ਆਈਏਐਨਐਸ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਹੈ ਕਿ ਉਨ੍ਹਾਂ ਨੂੰ ਈਰਾਨ ਨਾਲ ਸੰਭਾਵੀ ਸਮਝੌਤੇ ਦੇ ਢਾਂਚੇ ਬਾਰੇ ਜਾਣਕਾਰੀ ਦਿੱਤੀ ਗਈ ਹੈ, ਪਰ ਕੋਈ ਵੀ ਫੈਸਲਾ ਲੈਣ ਤੋਂ ਪਹਿਲਾਂ ਅੰਤਿਮ “ਸ਼ਬਦਾਂ” ਦੀ ਉਡੀਕ ਕਰ ਰਹੇ ਹਨ। ਉਨ੍ਹਾਂ ਨੇ ਇਹ ਵੀ ਚੇਤਾਵਨੀ ਦਿੱਤੀ ਕਿ ਜੇ ਤਹਿਰਾਨ “ਗਲਤ ਵਿਵਹਾਰ (ਮਿਸ ਵਿਹੇਵ) ਕਰਦਾ ਹੈ” ਤਾਂ ਫੌਜੀ ਕਾਰਵਾਈ ਦਾ ਵਿਕਲਪ ਖੁੱਲ੍ਹਾ ਰਹਿੰਦਾ ਹੈ ਮਿਆਮੀ ਲਈ ਰਵਾਨਾ ਹੋਣ ਤੋਂ ਪਹਿਲਾਂ ਫਲੋਰੀਡਾ ਵਿੱਚ ਪੱਤਰਕਾਰਾਂ ਦੇ ਸਵਾਲਾਂ ਦੇ ਜਵਾਬ ਵਿੱਚ, ਟਰੰਪ ਨੇ ਕਿਹਾ, “ਉਨ੍ਹਾਂ ਨੇ ਮੈਨੂੰ ਸਮਝੌਤੇ ਦੀ ਧਾਰਨਾ ਬਾਰੇ ਜਾਣਕਾਰੀ ਦਿੱਤੀ ਹੈ। ਹੁਣ, ਉਹ ਮੈਨੂੰ ਸਹੀ ਸ਼ਬਦਾਵਲੀ ਪ੍ਰਦਾਨ ਕਰਨਗੇ।”
ਇਹ ਟਿੱਪਣੀਆਂ ਅਜਿਹੇ ਸਮੇਂ ਆਈਆਂ ਹਨ ਜਦੋਂ ਖੇਤਰ ਵਿੱਚ ਤਣਾਅ ਵਧਿਆ ਹੋਇਆ ਹੈ ਅਤੇ ਕੂਟਨੀਤਕ ਯਤਨ ਨਾਜ਼ੁਕ ਸਥਿਤੀ ਵਿੱਚ ਹਨ। ਜਦੋਂ ਕਿ ਅਮਰੀਕਾ ਇੱਕ ਪਾਸੇ ਗੱਲਬਾਤ ਲਈ ਤਿਆਰ ਦਿਖਾਈ ਦਿੰਦਾ ਹੈ, ਉਹ ਦੂਜੇ ਪਾਸੇ ਦਬਾਅ ਬਣਾਈ ਰੱਖਣ ਦੀ ਰਣਨੀਤੀ ‘ਤੇ ਵੀ ਚੱਲ ਰਿਹਾ ਹੈ। ਟਰੰਪ ਨੇ ਦੁਹਰਾਇਆ ਕਿ ਈਰਾਨ ਵਿਰੁੱਧ ਹਮਲੇ ਦੁਬਾਰਾ ਸ਼ੁਰੂ ਕਰਨ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
ਇੱਕ ਸੀਨੀਅਰ ਈਰਾਨੀ ਅਧਿਕਾਰੀ ਦੇ ਅਨੁਸਾਰ, ਤਹਿਰਾਨ ਨੇ ਇੱਕ ਪ੍ਰਸਤਾਵ ਪੇਸ਼ ਕੀਤਾ ਹੈ, ਜਿਸਨੂੰ ਜੇਕਰ ਸਵੀਕਾਰ ਕਰ ਲਿਆ ਜਾਂਦਾ ਹੈ, ਤਾਂ ਇਹ ਰਣਨੀਤਕ ਤੌਰ ‘ਤੇ ਮਹੱਤਵਪੂਰਨ ਹੋਰਮੁਜ਼ ਜਲਡਮਰੂ ਰਾਹੀਂ ਜਹਾਜ਼ਰਾਨੀ ਨੂੰ ਮੁੜ ਸ਼ੁਰੂ ਕਰਨ ਦੀ ਆਗਿਆ ਦੇ ਸਕਦਾ ਹੈ ਅਤੇ – ਈਰਾਨ ਦੇ ਅਨੁਸਾਰ – ਅਮਰੀਕਾ ਦੀ “ਨਾਕਾਬੰਦੀ” ਨੂੰ ਖਤਮ ਕਰ ਸਕਦਾ ਹੈ। ਹਾਲਾਂਕਿ, ਇਹ ਪ੍ਰਸਤਾਵ ਈਰਾਨ ਦੇ ਪ੍ਰਮਾਣੂ ਪ੍ਰੋਗਰਾਮ ਸੰਬੰਧੀ ਵਿਸਤ੍ਰਿਤ ਗੱਲਬਾਤ ਨੂੰ ਬਾਅਦ ਦੀ ਤਾਰੀਖ ਤੱਕ ਮੁਲਤਵੀ ਕਰਦਾ ਹੈ – ਇੱਕ ਸ਼ਰਤ ਜਿਸਨੂੰ ਟਰੰਪ ਨੇ ਵਰਤਮਾਨ ਵਿੱਚ ਰੱਦ ਕਰ ਦਿੱਤਾ ਹੈ।
ਇਸ ਦੌਰਾਨ, ਪਲੇਟਫਾਰਮ ਟਰੂਥ ਸੋਸ਼ਲ ‘ਤੇ ਲਿਖਦੇ ਹੋਏ, ਟਰੰਪ ਨੇ ਕਿਹਾ, “ਮੈਂ ਜਲਦੀ ਹੀ ਈਰਾਨ ਦੁਆਰਾ ਸਾਨੂੰ ਭੇਜੀ ਗਈ ਯੋਜਨਾ ਦੀ ਸਮੀਖਿਆ ਕਰਾਂਗਾ, ਪਰ ਮੈਨੂੰ ਨਹੀਂ ਲੱਗਦਾ ਕਿ ਇਹ ਸਵੀਕਾਰਯੋਗ ਹੋਵੇਗਾ, ਕਿਉਂਕਿ ਉਨ੍ਹਾਂ ਨੇ ਪਿਛਲੇ 47 ਸਾਲਾਂ ਵਿੱਚ ਮਨੁੱਖਤਾ ਅਤੇ ਦੁਨੀਆ ਨਾਲ ਜੋ ਕੀਤਾ ਹੈ, ਉਸ ਲਈ ਉਨ੍ਹਾਂ ਨੇ ਅਜੇ ਤੱਕ ਕਾਫ਼ੀ ਕੀਮਤ ਨਹੀਂ ਅਦਾ ਕੀਤੀ ਹੈ।”
ਕੂਟਨੀਤਕ ਮੋਰਚੇ ‘ਤੇ, ਈਰਾਨ ਨੇ ਆਪਣੀ ਸ਼ਮੂਲੀਅਤ ਵਧਾ ਦਿੱਤੀ ਹੈ। ਤਹਿਰਾਨ ਵਿੱਚ ਵਿਦੇਸ਼ੀ ਰਾਜਦੂਤਾਂ ਨੂੰ ਸੰਬੋਧਨ ਕਰਦੇ ਹੋਏ, ਉਪ ਵਿਦੇਸ਼ ਮੰਤਰੀ (ਕਾਨੂੰਨੀ ਅਤੇ ਅੰਤਰਰਾਸ਼ਟਰੀ ਮਾਮਲੇ) ਕਾਜ਼ਮ ਗ਼ਰੀਬਾਬਾਦੀ ਨੇ ਸੰਯੁਕਤ ਰਾਜ ਅਤੇ ਇਜ਼ਰਾਈਲ ਨਾਲ ਤਣਾਅ ਨੂੰ ਘੱਟ ਕਰਨ ਦੇ ਉਦੇਸ਼ ਨਾਲ ਇੱਕ ਨਵੀਂ ਪਹਿਲਕਦਮੀ ਦੀ ਰੂਪਰੇਖਾ ਦਿੱਤੀ। ਈਰਾਨੀ ਅਧਿਕਾਰੀਆਂ ਨੇ ਕਿਹਾ ਕਿ ਇਹ ਪ੍ਰਸਤਾਵ ਪਾਕਿਸਤਾਨ ਰਾਹੀਂ ਪਹੁੰਚਾਇਆ ਗਿਆ ਸੀ, ਜੋ ਤਹਿਰਾਨ ਅਤੇ ਵਾਸ਼ਿੰਗਟਨ ਵਿਚਕਾਰ ਅਸਿੱਧੇ ਗੱਲਬਾਤ ਵਿੱਚ ਵਿਚੋਲੇ ਦੀ ਭੂਮਿਕਾ ਨਿਭਾ ਰਿਹਾ ਹੈ। ਬ੍ਰੀਫਿੰਗ ਦੌਰਾਨ, ਗ਼ਰੀਬਾਬਾਦੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਈਰਾਨ ਆਪਣੇ ਰਾਸ਼ਟਰੀ ਹਿੱਤਾਂ ਦੇ ਆਧਾਰ ‘ਤੇ ਕੂਟਨੀਤੀ ਪ੍ਰਤੀ ਵਚਨਬੱਧ ਹੈ, ਪਰ ਕਿਸੇ ਵੀ ਫੌਜੀ ਵਾਧੇ ਦਾ ਜਵਾਬ ਦੇਣ ਲਈ ਪੂਰੀ ਤਰ੍ਹਾਂ ਤਿਆਰ ਹੈ।
