ਨੈਸ਼ਨਲ ਡੈਸਕ : Unique Identification Authority of India ਨੇ ਇੱਕ ਮਹੱਤਵਪੂਰਨ ਅਪਡੇਟ ਜਾਰੀ ਕਰਦਿਆਂ ਸਪੱਸ਼ਟ ਕੀਤਾ ਹੈ ਕਿ ਹੁਣ ਆਧਾਰ ਕਾਰਡ ਨੂੰ ‘Date of Birth’ (ਜਨਮ ਮਿਤੀ) ਦੇ ਅਧਿਕਾਰਤ ਸਬੂਤ ਵਜੋਂ ਸਵੀਕਾਰ ਨਹੀਂ ਕੀਤਾ ਜਾਵੇਗਾ। ਅਥਾਰਟੀ ਦੇ ਅਨੁਸਾਰ, ਆਧਾਰ ਹੁਣ ਸਿਰਫ਼ ਪਛਾਣ (Identity) ਅਤੇ ਪਤਾ (Address Proof) ਦੇ ਦਸਤਾਵੇਜ਼ ਵਜੋਂ ਹੀ ਵਰਤਿਆ ਜਾਵੇਗਾ।
UIDAI ਦੇ ਇਸ ਫੈਸਲੇ ਨਾਲ ਇਹ ਸਾਫ਼ ਹੋ ਗਿਆ ਹੈ ਕਿ ਕਿਸੇ ਵੀ ਸਰਕਾਰੀ ਜਾਂ ਨਿੱਜੀ ਕੰਮ ਲਈ ਜਿੱਥੇ ਉਮਰ ਸਾਬਤ ਕਰਨੀ ਲਾਜ਼ਮੀ ਹੋਵੇਗੀ, ਉੱਥੇ ਆਧਾਰ ਕਾਰਡ ਨੂੰ Official Proof ਨਹੀਂ ਮੰਨਿਆ ਜਾਵੇਗਾ। ਇਹ ਕਦਮ ਦਸਤਾਵੇਜ਼ੀ ਪ੍ਰਕਿਰਿਆ ਵਿੱਚ ਸਹੀ ਅਤੇ ਭਰੋਸੇਯੋਗ ਜਾਣਕਾਰੀ ਨੂੰ ਯਕੀਨੀ ਬਣਾਉਣ ਲਈ ਲਿਆ ਗਿਆ ਹੈ।
ਇਸ ਫੈਸਲੇ ਦੇ ਪਿੱਛੇ ਮੁੱਖ ਕਾਰਨ ਇਹ ਦੱਸਿਆ ਗਿਆ ਹੈ ਕਿ ਆਧਾਰ ਬਣਾਉਣ ਸਮੇਂ ਕਈ ਲੋਕ ਆਪਣੀ ਜਨਮ ਮਿਤੀ ਅੰਦਾਜ਼ਨ ਦਰਜ ਕਰਵਾ ਦਿੰਦੇ ਸਨ। ਇਸ ਤੋਂ ਇਲਾਵਾ, ਕਈ ਮਾਮਲਿਆਂ ਵਿੱਚ ਜਨਮ ਮਿਤੀ ਦੀ ਪੁਸ਼ਟੀ ਲਈ ਮਜ਼ਬੂਤ ਜਾਂ ਪ੍ਰਮਾਣਿਤ ਦਸਤਾਵੇਜ਼ ਦੀ ਲੋੜ ਨਹੀਂ ਸੀ। ਇਸ ਕਰਕੇ ਆਧਾਰ ‘ਤੇ ਦਰਜ ਕੀਤੀ ਮਿਤੀ ਹਮੇਸ਼ਾ ਸਹੀ ਨਹੀਂ ਹੁੰਦੀ, ਜਿਸ ਕਾਰਨ ਅਦਾਲਤਾਂ ਅਤੇ ਕਈ ਸਰਕਾਰੀ ਵਿਭਾਗ ਇਸਨੂੰ ਉਮਰ ਦਾ ਪੱਕਾ ਸਬੂਤ ਮੰਨਣ ਤੋਂ ਕਤਰਾਉਂਦੇ ਰਹੇ ਹਨ।
UIDAI ਨੇ ਨਾਗਰਿਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਜੇਕਰ ਜਨਮ ਮਿਤੀ ਦਾ ਸਬੂਤ ਦੇਣਾ ਲਾਜ਼ਮੀ ਹੋਵੇ, ਤਾਂ ਹੋਰ ਮਾਨਤਾ ਪ੍ਰਾਪਤ ਦਸਤਾਵੇਜ਼ ਵਰਤੇ ਜਾਣ। ਇਨ੍ਹਾਂ ਵਿੱਚ ਜਨਮ ਸਰਟੀਫਿਕੇਟ, ਸਕੂਲ ਲੀਵਿੰਗ ਸਰਟੀਫਿਕੇਟ, 10ਵੀਂ ਜਮਾਤ ਦੀ ਮਾਰਕਸ਼ੀਟ (SSLC) ਜਾਂ ਪਾਸਪੋਰਟ ਸ਼ਾਮਲ ਹਨ। ਕਿਸੇ ਵੀ ਸਰਕਾਰੀ ਅਧਿਕਾਰੀ ਵੱਲੋਂ ਜਾਰੀ ਕੀਤਾ ਗਿਆ ਜਨਮ ਮਿਤੀ ਸਰਟੀਫਿਕੇਟ ਵੀ ਪੂਰੀ ਤਰ੍ਹਾਂ ਕਾਨੂੰਨੀ ਤੌਰ ‘ਤੇ ਮਾਨਤਾ ਪ੍ਰਾਪਤ ਹੁੰਦਾ ਹੈ।
ਭਾਵੇਂ ਕਿ ਆਧਾਰ ਕਾਰਡ ਅਜੇ ਵੀ ਭਾਰਤ ਵਿੱਚ ਇੱਕ ਮਹੱਤਵਪੂਰਨ ਦਸਤਾਵੇਜ਼ ਹੈ ਅਤੇ ਬੈਂਕਿੰਗ, ਸਰਕਾਰੀ ਯੋਜਨਾਵਾਂ ਅਤੇ ਹੋਰ ਕਈ ਸੇਵਾਵਾਂ ਲਈ ਲਾਜ਼ਮੀ ਹੈ, ਪਰ ਹੁਣ ਜਨਮ ਮਿਤੀ ਦੇ ਮਾਮਲੇ ਵਿੱਚ ਲੋਕਾਂ ਨੂੰ ਵੱਖਰਾ ਅਤੇ ਪ੍ਰਮਾਣਿਤ ਸਬੂਤ ਰੱਖਣਾ ਪਵੇਗਾ। ਵਿਸ਼ੇਸ਼ਗਿਆਨ ਮੰਨਦੇ ਹਨ ਕਿ ਇਸ ਫੈਸਲੇ ਨਾਲ ਦਸਤਾਵੇਜ਼ੀ ਪ੍ਰਣਾਲੀ ਹੋਰ ਪਾਰਦਰਸ਼ੀ ਅਤੇ ਭਰੋਸੇਯੋਗ ਬਣੇਗੀ।