Gen Z Protest Germany: ਜਰਮਨੀ ਵਿੱਚ Gen Z ਦਾ ਸਰਕਾਰ ਖ਼ਿਲਾਫ਼ ਵੱਡਾ ਪ੍ਰਦਰਸ਼ਨ, 34 ਸ਼ਹਿਰਾਂ ਵਿੱਚ 1.60 ਲੱਖ ਲੋਕਾਂ ਦੇ ਇਕੱਠੇ ਹੋਣ ਦੀ ਉਮੀਦ

31 October 2026 ਅੱਪਡੇਟ ਕੀਤਾ ਗਿਆ

Gen Z Protest Germany: ਜਰਮਨੀ ਵਿੱਚ ਸ਼ਨੀਵਾਰ ਨੂੰ 1.60 ਲੱਖ ਤੋਂ ਵੱਧ ਲੋਕਾਂ ਦੇ ਪ੍ਰਦਰਸ਼ਨਾਂ ਵਿੱਚ ਸ਼ਾਮਲ ਹੋਣ ਦੀ ਉਮੀਦ ਹੈ। ਯੂਰਪ ਦੇ ਹੋਰਨਾਂ ਦੇਸ਼ਾਂ ਵਿੱਚ ਹੋਏ ਵਿਰੋਧ ਪ੍ਰਦਰਸ਼ਨਾਂ ਤੋਂ ਪ੍ਰੇਰਿਤ ਹੋ ਕੇ ਨੌਜਵਾਨਾਂ ਦੀ ਅਗਵਾਈ ਵਾਲਾ ਇਹ ਅੰਦੋਲਨ ਬਿਹਤਰ ਸਿੱਖਿਆ ਅਤੇ ਰਹਿਣ-ਸਹਿਣ ਦੇ ਵਧਦੇ ਖਰਚਿਆਂ ਨੂੰ ਘਟਾਉਣ ਦੀ ਮੰਗ ਕਰ ਰਿਹਾ ਹੈ। ਸਥਾਨਕ ਮੀਡੀਆ ਰਿਪੋਰਟਾਂ ਮੁਤਾਬਕ, ਇਹ ਪ੍ਰਦਰਸ਼ਨ ਜਰਮਨੀ ਦੇ ਕਈ ਸ਼ਹਿਰਾਂ ਵਿੱਚ ਕਰਵਾਏ ਜਾਣਗੇ।

ਇਹ ਵਿਰੋਧ ਪ੍ਰਦਰਸ਼ਨ ਇਸ ਸਾਲ ਪੂਰੇ ਯੂਰਪ ਵਿੱਚ ਜਨਰੇਸ਼ਨ Z (Gen Z) ਦੀ ਅਗਵਾਈ ਹੇਠ ਹੋਏ ਅੰਦੋਲਨਾਂ ਦੀ ਲੜੀ ਦਾ ਹਿੱਸਾ ਹਨ। ਸਰਬੀਆ ਵਿੱਚ ਵਿਦਿਆਰਥੀਆਂ ਦੀ ਅਗਵਾਈ ਵਾਲੇ ਅੰਦੋਲਨ ਨੇ ਚੋਣਾਂ ਰਾਹੀਂ ਲੰਬੇ ਸਮੇਂ ਤੋਂ ਸੱਤਾ ਵਿੱਚ ਰਹੇ ਆਗੂ ਨੂੰ ਹਟਾਉਣ ਵਿੱਚ ਭੂਮਿਕਾ ਨਿਭਾਈ ਸੀ। ਉੱਥੇ ਹੀ ਫਰਾਂਸ ਵਿੱਚ ਨੌਜਵਾਨਾਂ ਦੇ ਪ੍ਰਦਰਸ਼ਨਾਂ ਨੇ ਹਿੰਸਕ ਰੂਪ ਧਾਰਨ ਕਰ ਲਿਆ ਸੀ, ਜਿਸ ਦੌਰਾਨ ਦੰਗੇ ਅਤੇ ਲੁੱਟਮਾਰ ਦੀਆਂ ਘਟਨਾਵਾਂ ਵੀ ਸਾਹਮਣੇ ਆਈਆਂ ਸਨ।

