ਨਿਊਜ਼ੀਲੈਂਡ ਬਿਲ ਆਫ ਰਾਈਟਸ ਐਕਟ ਦੀ ਧਾਰਾ 15 ਹਰ ਧਰਮ ਨੂੰ ਮਿਲਦਾ ਹੈ ਪੂਰਾ ਹੱਕ: ਸਿੱਖ ਭਾਈਚਾਰੇ ਨੂੰ ਮਿਲੀ ਰਾਹਤ

10 months ਪਹਿਲਾ

ਅੰਤਰਰਾਸ਼ਟਰੀ ਡੈਸਕ: ਆਕਲੈਂਡ ਦੇ ਮਨੁਰੇਵਾ ਪਾਪਾਕੁਰਾ ਵਾਰਡ ਦੇ ਕੌਂਸਲਰ ਡੈਨੀਅਲ ਨਿਊਮੈਨ ਨੇ ਹਾਲ ਹੀ ਵਿੱਚ ਨਗਰ ਕੀਰਤਨ ਦੌਰਾਨ ਵਾਪਰੀ ਘਟਨਾ ਬਾਰੇ ਆਪਣਾ ਬਿਆਨ ਜਾਰੀ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਨਿਊਜ਼ੀਲੈਂਡ ਬਿਲ ਆਫ ਰਾਈਟਸ ਐਕਟ ਦੀ ਧਾਰਾ 15 ਅਨੁਸਾਰ ਹਰ ਵਿਅਕਤੀ ਨੂੰ ਆਪਣੇ ਧਰਮ ਜਾਂ ਵਿਸ਼ਵਾਸ ਨੂੰ ਉਪਾਸਨਾ ਰੀਤ ਰਿਵਾਜ ਅਭਿਆਸ ਜਾਂ ਸਿੱਖਿਆ ਰਾਹੀਂ ਪ੍ਰਗਟ ਕਰਨ ਦਾ ਪੂਰਾ ਅਧਿਕਾਰ ਹੈ।

ਨਿਊਮੈਨ ਨੇ ਸਿੱਖ ਭਾਈਚਾਰੇ ਵੱਲੋਂ ਆਯੋਜਿਤ ਨਗਰ ਕੀਰਤਨ ਦੀ ਪ੍ਰਸ਼ੰਸਾ ਕੀਤੀ ਅਤੇ ਇਸਨੂੰ ਸ਼ਾਂਤੀਪ੍ਰਿਯ ਧਾਰਮਿਕ ਪ੍ਰਗਟਾਵਾ ਦੱਸਿਆ। ਉਨ੍ਹਾਂ ਨੇ ਕਿਹਾ ਕਿ ਗੁਰਦੁਆਰਾ ਨਾਨਕਸਰ ਨਿਊਜ਼ੀਲੈਂਡ ਸਿਰਫ਼ ਅਰਦਾਸ ਦਾ ਕੇਂਦਰ ਨਹੀਂ ਹੈ ਸਗੋਂ ਲੰਗਰ ਅਤੇ ਸਾਂਝੇਦਾਰੀ ਦੀ ਪ੍ਰਥਾ ਦਾ ਪ੍ਰਤੀਕ ਵੀ ਹੈ। ਇਸ ਮੌਕੇ ਉਨ੍ਹਾਂ ਨੇ ਉਹਨਾਂ ਨੌਜਵਾਨਾਂ ਪ੍ਰਤੀ ਨਿਰਾਸ਼ਾ ਜ਼ਾਹਰ ਕੀਤੀ ਜਿਨ੍ਹਾਂ ਨੇ “Keep NZ NZ” ਅਤੇ “Kiwis First” ਵਰਗੇ ਨਾਅਰੇ ਲਗਾ ਕੇ ਨਗਰ ਕੀਰਤਨ ਦਾ ਵਿਰੋਧ ਕੀਤਾ।

