Nayi Naveli: ਦੁਸਹਿਰਾ 2026 ’ਤੇ ਸਿਨੇਮਾਘਰਾਂ ਵਿੱਚ ਦਰਸ਼ਕਾਂ ਨੂੰ ਫੈਂਟੇਸੀ, ਕਾਮੇਡੀ ਅਤੇ ਪਰਿਵਾਰਕ ਮਨੋਰੰਜਨ ਦਾ ਨਵਾਂ ਤਜਰਬਾ ਮਿਲਣ ਵਾਲਾ ਹੈ। Amazon MGM Studios ਅਤੇ Colour Yellow ਨੇ ਆਪਣੀ ਆਉਣ ਵਾਲੀ ਫਿਲਮ ‘ਨਈ ਨਵੇਲੀ’ ਦਾ ਐਲਾਨ ਕੀਤਾ ਹੈ। ਫਿਲਮ ਵਿੱਚ ਯਾਮੀ ਗੌਤਮ ਧਰ ਮੁੱਖ ਭੂਮਿਕਾ ਨਿਭਾਉਣਗੇ। ਪਰਿਵਾਰ, ਰੋਮਾਂਚ, ਹਾਸੇ ਅਤੇ ਫੈਂਟੇਸੀ ਦੇ ਸੁਮੇਲ ਨਾਲ ਤਿਆਰ ਇਸ ਫਿਲਮ ਨੂੰ 16 ਅਕਤੂਬਰ 2026 ਨੂੰ ਦੇਸ਼ ਭਰ ਦੇ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਕੀਤਾ ਜਾਵੇਗਾ।

ਫਿਲਮ ਦਾ ਨਿਰਦੇਸ਼ਨ ਬਾਲਾਜੀ ਮੋਹਨ ਨੇ ਕੀਤਾ ਹੈ, ਜਦਕਿ ਇਸ ਦੀ ਕਹਾਣੀ ਹਿਮਾਂਸ਼ੂ ਸ਼ਰਮਾ ਅਤੇ ਦਿਵਿਆ ਨਿਧੀ ਸ਼ਰਮਾ ਨੇ ਲਿਖੀ ਹੈ। ਆਨੰਦ ਐਲ ਰਾਏ ਅਤੇ ਹਿਮਾਂਸ਼ੂ ਸ਼ਰਮਾ ਫਿਲਮ ਦੇ ਨਿਰਮਾਤਾ ਹਨ। ਇਸ ਦੇ ਸੰਗੀਤ ਦੀ ਜ਼ਿੰਮੇਵਾਰੀ ਸੰਗੀਤਕਾਰ ਜੀ. ਵੀ. ਪ੍ਰਕਾਸ਼ ਕੁਮਾਰ ਨੂੰ ਸੌਂਪੀ ਗਈ ਹੈ। ਮੇਕਰਜ਼ ਮੁਤਾਬਕ, ਫਿਲਮ ਦੀ ਕਹਾਣੀ ਦਰਸ਼ਕਾਂ ਨੂੰ ਇੱਕ ਅਨੋਖੀ ਦੁਨੀਆ ਵਿੱਚ ਲੈ ਜਾਵੇਗੀ, ਜਿੱਥੇ ਪਰਿਵਾਰਕ ਰਿਸ਼ਤਿਆਂ ਦੇ ਨਾਲ ਰਹੱਸ ਅਤੇ ਹਾਸਾ ਵੀ ਦੇਖਣ ਨੂੰ ਮਿਲੇਗਾ।

