ITR Filing: ਅਸੈਸਮੈਂਟ ਈਅਰ 2026-27 ਲਈ ਹੁਣ ਤੱਕ 7.8 ਕਰੋੜ ਤੋਂ ਵੱਧ ਲੋਕਾਂ ਨੇ ITR ਕੀਤਾ ਦਾਖਲ

2 weeks ਪਹਿਲਾ

ITR Filing: ਇਨਕਮ ਟੈਕਸ ਵਿਭਾਗ ਨੇ ਮੰਗਲਵਾਰ ਨੂੰ ਕਿਹਾ ਕਿ ਅਸੈਸਮੈਂਟ ਈਅਰ 2026-27 ਲਈ ਹੁਣ ਤੱਕ 7.8 ਕਰੋੜ ਤੋਂ ਵੱਧ ਇਨਕਮ ਟੈਕਸ ਰਿਟਰਨ (ITR) ਦਾਖਲ ਕੀਤੇ ਜਾ ਚੁੱਕੇ ਹਨ। ਇਨਕਮ ਟੈਕਸ ਵਿਭਾਗ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ‘ਤੇ ਇੱਕ ਪੋਸਟ ਰਾਹੀਂ ਦੱਸਿਆ ਕਿ 31 ਅਗਸਤ ਤੱਕ ਰਿਕਾਰਡ 7.8 ਕਰੋੜ ਤੋਂ ਵੱਧ ITR ਫਾਈਲ ਕੀਤੇ ਗਏ ਹਨ।

31 ਜੁਲਾਈ ਦੀ ਆਖਰੀ ਤਾਰੀਖ ਮੁੱਖ ਤੌਰ ‘ਤੇ ਤਨਖਾਹਦਾਰ ਕਰਮਚਾਰੀਆਂ, ਪੈਨਸ਼ਨਰਾਂ ਅਤੇ ਉਨ੍ਹਾਂ ਵਿਅਕਤੀਆਂ ਲਈ ਸੀ, ਜਿਨ੍ਹਾਂ ਦੀ ਆਮਦਨ ਤਨਖਾਹ, ਮਕਾਨ, ਵਿਆਜ ਜਾਂ ਕੈਪਿਟਲ ਗੇਨ ਵਰਗੇ ਸਰੋਤਾਂ ਤੋਂ ਹੁੰਦੀ ਹੈ। ਹਾਲਾਂਕਿ, ਜਿਨ੍ਹਾਂ ਲੋਕਾਂ ਦੀ ਆਮਦਨ ਕਾਰੋਬਾਰ ਜਾਂ ਪੇਸ਼ੇ ਤੋਂ ਹੁੰਦੀ ਹੈ ਅਤੇ ਜਿਨ੍ਹਾਂ ਦੇ ਖਾਤਿਆਂ ਦਾ ਟੈਕਸ ਆਡਿਟ ਲਾਜ਼ਮੀ ਨਹੀਂ ਹੈ, ਉਨ੍ਹਾਂ ਨੂੰ ਰਿਟਰਨ ਦਾਖਲ ਕਰਨ ਲਈ 31 ਅਗਸਤ ਤੱਕ ਦਾ ਸਮਾਂ ਦਿੱਤਾ ਗਿਆ ਸੀ।

ਇਸ ਸ਼੍ਰੇਣੀ ਵਿੱਚ ਫ੍ਰੀਲਾਂਸਰ, ਕਨਸਲਟੈਂਟ, ਛੋਟੇ ਕਾਰੋਬਾਰੀ ਅਤੇ ਕਈ ਪ੍ਰੋਫੈਸ਼ਨਲ ਸ਼ਾਮਲ ਹਨ, ਜੋ ਆਮ ਤੌਰ ‘ਤੇ ITR-3 ਜਾਂ ITR-4 ਫਾਰਮ ਭਰਦੇ ਹਨ। ITR-3 ਦੀ ਵਰਤੋਂ ਆਮ ਤੌਰ ‘ਤੇ ਉਨ੍ਹਾਂ ਵਿਅਕਤੀਗਤ ਟੈਕਸਦਾਤਾਵਾਂ ਅਤੇ ਹਿੰਦੂ ਅਣਵੰਡੇ ਪਰਿਵਾਰਾਂ (HUF) ਵੱਲੋਂ ਕੀਤੀ ਜਾਂਦੀ ਹੈ, ਜਿਨ੍ਹਾਂ ਦੀ ਆਮਦਨ ਕਾਰੋਬਾਰ ਜਾਂ ਪੇਸ਼ੇ ਤੋਂ ਹੁੰਦੀ ਹੈ ਅਤੇ ਜੋ ਸਧਾਰਨ ITR ਫਾਰਮ ਭਰਨ ਦੇ ਯੋਗ ਨਹੀਂ ਹੁੰਦੇ।

