ਬੀਜਿੰਗ: ਚੀਨ ਦੇ ਸ਼ੇਨਜ਼ੌ-20 ਮਨੁੱਖੀ ਪੁਲਾੜ ਮਿਸ਼ਨ ਨੂੰ ਵੱਡਾ ਝਟਕਾ ਲੱਗਾ ਹੈ। ਚੀਨ ਦੇ ਪੁਲਾੜ ਸਟੇਸ਼ਨ ‘ਤੇ ਤਾਇਨਾਤ ਤਿੰਨ ਪੁਲਾੜ ਯਾਤਰੀਆਂ ਦੀ ਬੁੱਧਵਾਰ ਨੂੰ ਤਹਿ ਕੀਤੀ ਵਾਪਸੀ ਮੁਲਤਵੀ ਕਰ ਦਿੱਤੀ ਗਈ ਹੈ। ਚੀਨੀ ਪੁਲਾੜ ਏਜੰਸੀ (China Manned Space Agency – CMSA) ਨੇ ਦੱਸਿਆ ਕਿ ਪੁਲਾੜ ਯਾਨ ਸੰਭਵ ਤੌਰ ‘ਤੇ ਸੂਖਮ ਪੁਲਾੜ ਮਲਬੇ (micro-debris) ਨਾਲ ਪ੍ਰਭਾਵਿਤ ਹੋਇਆ ਸੀ। CMSA ਨੇ ਜਾਰੀ ਬਿਆਨ ਵਿੱਚ ਕਿਹਾ ਕਿ ਵਾਪਸੀ ‘ਚ ਦੇਰੀ ਦਾ ਫੈਸਲਾ ਅੰਤਰਿਕਸ਼ ਯਾਤਰੀਆਂ ਦੀ ਸੁਰੱਖਿਆ ਅਤੇ ਮਿਸ਼ਨ ਦੀ ਸਫਲਤਾ ਯਕੀਨੀ ਬਣਾਉਣ ਲਈ ਲਿਆ ਗਿਆ ਹੈ।
ਤਿੰਨ ਪੁਲਾੜ ਯਾਤਰੀ ਸੁਰੱਖਿਅਤ ਪਰ ਵਾਪਸੀ ਅਣਿਸ਼ਚਿਤ
ਸ਼ੇਨਜ਼ੌ-20 ਯਾਨ ‘ਚ ਸਵਾਰ ਚੇਨ ਡੋਂਗ, ਚੇਨ ਝੋਂਗਰੂਈ ਅਤੇ ਵਾਂਗ ਜੀ ਨੇ ਆਪਣੇ ਸਾਰੇ ਨਿਰਧਾਰਤ ਕਾਰਜ ਸਫਲਤਾਪੂਰਵਕ ਪੂਰੇ ਕਰ ਲਏ ਹਨ। ਉਨ੍ਹਾਂ ਨੂੰ ਅੰਦਰੂਨੀ ਮੰਗੋਲੀਆ ਦੇ ਡੋਂਗਫੇਂਗ ਲੈਂਡਿੰਗ ਸਾਈਟ ‘ਤੇ ਉਤਰਨਾ ਸੀ, ਪਰ ਹੁਣ ਇਹ ਮਿਸ਼ਨ ਅਣਿਸ਼ਚਿਤ ਸਮੇਂ ਲਈ ਰੁਕ ਗਿਆ ਹੈ। ਮੰਗਲਵਾਰ ਨੂੰ, ਤਿੰਨ ਮੈਂਬਰੀ ਚਾਲਕ ਦਲ ਨੇ ਟਾਸਕ ਟ੍ਰਾਂਸਫਰ ਸਮਾਰੋਹ ਕੀਤਾ ਅਤੇ ਪੁਲਾੜ ਸਟੇਸ਼ਨ ਦੀਆਂ ਚਾਬੀਆਂ ਸ਼ੇਨਜ਼ੌ-21 ਚਾਲਕ ਦਲ ਨੂੰ ਸੌਂਪੀਆਂ।
READ ALSO : ਵਿਆਹ ਦੀ ਧੁਮ ‘ਚ ਹਥਿਆਰਾਂ ਦੀ ਖੇਡ! ਮਸ਼ਹੂਰ ਪਹਿਲਵਾਨ ਸਿਕੰਦਰ ਸ਼ੇਖ ਗ੍ਰਿਫ਼ਤਾਰ
ਪਿਛਲੇ ਹਫ਼ਤੇ ਹੀ ਲਾਂਚ ਹੋਇਆ ਸੀ ਸ਼ੇਨਜ਼ੌ-21
ਪਿਛਲੇ ਸ਼ੁੱਕਰਵਾਰ ਨੂੰ ਚੀਨ ਨੇ ਸ਼ੇਨਜ਼ੌ-21 ਮਨੁੱਖੀ ਪੁਲਾੜ ਯਾਨ ਲਾਂਚ ਕੀਤਾ ਸੀ, ਜਿਸ ਨੇ ਤਿੰਨ ਨਵੇਂ ਪੁਲਾੜ ਯਾਤਰੀਆਂ ਨੂੰ ਛੇ ਮਹੀਨਿਆਂ ਦੇ ਮਿਸ਼ਨ ‘ਤੇ ਪੁਲਾੜ ਸਟੇਸ਼ਨ ‘ਤੇ ਪਹੁੰਚਾਇਆ।
ਚੀਨ ਹਰ ਛੇ ਮਹੀਨਿਆਂ ਬਾਅਦ ਆਪਣੇ ਪੁਲਾੜ ਸਟੇਸ਼ਨ ਦਾ ਚਾਲਕ ਦਲ ਬਦਲਦਾ ਹੈ। ਸ਼ੇਨਜ਼ੌ-20 ਟੀਮ ਦੀ ਵਾਪਸੀ ਨਾਲ ਹੀ ਨਵੀਂ ਟੀਮ ਪੂਰੀ ਤਰ੍ਹਾਂ ਡਿਊਟੀ ਸੰਭਾਲੇਗੀ। ਪਰ ਹੁਣ, ਸੂਖਮ ਪੁਲਾੜ ਮਲਬੇ ਦੇ ਖਤਰੇ ਕਾਰਨ ਇਹ ਪ੍ਰਕਿਰਿਆ ਅਟਕ ਗਈ ਹੈ।
ਵਿਗਿਆਨੀਆਂ ਦੀ ਨਿਗਰਾਨੀ ਜਾਰੀ
ਚੀਨੀ ਪੁਲਾੜ ਵਿਗਿਆਨੀ ਲਗਾਤਾਰ ਸਥਿਤੀ ਦੀ ਮਾਨੀਟਰਿੰਗ ਕਰ ਰਹੇ ਹਨ। CMSA ਦਾ ਕਹਿਣਾ ਹੈ ਕਿ ਸਾਰੇ ਪੁਲਾੜ ਯਾਤਰੀ ਸੁਰੱਖਿਅਤ ਅਤੇ ਸੰਪਰਕ ਵਿੱਚ ਹਨ, ਅਤੇ ਜਦੋਂ ਹਾਲਾਤ ਸੁਰੱਖਿਅਤ ਹੋਣਗੇ, ਤਦ ਹੀ ਉਨ੍ਹਾਂ ਦੀ ਵਾਪਸੀ ਕਰਵਾਈ ਜਾਵੇਗੀ।