Rana Balachauria ਦੇ ਕਤਲ ਤੋਂ ਬਾਅਦ ਪਿਤਾ ਨੇ ਤੋੜੀ ਚੁੱਪੀ, ਗੈਂਗਸਟਰ ਕੁਨੈਕਸ਼ਨ ‘ਤੇ ਕੀਤਾ ਖੁਲਾਸਾ

10 months ਪਹਿਲਾ

Punjab News : ਮੋਹਾਲੀ ਵਿੱਚ ਸ਼ਰੇਆਮ ਕਤਲ ਕੀਤੇ ਗਏ ਮਸ਼ਹੂਰ ਕਬੱਡੀ ਖਿਡਾਰੀ ਰਾਣਾ ਬਲਾਚੌਰੀਆ ਦੇ ਪਿਤਾ ਕੰਵਰ ਰਾਜੀਵ ਸਿੰਘ ਨੇ ਆਪਣੀ ਚੁੱਪੀ ਤੋੜੀ ਹੈ। ਪੁੱਤ ਦੀ ਮੌਤ ਤੋਂ ਬਾਅਦ ਪਹਿਲੀ ਵਾਰ ਸਾਹਮਣੇ ਆਏ ਪਿਤਾ ਨੇ ਇੱਕ ਭਾਵੁਕ ਬਿਆਨ ਦਿੱਤਾ ਹੈ, ਜਿਸਨੇ ਹਰ ਕਿਸੇ ਦੀਆਂ ਅੱਖਾਂ ਨਮ ਕਰ ਦਿੱਤੀਆਂ ਹਨ। ਉਨ੍ਹਾਂ ਦੱਸਿਆ ਕਿ ਰਾਣਾ ਦਾ ਵਿਆਹ ਹੋਏ ਅਜੇ ਸਿਰਫ਼ 10 ਦਿਨ ਹੀ ਹੋਏ ਸਨ ਅਤੇ ਘਰ ਵਿੱਚ ਵਿਆਹ ਦੀਆਂ ਮਠਿਆਈਆਂ ਵੀ ਨਹੀਂ ਮੁੱਕੀਆਂ ਸਨ ਕਿ ਖੁਸ਼ੀਆਂ ਮਾਤਮ ਵਿੱਚ ਬਦਲ ਗਈਆਂ। ਪਿਤਾ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਦੇ ਪੁੱਤ ਦਾ ਕਿਸੇ ਵੀ ਗੈਂਗਸਟਰ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ, ਉਸਨੂੰ ਸਿਰਫ਼ ਬਦਨਾਮ ਕਰਨ ਲਈ ਨਿਸ਼ਾਨਾ ਬਣਾਇਆ ਗਿਆ।

ਗੈਂਗਸਟਰ ਸਿਰਫ਼ ਆਪਣੀ ਪਬਲੀਸਿਟੀ ਚਾਹੁੰਦੇ ਹਨ’

ਬੰਬੀਹਾ ਗੈਂਗ (Bambiha Gang) ਦੇ ਗੈਂਗਸਟਰ ਡੋਨੀ ਬੱਲ ਵੱਲੋਂ ਰਾਣਾ ‘ਤੇ ਲਾਰੈਂਸ ਬਿਸ਼ਨੋਈ ਅਤੇ ਜੱਗੂ ਭਗਵਾਨਪੁਰੀਆ ਲਈ ਕੰਮ ਕਰਨ ਦੇ ਦੋਸ਼ਾਂ ਨੂੰ ਪਿਤਾ ਨੇ ਸਿਰੇ ਤੋਂ ਖਾਰਜ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਇਹ ਸਭ ਝੂਠ ਹੈ ਅਤੇ ਗੈਂਗਸਟਰ ਸਿਰਫ਼ ਆਪਣਾ ਨਾਮ ਚਮਕਾਉਣ ਲਈ ਰਾਣਾ ਦਾ ਨਾਮ ਸਿੱਧੂ ਮੂਸੇਵਾਲਾ ਕਤਲਕਾਂਡ (Sidhu Moosewala Murder Case) ਨਾਲ ਜੋੜ ਰਹੇ ਹਨ।

Bangladesh Violence : ਪੱਤਰਕਾਰਾਂ ਨੂੰ ਜਿਊਂਦਾ ਸਾੜਨ ਦੀ ਕੋਸ਼ਿਸ਼, ਵੇਖੋ ਰੌਂਗਟੇ ਖੜੇ ਕਰਨ ਵਾਲੇ ਮੰਜਰ

ਐਸ.ਐਸ.ਪੀ. ਮੋਹਾਲੀ ਵੀ ਸਾਫ਼ ਕਰ ਚੁੱਕੇ ਹਨ ਕਿ ਰਾਣਾ ਕਿਸੇ ਗਲਤ ਗਤੀਵਿਧੀ ਵਿੱਚ ਸ਼ਾਮਲ ਨਹੀਂ ਸੀ। ਪਿਤਾ ਨੇ ਕਿਹਾ, “ਜੇਕਰ ਉਹ ਗਲਤ ਹੁੰਦਾ ਤਾਂ ਪੁਲਿਸ ਪ੍ਰੋਟੈਕਸ਼ਨ ਮੰਗਦਾ ਜਾਂ ਹਥਿਆਰਬੰਦ ਲੋਕ ਨਾਲ ਰੱਖਦਾ, ਪਰ ਉਹ ਤਾਂ ਨਿਡਰ ਹੋ ਕੇ ਇਕੱਲਾ ਘੁੰਮਦਾ ਸੀ।”

