ਹਰੀਕੇ ਝੀਲ ’ਤੇ ਪ੍ਰਵਾਸੀ ਪੰਛੀਆਂ ਦੀ ਆਮਦ ਨਾਲ ਵਧੀ ਰੌਣਕ, ਸੈਲਾਨੀਆਂ ਦਾ ਉਮੜਿਆ ਸੈਲਾਬ

29 December 2025 ਅੱਪਡੇਟ ਕੀਤਾ ਗਿਆ

ਪੰਜਾਬ ਦੀ ਮਸ਼ਹੂਰ ਹਰੀਕੇ ਵੈੱਟਲੈਂਡ ਵਿੱਚ ਸਰਦੀਆਂ ਦੀ ਆਮਦ ਨਾਲ ਹੀ ਪ੍ਰਵਾਸੀ ਪੰਛੀਆਂ ਦੀ ਚਹਿਚਹਾਟ ਗੂੰਜਣ ਲੱਗ ਪਈ ਹੈ। ਯੂਰਪੀਅਨ ਅਤੇ ਸਾਈਬੇਰੀਅਨ ਦੇਸ਼ਾਂ ਵਿੱਚ ਪੈ ਰਹੀ ਕੜਾਕੇ ਦੀ ਠੰਢ ਤੋਂ ਬਚਣ ਲਈ ਹਜ਼ਾਰਾਂ ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਕੇ ਰੰਗ-ਬਿਰੰਗੇ ਪ੍ਰਵਾਸੀ ਪੰਛੀ ਹਰੀਕੇ ਝੀਲ ’ਤੇ ਪਹੁੰਚ ਰਹੇ ਹਨ। ਇਨ੍ਹਾਂ ਪੰਛੀਆਂ ਦੀ ਆਮਦ ਨਾਲ ਝੀਲ ਦੀ ਸੁੰਦਰਤਾ ਹੋਰ ਨਿਖਰ ਗਈ ਹੈ ਅਤੇ ਵੱਡੀ ਗਿਣਤੀ ਵਿੱਚ ਸੈਲਾਨੀ ਇਸ ਮਨਮੋਹਕ ਨਜ਼ਾਰੇ ਨੂੰ ਦੇਖਣ ਲਈ ਇੱਥੇ ਪਹੁੰਚ ਰਹੇ ਹਨ।

ਵਿਦੇਸ਼ੀ ਮਹਿਮਾਨਾਂ ਦੀ ਚਹਲ-ਪਹਲ
ਹਰੀਕੇ ਵੈੱਟਲੈਂਡ ਵਿੱਚ ਪ੍ਰਵਾਸੀ ਪੰਛੀ ਆਮ ਤੌਰ ’ਤੇ ਨਵੰਬਰ ਮਹੀਨੇ ਆਉਣ ਸ਼ੁਰੂ ਹੋ ਜਾਂਦੇ ਹਨ ਅਤੇ ਮਾਰਚ ਤੱਕ ਇੱਥੇ ਡੇਰਾ ਲਗਾਏ ਰੱਖਦੇ ਹਨ। ਇਸ ਦੌਰਾਨ ਝੀਲ ਵਿੱਚ ਕਈ ਦੁਰਲੱਭ ਕਿਸਮਾਂ ਦੇ ਪੰਛੀ ਦੇਖਣ ਨੂੰ ਮਿਲ ਰਹੇ ਹਨ। ਇਨ੍ਹਾਂ ਵਿੱਚ ਸਾਈਬੇਰੀਅਨ ਗਲਜ਼, ਰੂਡੀ ਸ਼ੈਲਡੱਕ, ਸ਼ਾਵਲਰ, ਕੋਮਨ ਪੋਚਡ, ਕੂਟ, ਸੈਂਡ ਪਾਈਪਰ, ਗ੍ਰੇ-ਲੈਗ-ਗੀਜ਼, ਸਪੂਨ ਬਿਲਜ਼ ਅਤੇ ਪੇਂਟਿਡ ਸਟੋਰਕ ਵਰਗੇ ਪੰਛੀ ਸ਼ਾਮਲ ਹਨ।

READ ALSO : ਸੇਵਾਮੁਕਤ IG ਅਮਰ ਸਿੰਘ ਚਾਹਲ ਨਾਲ ਸਾਈਬਰ ਠੱਗੀ ਮਾਮਲਾ: ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇ ਦੀ ਮਨਜ਼ੂਰੀ

ਵਿਦਵਾਨਾਂ ਮੁਤਾਬਕ, ਹਰੀਕੇ ਵੈੱਟਲੈਂਡ ਵਿੱਚ ਲਗਭਗ 300 ਕਿਸਮਾਂ ਦੇ ਪ੍ਰਵਾਸੀ ਪੰਛੀ ਆਉਂਦੇ ਹਨ, ਜਦਕਿ ਦੇਸੀ ਅਤੇ ਵਿਦੇਸ਼ੀ ਪੰਛੀਆਂ ਨੂੰ ਮਿਲਾ ਕੇ ਇੱਥੇ ਕਰੀਬ 360 ਕਿਸਮਾਂ ਦੇ ਪੰਛੀ ਵੇਖੇ ਜਾ ਸਕਦੇ ਹਨ। ਇਹ ਹਰੀਕੇ ਨੂੰ ਪੰਛੀ ਪ੍ਰੇਮੀਆਂ ਲਈ ਇੱਕ ਵਿਲੱਖਣ ਕੇਂਦਰ ਬਣਾਉਂਦਾ ਹੈ।

