Apple MacBook: ਪਹਿਲਾ ਟੱਚਸਕ੍ਰੀਨ ਮੈਕਬੁੱਕ ਅਤੇ OLED ਆਈਪੈਡ ਮਿਨੀ ਹੋਵੇਗਾ ਲਾਂਚ, ਅਕਤੂਬਰ ਵਿੱਚ ਦੋ ਵੱਡੇ ਈਵੈਂਟ; M6 ਚਿੱਪ ਅਤੇ ਸਮਾਰਟ ਹੋਮ ਪ੍ਰੋਡਕਟਸ ਵੀ ਆਉਣਗੇ

6 hours ਪਹਿਲਾ

Apple Launch: ਟੈਕਨਾਲੋਜੀ ਕੰਪਨੀ ਐਪਲ ਅਕਤੂਬਰ ਵਿੱਚ ਕਈ ਨਵੇਂ ਪ੍ਰੋਡਕਟ ਪੇਸ਼ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ, ਕੰਪਨੀ ਇਸ ਮਹੀਨੇ ਦੋ ਵੱਡੇ ਇਵੈਂਟ ਕਰ ਸਕਦੀ ਹੈ। ਪਹਿਲਾ ਇਵੈਂਟ 13 ਅਕਤੂਬਰ ਨੂੰ ਸਮਾਰਟ ਹੋਮ ਡਿਵਾਈਸਾਂ ਨਾਲ ਸਬੰਧਤ ਹੋਣ ਦੀ ਸੰਭਾਵਨਾ ਹੈ, ਜਦਕਿ ਮਹੀਨੇ ਦੇ ਆਖ਼ਰੀ ਹਫ਼ਤੇ ਨਵੇਂ MacBook Pro, iMac ਅਤੇ iPad Mini ਪੇਸ਼ ਕੀਤੇ ਜਾ ਸਕਦੇ ਹਨ। ਹਾਲਾਂਕਿ, ਕੰਪਨੀ ਵੱਲੋਂ ਅਜੇ ਤੱਕ ਇਨ੍ਹਾਂ ਇਵੈਂਟਾਂ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ।

ਰਿਪੋਰਟਾਂ ਅਨੁਸਾਰ, ਅਕਤੂਬਰ ਦੇ ਆਖ਼ਰੀ ਹਫ਼ਤੇ ਹੋਣ ਵਾਲੇ ਸੰਭਾਵਿਤ ਇਵੈਂਟ ਵਿੱਚ ਐਪਲ ਆਪਣਾ ਪਹਿਲਾ ਟੱਚਸਕ੍ਰੀਨ MacBook Pro ਲਾਂਚ ਕਰ ਸਕਦੀ ਹੈ। ਇਸ ਵਿੱਚ OLED ਡਿਸਪਲੇਅ ਮਿਲਣ ਦੀ ਉਮੀਦ ਹੈ ਅਤੇ ਇਸ ਦਾ ਡਿਜ਼ਾਈਨ ਮੌਜੂਦਾ MacBook ਮਾਡਲਾਂ ਨਾਲੋਂ ਹਲਕਾ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ, ਆਈਫੋਨ ਵਿੱਚ ਮਿਲਣ ਵਾਲਾ Dynamic Island ਫੀਚਰ ਵੀ ਪਹਿਲੀ ਵਾਰ MacBook ਵਿੱਚ ਦੇਖਣ ਨੂੰ ਮਿਲ ਸਕਦਾ ਹੈ। ਜੇਕਰ ਇਹ ਜਾਣਕਾਰੀ ਸਹੀ ਸਾਬਤ ਹੁੰਦੀ ਹੈ, ਤਾਂ ਇਹ MacBook ਸੀਰੀਜ਼ ਵਿੱਚ ਇੱਕ ਵੱਡਾ ਬਦਲਾਅ ਹੋਵੇਗਾ।

ਐਪਲ ਨਵੀਂ M6 ਚਿੱਪ ਦੇ ਨਾਲ MacBook Pro ਅਤੇ iMac ਦੇ ਅਪਡੇਟ ਕੀਤੇ ਮਾਡਲ ਵੀ ਪੇਸ਼ ਕਰ ਸਕਦੀ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ, ਇਨ੍ਹਾਂ ਡਿਵਾਈਸਾਂ ਵਿੱਚ ਡਿਜ਼ਾਈਨ ਨੂੰ ਵੱਡੇ ਪੱਧਰ ’ਤੇ ਬਦਲਣ ਦੀ ਬਜਾਏ ਨਵੇਂ ਪ੍ਰੋਸੈਸਰ ’ਤੇ ਜ਼ਿਆਦਾ ਧਿਆਨ ਦਿੱਤਾ ਜਾ ਸਕਦਾ ਹੈ। ਨਵੀਂ ਚਿੱਪ ਨਾਲ ਵੀਡੀਓ ਐਡਿਟਿੰਗ, ਫੋਟੋ ਪ੍ਰੋਡਕਸ਼ਨ ਅਤੇ ਮਿਊਜ਼ਿਕ ਨਾਲ ਜੁੜੇ ਕੰਮ ਕਰਨ ਵਾਲੇ ਯੂਜ਼ਰਾਂ ਨੂੰ ਬਿਹਤਰ ਪਰਫਾਰਮੈਂਸ ਮਿਲਣ ਦੀ ਉਮੀਦ ਹੈ। ਹਾਲਾਂਕਿ, ਇਨ੍ਹਾਂ ਮਾਡਲਾਂ ਦੀਆਂ ਵਿਸ਼ੇਸ਼ਤਾਵਾਂ ਬਾਰੇ ਅਜੇ ਪੂਰੀ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।

