ਅਸ਼ਲੀਲ ਗਾਣੇ ਦੇ ਵਿਵਾਦ ‘ਚ ਬੁਰੀ ਫਸੀ ਨੋਰਾ ਫਤੇਹੀ,ਮਹਿਲਾ ਕਮਿਸ਼ਨ ਨਾਰਾਜ਼; ਸੰਜੇ ਦੱਤ ਨੂੰ ਵੀ ਸੰਮਨ,8 ਅਪ੍ਰੈਲ ਨੂੰ ਪੇਸ਼ ਹੋਣ ਦੇ ਹੁਕਮ

7 April 2026 ਅੱਪਡੇਟ ਕੀਤਾ ਗਿਆ

ਮਨੋਰੰਜਨ ਡੈਸਕ : ਅਦਾਕਾਰਾ ਨੋਰਾ ਫਤੇਹੀ ਲਈ ਫਿਲਮ ਕੇਡੀ: ਦ ਡੇਵਿਲ ਦੇ ਗਾਣੇ “ਸਰਕੇ ਚੁਨਾਰ ਤੇਰੀ” ਨੂੰ ਲੈ ਕੇ ਚਲ ਰਿਹਾ ਵਿਵਾਦ ਹੋਰ ਗੰਭੀਰ ਹੋ ਗਿਆ ਹੈ। 6 ਅਪ੍ਰੈਲ ਨੂੰ ਰਾਸ਼ਟਰੀ ਮਹਿਲਾ ਕਮਿਸ਼ਨ ਵੱਲੋਂ ਬੁਲਾਈ ਗਈ ਸੁਣਵਾਈ ਵਿੱਚ ਪੇਸ਼ ਨਾ ਹੋਣ ਕਾਰਨ ਕਮਿਸ਼ਨ ਨੇ ਨਾਰਾਜ਼ਗੀ ਜਤਾਈ ਹੈ ਅਤੇ ਉਨ੍ਹਾਂ ਨੂੰ ਆਖਰੀ ਮੌਕਾ ਦਿੱਤਾ ਹੈ।

ਨਿਊਜ਼ ਏਜੰਸੀ ਮੁਤਾਬਕ, ਇਸ ਸੁਣਵਾਈ ਵਿੱਚ ਗੀਤਕਾਰ ਰਕੀਬ ਆਲਮ, ਫਿਲਮ ਦੇ ਨਿਰਦੇਸ਼ਕ ਪ੍ਰੇਮ ਅਤੇ ਪ੍ਰੋਡਕਸ਼ਨ ਹਾਊਸ ਦੇ ਨੁਮਾਇੰਦਿਆਂ ਨੇ ਹਾਜ਼ਰੀ ਭਰੀ। ਸੁਣਵਾਈ ਦੀ ਅਗਵਾਈ ਕਮਿਸ਼ਨ ਦੀ ਚੇਅਰਪਰਸਨ ਵਿਜਯਾ ਰਹਿਤਕਰ ਨੇ ਕੀਤੀ। ਹਾਲਾਂਕਿ ਨੋਰਾ ਫਤੇਹੀ ਖੁਦ ਪੇਸ਼ ਨਹੀਂ ਹੋਈਆਂ ਅਤੇ ਆਪਣੇ ਵਕੀਲ ਰਾਹੀਂ ਜਵਾਬ ਭੇਜਿਆ।

ਕਮਿਸ਼ਨ ਨੇ ਗਾਣੇ ਦੇ ਬੋਲਾਂ ਨੂੰ ਔਰਤਾਂ ਦੀ ਮਰਿਆਦਾ ਲਈ ਅਪਮਾਨਜਨਕ ਕਰਾਰ ਦਿੱਤਾ। ਸੁਣਵਾਈ ਦੌਰਾਨ ਮੌਜੂਦ ਸਾਰੇ ਲੋਕਾਂ ਨੇ ਮੰਨਿਆ ਕਿ ਗੀਤ ਦੇ ਬੋਲ ਅਣਉਚਿਤ ਸਨ ਅਤੇ ਇਸਦਾ ਨਕਾਰਾਤਮਕ ਪ੍ਰਭਾਵ ਪਿਆ ਹੈ। ਇਸ ਮਾਮਲੇ ‘ਚ ਸਾਰੇ ਸੰਬੰਧਿਤ ਪੱਖਾਂ ਨੇ ਲਿਖਤੀ ਮਾਫ਼ੀ ਵੀ ਮੰਗੀ ਅਤੇ ਤਿੰਨ ਮਹੀਨੇ ਤੱਕ ਮਹਿਲਾ ਸਸ਼ਕਤੀਕਰਨ ਲਈ ਕੰਮ ਕਰਨ ਦਾ ਭਰੋਸਾ ਦਿੱਤਾ।

ਇਸੇ ਦੌਰਾਨ, ਕਮਿਸ਼ਨ ਨੇ ਅਦਾਕਾਰ ਸੰਜੇ ਦੱਤ ਨੂੰ ਵੀ 8 ਅਪ੍ਰੈਲ ਨੂੰ ਪੇਸ਼ ਹੋਣ ਲਈ ਸੰਮਨ ਜਾਰੀ ਕੀਤਾ ਹੈ। ਨੋਰਾ ਫਤੇਹੀ ਨੂੰ 27 ਅਪ੍ਰੈਲ ਨੂੰ ਹਾਜ਼ਰ ਹੋਣ ਲਈ ਆਖਰੀ ਮੌਕਾ ਦਿੱਤਾ ਗਿਆ ਹੈ।

ਨੋਰਾ ਫਤੇਹੀ ਨੇ ਆਪਣੇ ਬਿਆਨ ਵਿੱਚ ਕਿਹਾ ਕਿ ਗਾਣਾ ਪਹਿਲਾਂ ਕੰਨੜ ਵਿੱਚ ਸ਼ੂਟ ਕੀਤਾ ਗਿਆ ਸੀ ਅਤੇ ਬਾਅਦ ਵਿੱਚ ਬਿਨਾਂ ਉਨ੍ਹਾਂ ਦੀ ਮਨਜ਼ੂਰੀ ਦੇ ਹਿੰਦੀ ਵਿੱਚ ਜਾਰੀ ਕੀਤਾ ਗਿਆ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਗਾਣੇ ਵਿੱਚ ਉਨ੍ਹਾਂ ਦੀ AI ਤਸਵੀਰ ਦੀ ਵਰਤੋਂ ਵੀ ਬਿਨਾਂ ਆਗਿਆ ਕੀਤੀ ਗਈ।

ਫਿਲਮ ਕੇਡੀ: ਦ ਡੇਵਿਲ, ਜਿਸ ਵਿੱਚ ਧਰੁਵ ਸਰਜਾ ਮੁੱਖ ਭੂਮਿਕਾ ਵਿੱਚ ਹਨ, 30 ਅਪ੍ਰੈਲ 2026 ਨੂੰ ਰਿਲੀਜ਼ ਹੋਣ ਵਾਲੀ ਹੈ। ਗਾਣਾ ਰਿਲੀਜ਼ ਹੋਣ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਇਸਦੇ ਅਸ਼ਲੀਲ ਬੋਲਾਂ ਅਤੇ ਡਾਂਸ ਸਟੈਪਸ ਨੂੰ ਲੈ ਕੇ ਕਾਫੀ ਆਲੋਚਨਾ ਹੋਈ, ਜਿਸ ਕਾਰਨ ਇਹ ਮਾਮਲਾ ਹੋਰ ਵੀ ਤੂਲ ਫੜ ਗਿਆ।