ਸੈਲਾਨੀਆਂ ਲਈ ਆਕਰਸ਼ਣ ਦਾ ਕੇਂਦਰ
ਪੰਛੀਆਂ ਦੀਆਂ ਡਾਰਾਂ, ਉਨ੍ਹਾਂ ਦੀ ਉਡਾਣ ਅਤੇ ਚਹਿਚਹਾਟ ਸੈਲਾਨੀਆਂ ਲਈ ਖ਼ਾਸ ਆਕਰਸ਼ਣ ਬਣੀ ਹੋਈ ਹੈ। ਇੱਥੇ ਪਹੁੰਚੇ ਸੈਲਾਨੀਆਂ ਦਾ ਕਹਿਣਾ ਹੈ ਕਿ ਇਹ ਨਜ਼ਾਰਾ ਮਨ ਨੂੰ ਸ਼ਾਂਤੀ ਅਤੇ ਸਕੂਨ ਪ੍ਰਦਾਨ ਕਰਦਾ ਹੈ। ਵੱਡੀ ਗਿਣਤੀ ਵਿੱਚ ਲੋਕਾਂ ਦੀ ਆਮਦ ਕਾਰਨ ਹਰੀਕੇ ਝੀਲ ’ਤੇ ਮੇਲੇ ਵਰਗਾ ਮਾਹੌਲ ਬਣਿਆ ਹੋਇਆ ਹੈ।

ਪ੍ਰਸ਼ਾਸਨ ਤੋਂ ਬਿਹਤਰ ਸਹੂਲਤਾਂ ਦੀ ਮੰਗ
ਭਾਵੇਂ ਸੈਲਾਨੀ ਕੁਦਰਤੀ ਸੁੰਦਰਤਾ ਤੋਂ ਖੁਸ਼ ਨਜ਼ਰ ਆ ਰਹੇ ਹਨ, ਪਰ ਉਹ ਪ੍ਰਸ਼ਾਸਨ ਤੋਂ ਕੁਝ ਬੁਨਿਆਦੀ ਸਹੂਲਤਾਂ ਦੀ ਮੰਗ ਵੀ ਕਰ ਰਹੇ ਹਨ। ਸੈਲਾਨੀਆਂ ਦਾ ਕਹਿਣਾ ਹੈ ਕਿ ਝੀਲ ਵਿੱਚ ਬੋਟਿੰਗ ਦੀ ਵਧੀਆ ਸਹੂਲਤ ਹੋਣੀ ਚਾਹੀਦੀ ਹੈ, ਤਾਂ ਜੋ ਪੰਛੀਆਂ ਨੂੰ ਨੇੜਿਓਂ ਦੇਖਿਆ ਜਾ ਸਕੇ। ਇਸ ਤੋਂ ਇਲਾਵਾ, ਸੈਰਗਾਹਾਂ, ਬੈਠਣ ਦੀ ਢੁੱਕਵੀਂ ਥਾਂ, ਖਾਣ-ਪੀਣ ਅਤੇ ਪਖਾਨਿਆਂ ਵਰਗੀਆਂ ਸਹੂਲਤਾਂ ਦਾ ਵੀ ਪੁਖਤਾ ਪ੍ਰਬੰਧ ਕੀਤਾ ਜਾਣਾ ਚਾਹੀਦਾ ਹੈ।

ਹਰੀਕੇ ਵੈੱਟਲੈਂਡ ਪੰਜਾਬ ਦਾ ਇੱਕ ਅਨਮੋਲ ਕੁਦਰਤੀ ਖ਼ਜ਼ਾਨਾ ਹੈ। ਜੇਕਰ ਸਰਕਾਰ ਅਤੇ ਪ੍ਰਸ਼ਾਸਨ ਇੱਥੇ ਸਹੂਲਤਾਂ ਦੇ ਵਿਕਾਸ ਵੱਲ ਧਿਆਨ ਦੇਣ, ਤਾਂ ਪੰਛੀਆਂ ਦੀ ਸੁਰੱਖਿਆ ਦੇ ਨਾਲ-ਨਾਲ ਹਰੀਕੇ ਝੀਲ ਨੂੰ ਅੰਤਰਰਾਸ਼ਟਰੀ ਪੱਧਰ ’ਤੇ ਇੱਕ ਮਹੱਤਵਪੂਰਨ ਸੈਰ-ਸਪਾਟਾ ਕੇਂਦਰ ਵਜੋਂ ਵਿਕਸਿਤ ਕੀਤਾ ਜਾ ਸਕਦਾ ਹੈ।

ਸੰਘਣੀ ਧੁੰਦ ਦੀ ਚਪੇਟ ‘ਚ ਪੰਜਾਬ 4 ਡਿਗਰੀ ਡਿੱਗਿਆ ਤਾਪਮਾਨ,ਦੇਖੋ ਖ਼ਾਸ ਰਿਪੋਰਟ