ਰਿਲਾਇੰਸ,ਮੇਟਾ ਸਾਂਝੇਦਾਰੀ: ਜਾਮਨਗਰ ਵਿੱਚ ਭਾਰਤ ਦਾ ਪਹਿਲਾ AI ਡੇਟਾ ਸੈਂਟਰ

10 June 2026 ਅੱਪਡੇਟ ਕੀਤਾ ਗਿਆ

ਭਾਰਤ ਵਿੱਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੇ ਖੇਤਰ ਵਿੱਚ ਇੱਕ ਵੱਡੀ ਤਰੱਕੀ ਹੋਣ ਜਾ ਰਹੀ ਹੈ। ਫੇਸਬੁੱਕ, ਇੰਸਟਾਗ੍ਰਾਮ ਅਤੇ ਵਟਸਐਪ ਦੀ ਮਾਤਾ ਕੰਪਨੀ ਮੇਟਾ ਨੇ ਰਿਲਾਇੰਸ ਇੰਡਸਟਰੀਜ਼ ਨਾਲ ਮਿਲ ਕੇ ਭਾਰਤ ਵਿੱਚ ਆਪਣਾ ਪਹਿਲਾ AI ਡੇਟਾ ਸੈਂਟਰ ਸਥਾਪਤ ਕਰਨ ਦਾ ਫੈਸਲਾ ਕੀਤਾ ਹੈ। ਇਹ ਪ੍ਰੋਜੈਕਟ ਗੁਜਰਾਤ ਦੇ ਜਾਮਨਗਰ ਵਿੱਚ ਸ਼ੁਰੂ ਹੋਵੇਗਾ।

ਇਸ ਸਾਂਝੇ ਪ੍ਰੋਜੈਕਟ ਵਿੱਚ ਰਿਲਾਇੰਸ ਇੰਡਸਟਰੀਜ਼ ਡੇਟਾ ਸੈਂਟਰ ਦਾ ਬੁਨਿਆਦੀ ਢਾਂਚਾ ਤਿਆਰ ਕਰੇਗੀ ਅਤੇ ਇਸ ਦੇ ਸੰਚਾਲਨ ਵਿੱਚ ਮੁੱਖ ਭੂਮਿਕਾ ਨਿਭਾਏਗੀ। ਦੂਜੇ ਪਾਸੇ, ਮੇਟਾ ਇਸ ਸੈਂਟਰ ਨੂੰ ਆਪਣੇ AI ਮਾਡਲਾਂ ਅਤੇ ਡਿਜੀਟਲ ਸੇਵਾਵਾਂ ਨੂੰ ਚਲਾਉਣ ਲਈ ਵਰਤੇਗੀ।

ਮਹਾਰਾਸ਼ਟਰ ਵਿੱਚ ਬੰਬ ਧਮਕੀ ਅਲਰਟ: RSS ਹੈੱਡਕੁਆਰਟਰ ਤੇ ਮੁੱਖ ਮੰਤਰੀ ਦਫ਼ਤਰ ਨਿਸ਼ਾਨੇ ‘ਤੇ

ਸ਼ੁਰੂਆਤੀ ਤੌਰ ‘ਤੇ ਇਸ AI ਡੇਟਾ ਸੈਂਟਰ ਦੀ ਸਮਰੱਥਾ 168 ਮੈਗਾਵਾਟ ਹੋਵੇਗੀ, ਜਿਸਨੂੰ ਭਵਿੱਖ ਵਿੱਚ ਵਧਾਉਣ ਦੀ ਯੋਜਨਾ ਵੀ ਹੈ। ਰਿਪੋਰਟਾਂ ਮੁਤਾਬਕ, ਇਹ ਪ੍ਰੋਜੈਕਟ ਅਗਲੇ ਦੋ ਸਾਲਾਂ ਵਿੱਚ ਪੂਰੀ ਤਰ੍ਹਾਂ ਕਾਰਜਸ਼ੀਲ ਹੋ ਸਕਦਾ ਹੈ ਅਤੇ ਮੇਟਾ ਦੇ ਪਲੇਟਫਾਰਮਾਂ ਜਿਵੇਂ ਫੇਸਬੁੱਕ, ਇੰਸਟਾਗ੍ਰਾਮ ਅਤੇ ਵਟਸਐਪ ‘ਤੇ ਵਰਤੇ ਜਾਣ ਵਾਲੇ AI ਸਿਸਟਮਾਂ ਨੂੰ ਸਹਾਇਤਾ ਦੇਵੇਗਾ।

ਮੇਟਾ ਦੇ ਸੀਈਓ ਮਾਰਕ ਜ਼ੁਕਰਬਰਗ ਨੇ ਇਸ ਸਾਂਝੇਦਾਰੀ ‘ਤੇ ਖੁਸ਼ੀ ਜਤਾਈ ਹੈ ਅਤੇ ਕਿਹਾ ਹੈ ਕਿ ਭਾਰਤ ਵਿੱਚ ਪਹਿਲਾ AI ਡੇਟਾ ਸੈਂਟਰ ਬਣਾਉਣਾ ਕੰਪਨੀ ਲਈ ਮਹੱਤਵਪੂਰਨ ਕਦਮ ਹੈ। ਉਨ੍ਹਾਂ ਦੇ ਅਨੁਸਾਰ ਇਹ ਕੇਂਦਰ ਮੇਟਾ ਦੇ ਗਲੋਬਲ AI ਇੰਫਰਾਸਟਰਕਚਰ ਨੂੰ ਹੋਰ ਮਜ਼ਬੂਤ ਕਰੇਗਾ।

ਰਿਲਾਇੰਸ ਇਸ ਪ੍ਰੋਜੈਕਟ ਵਿੱਚ ਡਿਜ਼ਾਈਨ, ਨਿਰਮਾਣ, ਨੈੱਟਵਰਕ ਕਨੈਕਟੀਵਿਟੀ, ਨਵਿਆਉਣਯੋਗ ਊਰਜਾ ਸਪਲਾਈ ਅਤੇ ਸੰਚਾਲਨ ਸਮੇਤ ਕਈ ਮੁੱਖ ਸੇਵਾਵਾਂ ਪ੍ਰਦਾਨ ਕਰੇਗੀ। ਇਸ ਨਾਲ ਰਿਲਾਇੰਸ ਦੀ AI ਅਤੇ ਡੇਟਾ ਸੈਂਟਰ ਖੇਤਰ ਵਿੱਚ ਮਜ਼ਬੂਤ ਪਕੜ ਹੋਰ ਵਧੇਗੀ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਪ੍ਰੋਜੈਕਟ ਭਾਰਤ ਵਿੱਚ ਡਿਜੀਟਲ ਬੁਨਿਆਦੀ ਢਾਂਚੇ ਨੂੰ ਤੇਜ਼ੀ ਨਾਲ ਅੱਗੇ ਵਧਾਏਗਾ ਅਤੇ ਨੌਜਵਾਨਾਂ ਲਈ ਨਵੇਂ ਰੁਜ਼ਗਾਰ ਦੇ ਮੌਕੇ ਪੈਦਾ ਕਰੇਗਾ। ਇਸਨੂੰ ਭਾਰਤ ਨੂੰ ਗਲੋਬਲ AI ਹੱਬ ਬਣਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਵਜੋਂ ਦੇਖਿਆ ਜਾ ਰਿਹਾ ਹੈ।