‘ਨਈ ਨਵੇਲੀ’ ਦੀ ਕਹਾਣੀ ਮੇਰਠ ਦੇ ਇੱਕ ਅਜੀਬੋ-ਗਰੀਬ ਪਰਿਵਾਰ ਵਿੱਚ ਨਵੀਂ ਦੁਲਹਨ ਦੀ ਐਂਟਰੀ ਨਾਲ ਸ਼ੁਰੂ ਹੁੰਦੀ ਹੈ। ਸ਼ੁਰੂ ਵਿੱਚ ਉਹ ਇੱਕ ਆਦਰਸ਼ ਨੂੰਹ ਵਜੋਂ ਨਜ਼ਰ ਆਉਂਦੀ ਹੈ ਅਤੇ ਉਸ ਦੇ ਆਉਣ ਨਾਲ ਘਰ ਦਾ ਮਾਹੌਲ ਖੁਸ਼ਨੁਮਾ ਹੋ ਜਾਂਦਾ ਹੈ। ਪਰਿਵਾਰ ਦੇ ਮੈਂਬਰਾਂ ਨੂੰ ਲੱਗਦਾ ਹੈ ਕਿ ਉਸ ਦੀ ਮੌਜੂਦਗੀ ਨਾਲ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਖੁਸ਼ੀਆਂ ਮੁੜ ਆ ਗਈਆਂ ਹਨ। ਪਰ ਇਹ ਸਭ ਕੁਝ ਜ਼ਿਆਦਾ ਸਮੇਂ ਤੱਕ ਆਮ ਨਹੀਂ ਰਹਿੰਦਾ ਅਤੇ ਕਹਾਣੀ ਵਿੱਚ ਇੱਕ ਰਹੱਸਮਈ ਮੋੜ ਆ ਜਾਂਦਾ ਹੈ।

ਦੁਲਹਨ ਦੇ ਵਿਹਾਰ ਨੂੰ ਲੈ ਕੇ ਉਸ ਦਾ ਦਿਓਰ ਸ਼ੱਕ ਕਰਨ ਲੱਗ ਪੈਂਦਾ ਹੈ। ਉਸ ਨੂੰ ਲੱਗਣ ਲੱਗਦਾ ਹੈ ਕਿ ਉਸ ਦੀ ਭਾਬੀ ਜਿੰਨੀ ਸਿੱਧੀ-ਸਾਦੀ ਅਤੇ ਪਰਫੈਕਟ ਦਿਖਾਈ ਦਿੰਦੀ ਹੈ, ਸ਼ਾਇਦ ਅਸਲ ਵਿੱਚ ਉਹੋ ਜਿਹੀ ਨਹੀਂ ਹੈ। ਹੌਲੀ-ਹੌਲੀ ਉਸ ਦੇ ਮਨ ਵਿੱਚ ਸਵਾਲ ਉੱਠਦਾ ਹੈ ਕਿ ਕਿਤੇ ਉਸ ਦੀ ਭਾਬੀ ਡਾਇਣ ਤਾਂ ਨਹੀਂ? ਇਹੀ ਸ਼ੱਕ ਕਹਾਣੀ ਨੂੰ ਫੈਂਟੇਸੀ ਅਤੇ ਕਾਮੇਡੀ ਨਾਲ ਭਰੇ ਰੋਮਾਂਚਕ ਸਫ਼ਰ ਵੱਲ ਲੈ ਜਾਂਦਾ ਹੈ। ਫਿਲਮ ਵਿੱਚ ਦਰਸ਼ਕਾਂ ਨੂੰ ਇਸ ਰਹੱਸ ਅਤੇ ਪਰਿਵਾਰ ਨਾਲ ਵਾਪਰਨ ਵਾਲੀਆਂ ਘਟਨਾਵਾਂ ਦੇ ਜਵਾਬ ਮਿਲਣਗੇ।