ਉੱਥੇ ਹੀ ITR-4 ਨੂੰ ਸੁਗਮ ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ। ਇਹ ਯੋਗ ਨਿਵਾਸੀ ਵਿਅਕਤੀਆਂ, HUF ਅਤੇ ਫਰਮਾਂ ਲਈ ਹੁੰਦਾ ਹੈ, ਜਿਸ ਵਿੱਚ LLP ਨੂੰ ਸ਼ਾਮਲ ਨਹੀਂ ਕੀਤਾ ਜਾਂਦਾ। ਇਹ ਫਾਰਮ ਉਨ੍ਹਾਂ ਟੈਕਸਦਾਤਾਵਾਂ ਲਈ ਹੈ ਜੋ ਅਨੁਮਾਨਿਤ ਟੈਕਸੇਸ਼ਨ ਸਕੀਮ ਦੀ ਚੋਣ ਕਰਦੇ ਹਨ। ਇਸ ਤੋਂ ਇਲਾਵਾ, ITR-5 ਫਰਮਾਂ, LLP, ਵਿਅਕਤੀਆਂ ਦੀਆਂ ਐਸੋਸੀਏਸ਼ਨਾਂ (AOP) ਅਤੇ ਕੁਝ ਹੋਰ ਸੰਸਥਾਵਾਂ ‘ਤੇ ਲਾਗੂ ਹੁੰਦਾ ਹੈ, ਜਦਕਿ ITR-7 ਉਨ੍ਹਾਂ ਵਿਅਕਤੀਆਂ ਅਤੇ ਸੰਸਥਾਵਾਂ ਵੱਲੋਂ ਦਾਖਲ ਕੀਤਾ ਜਾਂਦਾ ਹੈ, ਜਿਨ੍ਹਾਂ ਨੂੰ ਆਮਦਨ ਕਰ ਕਾਨੂੰਨ ਦੇ ਕੁਝ ਵਿਸ਼ੇਸ਼ ਪ੍ਰਬੰਧਾਂ ਤਹਿਤ ਰਿਟਰਨ ਫਾਈਲ ਕਰਨੀ ਹੁੰਦੀ ਹੈ।

ਜੇਕਰ ਕਿਸੇ ਕਾਰੋਬਾਰ ਜਾਂ ਪੇਸ਼ੇ ਨਾਲ ਜੁੜੇ ਟੈਕਸਦਾਤਾ ਦੇ ਖਾਤਿਆਂ ਦਾ ਟੈਕਸ ਆਡਿਟ ਲਾਜ਼ਮੀ ਹੈ, ਤਾਂ ਉਨ੍ਹਾਂ ਲਈ ਇਨਕਮ ਟੈਕਸ ਰਿਟਰਨ ਦਾਖਲ ਕਰਨ ਦੀ ਆਖਰੀ ਤਾਰੀਖ 31 ਅਕਤੂਬਰ ਨਿਰਧਾਰਤ ਕੀਤੀ ਗਈ ਹੈ। ਆਮ ਤੌਰ ‘ਤੇ ਜੇਕਰ ਕਿਸੇ ਵਿਅਕਤੀ ਦੀ ਟੈਕਸਯੋਗ ਆਮਦਨ ਮੂਲ ਛੂਟ ਸੀਮਾ ਤੋਂ ਵੱਧ ਹੈ ਤਾਂ ਉਸ ਲਈ ITR ਦਾਖਲ ਕਰਨਾ ਲਾਜ਼ਮੀ ਹੁੰਦਾ ਹੈ। ਨਵੀਂ ਟੈਕਸ ਵਿਵਸਥਾ ਤਹਿਤ 4 ਲੱਖ ਰੁਪਏ ਤੱਕ ਦੀ ਆਮਦਨ ‘ਤੇ ਟੈਕਸ ਨਹੀਂ ਲੱਗਦਾ, ਜਦਕਿ ਪੁਰਾਣੀ ਟੈਕਸ ਵਿਵਸਥਾ ਵਿੱਚ 60 ਸਾਲ ਤੋਂ ਘੱਟ ਉਮਰ ਦੇ ਵਿਅਕਤੀਆਂ ਲਈ ਇਹ ਸੀਮਾ 2.5 ਲੱਖ ਰੁਪਏ ਹੈ। 60 ਤੋਂ 79 ਸਾਲ ਦੇ ਸੀਨੀਅਰ ਨਾਗਰਿਕਾਂ ਲਈ ਇਹ 3 ਲੱਖ ਰੁਪਏ ਅਤੇ 80 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦੇ ਸੁਪਰ ਸੀਨੀਅਰ ਸਿਟੀਜ਼ਨਾਂ ਲਈ 5 ਲੱਖ ਰੁਪਏ ਹੈ।