34 ਸ਼ਹਿਰਾਂ ਵਿੱਚ ਹੋਣਗੇ ਪ੍ਰਦਰਸ਼ਨ

‘ਦ ਲੋਕਲ ਡੀਈ’ ਦੀ ਰਿਪੋਰਟ ਮੁਤਾਬਕ, ਜਰਮਨੀ ਵਿੱਚ ਇਹ ਅੰਦੋਲਨ ‘Gen Z Regelt’ ਨਾਮਕ ਮੁਹਿੰਮ ਸਮੂਹ ਵੱਲੋਂ ਚਲਾਇਆ ਜਾ ਰਿਹਾ ਹੈ। ਇਸ ਦਾ ਅਰਥ ਹੈ ਕਿ ਜਨਰੇਸ਼ਨ Z ਹੁਣ ਖੁਦ ਕਮਾਨ ਸੰਭਾਲ ਰਹੀ ਹੈ। ਬਰਲਿਨ, ਫਰੈਂਕਫਰਟ ਅਤੇ ਮਿਊਨਿਖ ਸਮੇਤ ਦੇਸ਼ ਦੇ 34 ਸ਼ਹਿਰਾਂ ਵਿੱਚ ਪ੍ਰਦਰਸ਼ਨ ਹੋਣੇ ਹਨ। ਪ੍ਰਦਰਸ਼ਨਕਾਰੀ ਲਾਜ਼ਮੀ ਫੌਜੀ ਸੇਵਾ ਦਾ ਵਿਰੋਧ ਕਰ ਰਹੇ ਹਨ ਅਤੇ ਸਿੱਖਿਆ ਖੇਤਰ ਵਿੱਚ ਵਧੇਰੇ ਨਿਵੇਸ਼ ਦੀ ਮੰਗ ਕਰ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਵਧਦੀ ਮਹਿੰਗਾਈ ਅਤੇ ਰਹਿਣ-ਸਹਿਣ ਦੇ ਖਰਚਿਆਂ ਕਾਰਨ ਨੌਜਵਾਨਾਂ ਨੂੰ ਕਾਫ਼ੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਕੱਟੜਪੰਥੀ ਗਰੁੱਪਾਂ ਦੀ ਸਰਗਰਮੀ ਬਾਰੇ ਚਿਤਾਵਨੀ

ਜਰਮਨ ਅਧਿਕਾਰੀਆਂ ਦਾ ਅਨੁਮਾਨ ਹੈ ਕਿ ਹੈਲੋਵੀਨ ਤਿਉਹਾਰ ਦੌਰਾਨ ਹੋਣ ਵਾਲੇ ਇਹ ਪ੍ਰਦਰਸ਼ਨ ਜ਼ਿਆਦਾਤਰ ਸ਼ਾਂਤੀਪੂਰਨ ਰਹਿਣਗੇ। ਹਾਲਾਂਕਿ, ਉਨ੍ਹਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਕੁਝ ਕੱਟੜਪੰਥੀ ਸੰਗਠਨ ਇਸ ਅੰਦੋਲਨ ਦਾ ਫਾਇਦਾ ਚੁੱਕਣ ਦੀ ਕੋਸ਼ਿਸ਼ ਕਰ ਸਕਦੇ ਹਨ। ਡੀਪੀਏ ਨਿਊਜ਼ ਏਜੰਸੀ ਮੁਤਾਬਕ, ਸੰਘੀ ਗ੍ਰਹਿ ਮੰਤਰਾਲੇ ਨੇ ਦੱਸਿਆ ਹੈ ਕਿ ਜਰਮਨੀ ਦੇ ਅਤਿ-ਖੱਬੇਪੱਖੀ ਕੱਟੜਪੰਥੀ ਗਰੁੱਪਾਂ ਅਤੇ ਵਿਦੇਸ਼ੀ ਕੱਟੜਪੰਥੀ ਅੰਦੋਲਨਾਂ ਨਾਲ ਜੁੜੇ ਕੁਝ ਸੰਗਠਨਾਂ ਨੇ ਇਸ ਮੁਹਿੰਮ ਨੂੰ ਸਮਰਥਨ ਦੇਣ ਦੀ ਕੋਸ਼ਿਸ਼ ਕੀਤੀ ਹੈ।