ਨਿਊਜ਼ੀਲੈਂਡ ਵਿੱਚ ਬਹੁ ਸੱਭਿਆਚਾਰਕ ਸਾਂਝ ਨੂੰ ਚੁਣੌਤੀ ਨਗਰ ਕੀਰਤਨ ਦੌਰਾਨ ਵਿਰੋਧੀ ਨਾਅਰੇ

ਉਨ੍ਹਾਂ ਨੇ ਇਤਿਹਾਸਕ ਸੰਦਰਭ ਵਿੱਚ ਦੱਸਿਆ ਕਿ ਪੰਜਾਬੀ ਪ੍ਰਵਾਸੀ 1890 ਤੋਂ ਨਿਊਜ਼ੀਲੈਂਡ ਆ ਰਹੇ ਹਨ ਅਤੇ ਭਾਰਤੀ ਸਿਪਾਹੀਆਂ ਨੇ ਪਹਿਲੀ ਅਤੇ ਦੂਜੀ ਵਿਸ਼ਵ ਯੁੱਧ ਵਿੱਚ ਐਂਜ਼ੈਕ ਸੈਨਿਕਾਂ ਦੇ ਨਾਲ ਮਿਲ ਕੇ ਲੜਾਈ ਕੀਤੀ ਸੀ। ਗੈਲੀਪੋਲੀ ਮੁਹਿੰਮ ਵਿੱਚ 16 ਹਜ਼ਾਰ ਭਾਰਤੀ ਸਿਪਾਹੀ ਸ਼ਾਮਲ ਸਨ ਜਿਨ੍ਹਾਂ ਵਿੱਚੋਂ ਲਗਭਗ ਦਸ ਫ਼ੀਸਦੀ ਸ਼ਹੀਦ ਹੋਏ। ਉਨ੍ਹਾਂ ਨੇ ਕਿਹਾ ਕਿ ਇਹ ਵਿਰਾਸਤ ਨਿਊਜ਼ੀਲੈਂਡ ਅਤੇ ਭਾਰਤ ਦੇ ਰਿਸ਼ਤਿਆਂ ਨੂੰ ਹੋਰ ਮਜ਼ਬੂਤ ਬਣਾਉਂਦੀ ਹੈ।

ਨਿਊਮੈਨ ਨੇ ਕੋਵਿਡ-19 ਲਾਕਡਾਊਨ ਦੌਰਾਨ ਭਾਰਤੀ ਰਿਟੇਲਰਾਂ ਅਤੇ ਮਾਰਕੀਟ ਗਾਰਡਨਰਾਂ ਵੱਲੋਂ ਕੀਤੀ ਸੇਵਾ ਦੀ ਵੀ ਪ੍ਰਸ਼ੰਸਾ ਕੀਤੀ ਜਿਨ੍ਹਾਂ ਨੇ ਲੋੜਵੰਦ ਪਰਿਵਾਰਾਂ ਨੂੰ ਭੋਜਨ ਮੁਹੱਈਆ ਕਰਵਾਇਆ। ਉਨ੍ਹਾਂ ਨੇ ਉਹਨਾਂ ਲੋਕਾਂ ਦੀ ਨਿੰਦਾ ਕੀਤੀ ਜਿਨ੍ਹਾਂ ਨੇ “This is New Zealand not India” ਵਾਲੇ ਬੋਰਡ ਦਿਖਾਏ ਅਤੇ ਕਿਹਾ ਕਿ ਇਹ ਸੋਚ ਗਲਤ ਹੈ ਕਿਉਂਕਿ ਨਿਊਜ਼ੀਲੈਂਡ ਕਿਸੇ ਇੱਕ ਧਰਮ ਜਾਂ ਜਾਤੀ ਲਈ ਨਹੀਂ ਹੈ।

WATCH VIDEO: ਸੰਘਣੀ ਧੁੰਦ ਨਾਲ ਪਰੇਸ਼ਾਨ ਲੋਕਾਂ ਨੂੰ ਮਿਲੇਗੀ ਰਾਹਤ,ਛਮ-ਛਮ ਵਰ੍ਹੇਗਾ ਮੀਂਹ

ਉਨ੍ਹਾਂ ਨੇ ਬਾਈਬਲ ਦੇ ਹਵਾਲੇ ਨਾਲ ਕਿਹਾ ਕਿ “ਝੂਠੇ ਨਬੀਆਂ ਤੋਂ ਸਾਵਧਾਨ ਰਹੋ” ਕਿਉਂਕਿ ਕੋਈ ਵੀ ਆਧੁਨਿਕ ਇਸਾਈ ਧਾਰਮਿਕ ਸਿੱਖਿਆ ਭਾਰਤੀ ਨਿਊਜ਼ੀਲੈਂਡਰਾਂ ਪ੍ਰਤੀ ਅਸਹਿਨਸ਼ੀਲਤਾ ਨਹੀਂ ਸਿਖਾਉਂਦੀ। ਅੰਤ ਵਿੱਚ ਨਿਊਮੈਨ ਨੇ ਇਹ ਵੀ ਕਿਹਾ ਕਿ ਉਹ ਅਗਲੇ ਸਾਲ ਮਨੁਰੇਵਾ ਵਿੱਚ ਹੋਣ ਵਾਲੇ ਨਗਰ ਕੀਰਤਨ ਵਿੱਚ ਸ਼ਾਮਲ ਹੋਣ ਦੀ ਕੋਸ਼ਿਸ਼ ਕਰਨਗੇ ਅਤੇ ਸਿੱਖ ਇਤਿਹਾਸ ਅਤੇ ਵਿਰਾਸਤ ‘ਤੇ ਮਾਣ ਪ੍ਰਗਟ ਕਰਨਗੇ।