ਯਾਮੀ ਗੌਤਮ ਧਰ ਇਸ ਫਿਲਮ ਵਿੱਚ ਆਪਣੇ ਹੁਣ ਤੱਕ ਦੇ ਕਿਰਦਾਰਾਂ ਤੋਂ ਵੱਖਰੇ ਅੰਦਾਜ਼ ਵਿੱਚ ਨਜ਼ਰ ਆਉਣਗੇ। ਉਨ੍ਹਾਂ ਦੇ ਕਿਰਦਾਰ ਵਿੱਚ ਮਾਸੂਮੀਅਤ, ਗਰਮਜੋਸ਼ੀ ਅਤੇ ਸ਼ਰਾਰਤ ਦਾ ਮਿਲਾਪ ਦੇਖਣ ਨੂੰ ਮਿਲੇਗਾ। Amazon MGM Studios ਦੇ ਨਿਰਦੇਸ਼ਕ ਅਤੇ Prime Video India ਅਤੇ Amazon MGM Studios ਦੇ SVOD Originals ਮੁਖੀ ਨਿਖਿਲ ਮਧੋਕ ਨੇ ਕਿਹਾ ਕਿ ਫਿਲਮ ਪੂਰੀ ਹੋਣ ਤੋਂ ਬਾਅਦ ਟੀਮ ਨੂੰ ਲੱਗਿਆ ਕਿ ਇਹ ਦੁਸਹਿਰੇ ’ਤੇ ਦਰਸ਼ਕਾਂ ਲਈ ਢੁਕਵਾਂ ਮਨੋਰੰਜਨ ਸਾਬਤ ਹੋ ਸਕਦੀ ਹੈ। ਉਨ੍ਹਾਂ ਨੇ ਯਾਮੀ ਅਤੇ ਫਿਲਮ ਦੀ ਪੂਰੀ ਸਟਾਰਕਾਸਟ ਦੇ ਕੰਮ ਦੀ ਵੀ ਸ਼ਲਾਘਾ ਕੀਤੀ।

ਨਿਰਮਾਤਾ ਆਨੰਦ ਐਲ ਰਾਏ ਮੁਤਾਬਕ, ‘ਨਈ ਨਵੇਲੀ’ ਦੀ ਕਹਾਣੀ ਦਰਸ਼ਕਾਂ ਨੂੰ ਵੱਖ-ਵੱਖ ਮੋੜਾਂ ’ਤੇ ਹੈਰਾਨ ਕਰੇਗੀ। ਉਨ੍ਹਾਂ ਦੱਸਿਆ ਕਿ ਹਿਮਾਂਸ਼ੂ ਸ਼ਰਮਾ ਨਾਲ ਕਹਾਣੀ ਬਾਰੇ ਸ਼ੁਰੂਆਤੀ ਗੱਲਬਾਤ ਦੌਰਾਨ ਹੀ ਉਨ੍ਹਾਂ ਨੂੰ ਇਸ ਦੀ ਅਨੋਖੀ ਦੁਨੀਆ ਪਸੰਦ ਆ ਗਈ ਸੀ। ਫਿਲਮ ਵਿੱਚ ਪਰਿਵਾਰਕ ਰਿਸ਼ਤਿਆਂ ਦੇ ਨਾਲ ਫੈਂਟੇਸੀ, ਹਾਸੇ ਅਤੇ ਰੋਮਾਂਚ ਨੂੰ ਜੋੜਿਆ ਗਿਆ ਹੈ। ਦੁਸਹਿਰੇ ਦੇ ਮੌਕੇ ’ਤੇ ਰਿਲੀਜ਼ ਹੋਣ ਜਾ ਰਹੀ ਇਸ ਫਿਲਮ ਵਿੱਚ ਨਵੀਂ ਦੁਲਹਨ, ਮੇਰਠ ਦਾ ਅਨੋਖਾ ਪਰਿਵਾਰ ਅਤੇ ਉਸ ਦੇ ਡਾਇਣ ਹੋਣ ਦਾ ਸ਼ੱਕ ਦਰਸ਼ਕਾਂ ਲਈ ਮਨੋਰੰਜਨ ਦਾ ਨਵਾਂ ਪੈਕੇਜ ਪੇਸ਼ ਕਰਨਗੇ।