ਫਰਾਂਸ ਵਰਗੇ ਹਾਲਾਤ ਬਣਨ ਦਾ ਡਰ

ਹੇਸੇ ਸੂਬੇ ਦੇ ਗ੍ਰਹਿ ਮੰਤਰੀ ਰੋਮਨ ਪੋਸੇਕ ਨੇ ਫਰਾਂਸ ਵਿੱਚ ਹੋਈ ਹਿੰਸਾ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਉੱਥੇ ਲੁੱਟਮਾਰ, ਘਰਾਂ ਨੂੰ ਅੱਗ ਲਾਉਣ, ਪੁਲਿਸ ਵਾਹਨਾਂ ਨੂੰ ਸਾੜਨ ਅਤੇ ਅਧਿਕਾਰੀਆਂ ‘ਤੇ ਹਮਲਿਆਂ ਦੀਆਂ ਤਸਵੀਰਾਂ ਸਭ ਦੇ ਮਨਾਂ ਵਿੱਚ ਹਨ। ਉਨ੍ਹਾਂ ਕਿਹਾ ਕਿ ਫਰਾਂਸ ਨੂੰ ਇਸ ਮਾਮਲੇ ਵਿੱਚ ਇੱਕ ਮਿਸਾਲ ਵਜੋਂ ਪੇਸ਼ ਨਹੀਂ ਕੀਤਾ ਜਾਣਾ ਚਾਹੀਦਾ। ਇਸ ਦੌਰਾਨ ਬਰਲਿਨ ਦੇ ਮਸ਼ਹੂਰ ਸ਼ਾਪਿੰਗ ਇਲਾਕੇ ‘ਕੁਰਫੁਰਸਟੈਂਡਮ’ ਵਿੱਚ ਕੁਝ ਦੁਕਾਨਦਾਰਾਂ ਨੇ ਸੰਭਾਵਿਤ ਹੰਗਾਮੇ ਦੇ ਖ਼ਦਸ਼ੇ ਕਾਰਨ ਆਪਣੀਆਂ ਦੁਕਾਨਾਂ ਦੀਆਂ ਖਿੜਕੀਆਂ ਲੱਕੜ ਦੇ ਤਖ਼ਤਿਆਂ ਨਾਲ ਢੱਕ ਦਿੱਤੀਆਂ ਹਨ ਅਤੇ ਪ੍ਰਦਰਸ਼ਨਾਂ ਵਾਲੇ ਦਿਨ ਜਲਦੀ ਦੁਕਾਨਾਂ ਬੰਦ ਕਰਨ ਦੀ ਯੋਜਨਾ ਬਣਾਈ ਹੈ।