ਹਾਲਾਂਕਿ, ਕੁਝ ਮਾਮਲਿਆਂ ਵਿੱਚ ਆਮਦਨ ਛੂਟ ਸੀਮਾ ਤੋਂ ਘੱਟ ਹੋਣ ਦੇ ਬਾਵਜੂਦ ਵੀ ITR ਫਾਈਲ ਕਰਨਾ ਲਾਜ਼ਮੀ ਹੁੰਦਾ ਹੈ। ਜੇਕਰ ਕਿਸੇ ਨਿਵਾਸੀ ਭਾਰਤੀ ਕੋਲ ਵਿਦੇਸ਼ ਵਿੱਚ ਕੋਈ ਸੰਪਤੀ ਹੈ, ਉਹ ਕਿਸੇ ਵਿਦੇਸ਼ੀ ਸੰਪਤੀ ਦਾ ਲਾਭਪਾਤਰੀ ਹੈ, ਕਿਸੇ ਵਿਦੇਸ਼ੀ ਬੈਂਕ ਖਾਤੇ ਵਿੱਚ ਦਸਤਖਤ ਕਰਨ ਦਾ ਅਧਿਕਾਰ ਰੱਖਦਾ ਹੈ ਜਾਂ ਵਿਦੇਸ਼ ਵਿੱਚ ਕੋਈ ਵਿੱਤੀ ਹਿੱਤ ਰੱਖਦਾ ਹੈ, ਤਾਂ ਉਸ ਨੂੰ ਲਾਜ਼ਮੀ ਤੌਰ ‘ਤੇ ITR ਦਾਖਲ ਕਰਨੀ ਪੈਂਦੀ ਹੈ। ਇਸ ਤੋਂ ਇਲਾਵਾ, ਜੇਕਰ ਕਿਸੇ ਵਿਅਕਤੀ ਨੇ ਵਿੱਤੀ ਸਾਲ ਦੌਰਾਨ ਨਿਰਧਾਰਤ ਹਾਈ-ਵੈਲਿਊ ਵਿੱਤੀ ਲੈਣ-ਦੇਣ ਕੀਤੇ ਹਨ ਜਾਂ ਉਸ ਦੀ ਕੁੱਲ ਆਮਦਨ ਧਾਰਾ 80C ਤੋਂ 80U ਜਾਂ ਧਾਰਾ 54 ਵਰਗੀਆਂ ਕਟੌਤੀਆਂ ਅਤੇ ਛੂਟਾਂ ਦਾ ਲਾਭ ਲੈਣ ਤੋਂ ਪਹਿਲਾਂ ਮੂਲ ਛੂਟ ਸੀਮਾ ਤੋਂ ਵੱਧ ਹੈ, ਤਾਂ ਵੀ ਇਨਕਮ ਟੈਕਸ ਰਿਟਰਨ ਦਾਖਲ ਕਰਨਾ ਲਾਜ਼ਮੀ ਹੈ।