ਉਹ ਆਖਰੀ ਮੁਲਾਕਾਤ ਅਤੇ ਪਰਿਵਾਰ ਦਾ ਦਰਦ

ਉਸ ਕਾਲੀ ਰਾਤ ਦਾ ਜ਼ਿਕਰ ਕਰਦੇ ਹੋਏ ਕੰਵਰ ਰਾਜੀਵ ਸਿੰਘ ਨੇ ਦੱਸਿਆ ਕਿ ਰਾਣਾ ਬਾਹਰ ਦਾ ਖਾਣਾ ਪਸੰਦ ਨਹੀਂ ਕਰਦਾ ਸੀ, ਪਰ ਉਸ ਦਿਨ ਉਹ ਪੂਰੇ ਪਰਿਵਾਰ ਨੂੰ ਨਵਾਂਸ਼ਹਿਰ ਵਿੱਚ ਖਾਣਾ ਖੁਆ ਕੇ ਲਿਆਇਆ ਸੀ, ਕਿਉਂਕਿ ਉਸਦੀ ਭੈਣ ਨੇ ਵਿਦੇਸ਼ ਜਾਣਾ ਸੀ। ਮੋਹਾਲੀ ਨਿਕਲਣ ਤੋਂ ਪਹਿਲਾਂ ਉਹ ਆਪਣੀ ਮਾਂ, ਪਤਨੀ, ਭੈਣ ਅਤੇ ਪਿਤਾ ਨੂੰ ਮਿਲ ਕੇ ਗਿਆ ਸੀ। ਕਿਸੇ ਨੂੰ ਅੰਦਾਜ਼ਾ ਨਹੀਂ ਸੀ ਕਿ ਇਹ ਉਨ੍ਹਾਂ ਦੀ ਆਖਰੀ ਮੁਲਾਕਾਤ ਹੋਵੇਗੀ। ਪਿਤਾ ਨੇ ਦੱਸਿਆ ਕਿ ਰਾਣਾ ਨੂੰ ਸੈਲਫੀ ਲੈਣ ਦੇ ਬਹਾਨੇ ਰੋਕਿਆ ਗਿਆ ਅਤੇ ਫਿਰ ਧੋਖੇ ਨਾਲ ਸਿਰ ਵਿੱਚ ਗੋਲੀ ਮਾਰ ਦਿੱਤੀ ਗਈ।

ਖਿਡਾਰੀਆਂ ਵਿੱਚ ਖੌਫ ਦਾ ਮਾਹੌਲ

ਇਸ ਘਟਨਾ ਤੋਂ ਬਾਅਦ ਕਬੱਡੀ ਜਗਤ ਵਿੱਚ ਡਰ ਦਾ ਮਾਹੌਲ ਹੈ। ਪਿਤਾ ਨੇ ਕਿਹਾ ਕਿ ਸੰਦੀਪ ਨੰਗਲ ਅੰਬੀਆਂ ਤੋਂ ਬਾਅਦ ਹੁਣ ਰਾਣਾ ਦੇ ਕਤਲ ਨੇ ਖਿਡਾਰੀਆਂ ਦਾ ਮਨੋਬਲ ਤੋੜ ਦਿੱਤਾ ਹੈ। ਲੋਕ ਹੁਣ ਗਰਾਊਂਡ ਵਿੱਚ ਜਾਣ ਤੋਂ ਡਰਨ ਲੱਗੇ ਹਨ ਕਿ ਇਨਾਮ ਦੀ ਜਗ੍ਹਾ ਕਿਤੇ ਗੋਲੀ ਨਾ ਮਿਲ ਜਾਵੇ। ਫਿਲਹਾਲ, ਪੁਲਿਸ ਨੇ ਕਾਰਵਾਈ ਕਰਦੇ ਹੋਏ ਇੱਕ ਮੁਲਜ਼ਮ ਦਾ ਐਨਕਾਊਂਟਰ ਕਰ ਦਿੱਤਾ ਹੈ ਅਤੇ ਬਾਕੀਆਂ ਦੀ ਭਾਲ ਜਾਰੀ ਹੈ। ਪਰਿਵਾਰ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਦੋਸ਼ੀਆਂ ਖਿਲਾਫ਼ ਸਖ਼ਤ ਤੋਂ ਸਖ਼ਤ ਐਕਸ਼ਨ ਲਿਆ ਜਾਵੇ ਤਾਂ ਜੋ ਕਿਸੇ ਹੋਰ ਦਾ ਘਰ ਨਾ ਉਜੜੇ।