ਸਰਕਾਰ ਸਾਡੀਆਂ ਚਿੰਤਾਵਾਂ ਦਾ ਜਵਾਬ ਨਹੀਂ ਦੇ ਰਹੀ: ਨੌਜਵਾਨ

ਮਿਊਨਿਖ ਵਿੱਚ ਇੱਕ ਰੈਲੀ ਦੌਰਾਨ 18 ਸਾਲਾ ਸਟੀਵ ਨੇ ਚਾਂਸਲਰ ਫ੍ਰੈਡਰਿਕ ਮਰਜ਼ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਸਰਕਾਰ ਨੌਜਵਾਨਾਂ ਦੀਆਂ ਸਮੱਸਿਆਵਾਂ ਦਾ ਹੱਲ ਕਰਨ ਦੀ ਬਜਾਏ ਬਜਟ ਵਿੱਚ ਕਟੌਤੀ ਕਰ ਰਹੀ ਹੈ ਅਤੇ ਉਨ੍ਹਾਂ ‘ਤੇ ਹੋਰ ਬੋਝ ਪਾ ਰਹੀ ਹੈ। ਇਸੇ ਦੌਰਾਨ ਜਰਮਨੀ ਦੇ ਸਕੂਲੀ ਵਿਦਿਆਰਥੀਆਂ ਦੇ ਮੁੱਖ ਸੰਗਠਨ BSK ਨੇ ਆਪਣੇ ਆਪ ਨੂੰ ‘Gen Z Regelt’ ਮੁਹਿੰਮ ਤੋਂ ਵੱਖ ਕਰ ਲਿਆ ਹੈ। ਸੰਗਠਨ ਨੇ 20 ਨਵੰਬਰ ਨੂੰ ਆਪਣਾ ਵੱਖਰਾ ਪ੍ਰਦਰਸ਼ਨ ਕਰਨ ਦੀ ਯੋਜਨਾ ਬਣਾਈ ਹੈ।

ਵਿਦਿਆਰਥੀਆਂ ਦੀਆਂ ਮੰਗਾਂ ਜਾਇਜ਼ ਹਨ: BSK

BSK ਦੀ ਜਨਰਲ ਸਕੱਤਰ ਐਮੀ ਕਿਰਚਹੌਫ ਨੇ ਵੀਰਵਾਰ ਨੂੰ ਕਿਹਾ ਕਿ ਉਨ੍ਹਾਂ ਦਾ ਸੰਗਠਨ ‘Gen Z Regelt’ ਤੋਂ ਦੂਰੀ ਬਣਾ ਰਿਹਾ ਹੈ, ਪਰ ਇਸ ਦਾ ਮਤਲਬ ਇਹ ਨਹੀਂ ਕਿ ਉਹ ਵਿਦਿਆਰਥੀਆਂ ਦੀਆਂ ਚਿੰਤਾਵਾਂ ਨੂੰ ਗਲਤ ਮੰਨਦਾ ਹੈ। ਉਨ੍ਹਾਂ ਮੁਤਾਬਕ, ਵਿਦਿਆਰਥੀਆਂ ਦੀਆਂ ਮੰਗਾਂ ਜਾਇਜ਼ ਹਨ। ਦੂਜੇ ਪਾਸੇ, ਬਰਲਿਨ ਦੀ ਟੈਕਨੀਕਲ ਯੂਨੀਵਰਸਿਟੀ ਦੇ ਵਿਦਿਆਰਥੀ ਸ਼ੌਨ ਬੇਕਰ ਨੇ ਕਿਹਾ ਕਿ ਉਹ ਕੈਂਪਸ ਦੀਆਂ ਖ਼ਰਾਬ ਇਮਾਰਤਾਂ ਦੀ ਹਾਲਤ ਵੱਲ ਧਿਆਨ ਖਿੱਚਣ ਲਈ ਪ੍ਰਦਰਸ਼ਨ ਵਿੱਚ ਸ਼ਾਮਲ ਹੋਣਗੇ। ਉਨ੍ਹਾਂ ਨੇ ਰਾਇਟਰਜ਼ ਨੂੰ ਦੱਸਿਆ ਕਿ ਕਲਾਸਰੂਮਾਂ ਦੀ ਹਾਲਤ ਅਜਿਹੀ ਹੈ ਜਿਵੇਂ ਕੋਈ ਸੁੰਨਸਾਨ ਇਮਾਰਤ ਹੋਵੇ, ਫਿਰ ਵੀ ਵਿਦਿਆਰਥੀਆਂ ਤੋਂ ਉੱਥੇ ਨਿਯਮਿਤ ਪੜ੍ਹਾਈ ਕਰਨ ਦੀ ਉਮੀਦ ਕੀਤੀ ਜਾਂਦੀ ਹੈ।