ਸਪੋਰਟਸ ਡੈਸਕ : 2026 ਦਾ ਪੁਰਸ਼ ਟੀ-20 ਵਿਸ਼ਵ ਕੱਪ 7 ਫਰਵਰੀ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ, ਪਰ ਇਸ ਤੋਂ ਠੀਕ ਪਹਿਲਾਂ ਇੰਗਲੈਂਡ ਕ੍ਰਿਕਟ ਟੀਮ ਨੂੰ ਇੱਕ ਅਚਾਨਕ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਟੀਮ ਦੇ ਮੁੱਖ ਸਪਿਨਰ ਆਦਿਲ ਰਾਸ਼ਿਦ ਅਤੇ ਉਭਰਦੇ ਆਲਰਾਊਂਡਰ ਰੇਹਾਨ ਅਹਿਮਦ ਨੂੰ ਭਾਰਤ ਯਾਤਰਾ ਲਈ ਵੀਜ਼ਾ ਮਿਲਣ ਵਿੱਚ ਦੇਰੀ ਹੋ ਰਹੀ ਹੈ।
ਇੰਗਲੈਂਡ ਆਪਣੀ ਵਿਸ਼ਵ ਕੱਪ ਮੁਹਿੰਮ 8 ਫਰਵਰੀ ਨੂੰ ਸ਼ੁਰੂ ਕਰਨ ਜਾ ਰਿਹਾ ਹੈ ਅਤੇ ਇਸ ਤੋਂ ਪਹਿਲਾਂ ਟੀਮ ਅਭਿਆਸ ਮੈਚ ਵੀ ਖੇਡੇਗੀ। ਪਰ ਵੀਜ਼ਾ ਦੇਰੀ ਕਾਰਨ ਇਹ ਸਪੱਸ਼ਟ ਨਹੀਂ ਕਿ ਰਾਸ਼ਿਦ ਅਤੇ ਅਹਿਮਦ ਸਮੇਂ ਸਿਰ ਬਾਕੀ ਟੀਮ ਨਾਲ ਜੁੜ ਸਕਣਗੇ ਜਾਂ ਨਹੀਂ। ਇਸ ਕਾਰਨ ਸ਼੍ਰੀਲੰਕਾ ਵਿਰੁੱਧ ਹੋਣ ਵਾਲੇ ਤਿਆਰੀ ਮੈਚਾਂ ਲਈ ਵੀ ਉਨ੍ਹਾਂ ਦੀ ਉਪਲਬਧਤਾ ਉੱਤੇ ਸਵਾਲ ਬਣਿਆ ਹੋਇਆ ਹੈ।
ECB ਨੂੰ ਜਲਦੀ ਹੱਲ ਦੀ ਉਮੀਦ
ਦਿ ਗਾਰਡੀਅਨ ਦੀ ਰਿਪੋਰਟ ਮੁਤਾਬਕ, ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ (ECB) ਨੂੰ ਉਮੀਦ ਹੈ ਕਿ ਦੋਵੇਂ ਖਿਡਾਰੀਆਂ ਨੂੰ ਸਮੇਂ ਸਿਰ ਵੀਜ਼ਾ ਮਿਲ ਜਾਵੇਗਾ, ਪਰ ਵੀਜ਼ਾ ਕਲੀਅਰੈਂਸ ਦੀ ਮਿਆਦ ਹਾਲੇ ਅਸਪਸ਼ਟ ਹੈ। ECB ਨੇ ਇਸ ਮਾਮਲੇ ਵਿੱਚ ਯੂਕੇ ਸਰਕਾਰ ਤੋਂ ਦਖ਼ਲ ਦੀ ਮੰਗ ਵੀ ਕੀਤੀ ਹੈ, ਤਾਂ ਜੋ ਪ੍ਰਕਿਰਿਆ ਨੂੰ ਤੇਜ਼ ਕੀਤਾ ਜਾ ਸਕੇ।
READ ALSO : ਸੁਰੱਖਿਆ ਦਾ ਹਵਾਲਾ, ਕੰਗਨਾ ਰਣੌਤ ਅੱਜ ਵੀ ਨਿੱਜੀ ਤੌਰ ’ਤੇ ਅਦਾਲਤ ਵਿੱਚ ਨਹੀਂ ਹੋਈ ਪੇਸ਼
ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਇੰਗਲੈਂਡ ਨੂੰ ਅਜਿਹੀ ਸਮੱਸਿਆ ਆਈ ਹੋਵੇ। 2024 ਵਿੱਚ ਵੀ ਸ਼ੋਏਬ ਬਸ਼ੀਰ ਨੂੰ ਵੀਜ਼ਾ ਮੁੱਦਿਆਂ ਕਰਕੇ ਘਰ ਵਾਪਸ ਜਾਣਾ ਪਿਆ ਸੀ, ਜਿਸ ਕਾਰਨ ਉਹ ਟੈਸਟ ਲੜੀ ਲਈ ਟੀਮ ਨਾਲ ਨਹੀਂ ਜੁੜ ਸਕਿਆ ਸੀ।
ਸ਼੍ਰੀਲੰਕਾ ਦੌਰਾ ਵਿਸ਼ਵ ਕੱਪ ਦੀ ਅਹਿਮ ਤਿਆਰੀ
ਇੰਗਲੈਂਡ ਟੀਮ 22 ਜਨਵਰੀ ਤੋਂ ਸ਼੍ਰੀਲੰਕਾ ਵਿੱਚ ਤਿੰਨ ਇੱਕ ਰੋਜ਼ਾ ਅਤੇ ਤਿੰਨ ਟੀ-20 ਮੈਚ ਖੇਡੇਗੀ। ਇਹ ਲੜੀ ਟੀ-20 ਵਿਸ਼ਵ ਕੱਪ ਲਈ ਅਹਿਮ ਤਿਆਰੀ ਮੰਨੀ ਜਾ ਰਹੀ ਹੈ। ਇਸ ਦੌਰੇ ਤੋਂ ਬਾਅਦ ਟੀ-20 ਵਿਸ਼ਵ ਕੱਪ ਵਿੱਚ ਇੰਗਲੈਂਡ ਟੀਮ ਦੀ ਕਪਤਾਨੀ ਹੈਰੀ ਬਰੂਕ ਸੰਭਾਲਣਗੇ।
ਵਿਸ਼ਵ ਕੱਪ ਵਿੱਚ ਇੰਗਲੈਂਡ ਆਪਣਾ ਪਹਿਲਾ ਮੈਚ ਵਾਨਖੇੜੇ ਸਟੇਡੀਅਮ ਵਿੱਚ ਨੇਪਾਲ ਵਿਰੁੱਧ ਖੇਡੇਗਾ। ਇਸ ਤੋਂ ਬਾਅਦ 11 ਫਰਵਰੀ ਨੂੰ ਵੈਸਟਇੰਡੀਜ਼, 14 ਫਰਵਰੀ ਨੂੰ ਕੋਲਕਾਤਾ ਵਿੱਚ ਬੰਗਲਾਦੇਸ਼ ਅਤੇ 16 ਫਰਵਰੀ ਨੂੰ ਇਟਲੀ ਨਾਲ ਟਕਰਾਏਗਾ।
ਇੰਗਲੈਂਡ ਦੀ ਆਰਜ਼ੀ ਟੀਮ
ਹੈਰੀ ਬਰੂਕ (ਕਪਤਾਨ), ਰੇਹਾਨ ਅਹਿਮਦ, ਜੋਫਰਾ ਆਰਚਰ, ਟੌਮ ਬੈਂਟਨ, ਜੈਕਬ ਬੈਥਲ, ਜੋਸ ਬਟਲਰ, ਸੈਮ ਕਰਾਨ, ਲਿਆਮ ਡਾਸਨ, ਬੇਨ ਡਕੇਟ, ਵਿਲ ਜੈਕਸ, ਜੈਮੀ ਓਵਰਟਨ, ਆਦਿਲ ਰਾਸ਼ਿਦ, ਫਿਲ ਸਾਲਟ, ਜੋਸ਼ ਟੰਗ ਅਤੇ ਲੂਕ ਵੁੱਡ।
ਵੀਜ਼ਾ ਸੰਬੰਧੀ ਸਥਿਤੀ ਉੱਤੇ ਹੁਣ ਸਭ ਦੀ ਨਜ਼ਰ ਟਿਕੀ ਹੋਈ ਹੈ, ਕਿਉਂਕਿ ਟੀ-20 ਵਿਸ਼ਵ ਕੱਪ ਤੋਂ ਠੀਕ ਪਹਿਲਾਂ ਇਹ ਦੇਰੀ ਇੰਗਲੈਂਡ ਦੀ ਤਿਆਰੀਆਂ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ।
CM MAAN ਵੱਲੋਂ ਕੋ-ਆਪ੍ਰੇਟਿਵ ਸੁਸਾਇਟੀਆਂ ਲਈ ਮਹੱਤਵਪੂਰਨ ਰਾਹਤ, ਸਟੈਂਪ ਡਿਊਟੀ 8% ਤੋਂ ਘਟਾ ਕੇ 1%