ਨਵੇਂ MacBook ਦੇ ਨਾਲ ਐਪਲ ਦੇ iPad Mini ਵਿੱਚ ਵੀ ਵੱਡੇ ਬਦਲਾਅ ਦੇਖਣ ਨੂੰ ਮਿਲ ਸਕਦੇ ਹਨ। ਰਿਪੋਰਟਾਂ ਅਨੁਸਾਰ, ਨਵੇਂ ਮਾਡਲ ਵਿੱਚ ਪਹਿਲੀ ਵਾਰ OLED ਡਿਸਪਲੇਅ ਦਿੱਤੀ ਜਾ ਸਕਦੀ ਹੈ। ਵੀਡੀਓ ਕਾਲਿੰਗ ਨੂੰ ਬਿਹਤਰ ਬਣਾਉਣ ਲਈ ਇਸ ਦਾ ਫਰੰਟ ਕੈਮਰਾ ਲੈਂਡਸਕੇਪ ਪੋਜ਼ੀਸ਼ਨ ਵਿੱਚ ਲਗਾਇਆ ਜਾ ਸਕਦਾ ਹੈ। ਇਸ ਦੇ ਨਾਲ ਹੀ ਸਪੀਕਰ ਸਿਸਟਮ ਵਿੱਚ ਵੀ ਸੁਧਾਰ ਹੋਣ ਦੀ ਸੰਭਾਵਨਾ ਹੈ। ਦੱਸ ਦੇਈਏ ਕਿ ਕੰਪਨੀ ਨੇ ਆਖ਼ਰੀ ਵਾਰ 2024 ਵਿੱਚ iPad Mini ਨੂੰ ਅਪਡੇਟ ਕੀਤਾ ਸੀ।

ਇਨ੍ਹਾਂ ਸੰਭਾਵਿਤ ਲਾਂਚਾਂ ਤੋਂ ਪਹਿਲਾਂ 13 ਅਕਤੂਬਰ ਨੂੰ ਐਪਲ ਦੇ ਸਮਾਰਟ ਹੋਮ ਪ੍ਰੋਡਕਟਸ ਬਾਰੇ ਐਲਾਨ ਕੀਤੇ ਜਾਣ ਦੀ ਵੀ ਚਰਚਾ ਹੈ। ਇਸ ਵਿੱਚ ਡਿਸਪਲੇਅ ਵਾਲਾ ਸਮਾਰਟ ਹੋਮ ਹੱਬ, ਨਵਾਂ Home Pod Mini ਅਤੇ ਅਪਡੇਟ ਕੀਤਾ Apple TV ਸ਼ਾਮਲ ਹੋ ਸਕਦੇ ਹਨ। ਇਨ੍ਹਾਂ ਡਿਵਾਈਸਾਂ ਨੂੰ ਕੰਟਰੋਲ ਕਰਨ ਵਿੱਚ ਕੰਪਨੀ ਦੇ ਵਰਚੁਅਲ ਅਸਿਸਟੈਂਟ Siri ਦੀ ਅਹਿਮ ਭੂਮਿਕਾ ਰਹਿਣ ਦੀ ਉਮੀਦ ਹੈ। ਇਸ ਨਾਲ ਐਪਲ ਦੇ ਸਮਾਰਟ ਹੋਮ ਡਿਵਾਈਸਾਂ ਦੀ ਵਰਤੋਂ ਹੋਰ ਆਸਾਨ ਹੋ ਸਕਦੀ ਹੈ।

ਇਨ੍ਹਾਂ ਸੰਭਾਵਿਤ ਲਾਂਚਾਂ ਰਾਹੀਂ ਐਪਲ ਆਪਣੇ Mac, iPad ਅਤੇ ਸਮਾਰਟ ਹੋਮ ਪ੍ਰੋਡਕਟਸ ਦੀ ਰੇਂਜ ਨੂੰ ਹੋਰ ਵਧਾ ਸਕਦੀ ਹੈ। ਹਾਲਾਂਕਿ, ਟੱਚਸਕ੍ਰੀਨ MacBook, M6 ਚਿੱਪ ਵਾਲੇ ਮਾਡਲਾਂ ਅਤੇ ਨਵੇਂ iPad Mini ਦੀ ਲਾਂਚ ਤਾਰੀਖ਼ ਅਤੇ ਫੀਚਰਾਂ ਬਾਰੇ ਕੰਪਨੀ ਦੀ ਅਧਿਕਾਰਤ ਪੁਸ਼ਟੀ ਹਾਲੇ ਬਾਕੀ ਹੈ। ਫਿਲਹਾਲ, ਇਨ੍ਹਾਂ ਜਾਣਕਾਰੀਆਂ ਨੂੰ ਮੀਡੀਆ ਰਿਪੋਰਟਾਂ ਅਤੇ ਸੰਭਾਵਿਤ ਲਾਂਚਾਂ ਨਾਲ ਜੁੜੀਆਂ ਚਰਚਾਵਾਂ ਵਜੋਂ ਹੀ ਦੇਖਿਆ ਜਾਣਾ ਚਾਹੀਦਾ ਹੈ।