਲ ਸਾਊਥ ਕੋਰੀਆ ਨੇ ਮੁਕਾਬਲੇ ਵਿੱਚ 3-1 ਦੀ ਫ਼ੈਸਲਾਕੁੰਨ ਬੜ੍ਹਤ ਹਾਸਲ ਕਰ ਲਈ ਅਤੇ ਭਾਰਤ ਲਈ ਅੱਗੇ ਵਧਣ ਦੇ ਰਸਤੇ ਬੰਦ ਹੋ ਗਏ।

ਇਸ ਤਰ੍ਹਾਂ ਭਾਰਤੀ ਟੀਮ ਡੇਵਿਸ ਕੱਪ ਦੇ ਦੂਜੇ ਰਾਊਂਡ ਵਿੱਚ ਹੀ ਮੁਕਾਬਲੇ ਤੋਂ ਬਾਹਰ ਹੋ ਗਈ। ਚਾਰ ਮੁਕਾਬਲਿਆਂ ਵਿੱਚ ਭਾਰਤ ਨੂੰ ਸਿਰਫ਼ ਇੱਕ ਜਿੱਤ ਮਿਲੀ, ਜਦਕਿ ਸਾਊਥ ਕੋਰੀਆ ਨੇ ਤਿੰਨ ਮੈਚ ਜਿੱਤ ਕੇ ਅਗਲੇ ਪੜਾਅ ਵਿੱਚ ਜਗ੍ਹਾ ਬਣਾਈ। ਭਾਰਤ ਵਿੱਚ ਡੇਵਿਸ ਕੱਪ ਮੁਕਾਬਲਿਆਂ ਦਾ ਸਿੱਧਾ ਪ੍ਰਸਾਰਣ VETO OTT ‘ਤੇ ਕੀਤਾ ਜਾ ਰਿਹਾ ਹੈ।