RTO ਸੈਂਟਰ ‘ਚ ਹੰਗਾਮਾ, ਸੇਵਾ ਲਈ ਸਿਰਫ਼ ਇੱਕ ਕਰਮਚਾਰੀ

7 months पहले

ਜਲੰਧਰ: ਜਲੰਧਰ ਖੇਤਰੀ ਆਵਾਜਾਈ ਦਫ਼ਤਰ (RTO) ਦੇ ਆਟੋਮੇਟਿਡ ਡਰਾਈਵਿੰਗ ਟੈਸਟ ਸੈਂਟਰ ਤੇ ਅੱਜ ਹਾਲਾਤ ਇੰਨੇ ਵਿਗੜੇ ਹੋਏ ਸਨ ਕਿ ਲਾਇਸੈਂਸ ਬਣਵਾਉਣ ਆਏ ਲੋਕਾਂ ਨੂੰ ਘੰਟਿਆਂ ਤੱਕ ਧੁੱਪ ਚ ਖੜ੍ਹ ਕੇ ਉਡੀਕ ਕਰਨੀ ਪਈ। ਲਰਨਿੰਗ, ਡਰਾਈਵਿੰਗ, ਅੰਤਰਰਾਸ਼ਟਰੀ ਅਤੇ ਡੁਪਲੀਕੇਟ ਲਾਇਸੈਂਸ ਲਈ ਆਏ ਸੈਂਕੜੇ ਬਿਨੈਕਾਰ ਲੰਬੀਆਂ ਕਤਾਰਾਂ ਚ ਖੜ੍ਹੇ ਰਹੇ ਪਰ ਸੇਵਾ ਦੇਣ ਲਈ ਕੇਂਦਰ ਚ ਸਿਰਫ਼ ਇੱਕ ਮਹਿਲਾ ਕਰਮਚਾਰੀ ਹੀ ਮੌਜੂਦ ਸੀ।

RTO ਦਫ਼ਤਰ ‘ਚ ਸਰਵਰ ਡਾਊਨ ਹੋਣਾ, ਕੈਮਰੇ ਖ਼ਰਾਬ ਹੋਣਾ ਅਤੇ ਸਾਫਟਵੇਅਰ ਦੀ ਗੜਬੜ ਆਮ ਗੱਲ ਬਣ ਚੁੱਕੀ ਹੈ। ਕਰਮਚਾਰੀ ਦੀ ਘਾਟ ਵੀ ਸਿਸਟਮ ਨੂੰ ਠੱਪ ਕਰ ਦਿੰਦੀ ਹੈ। ਅਧਿਕਾਰੀ ਅਕਸਰ ਸਟਾਫ ਦੀ ਘਾਟ ਦਾ ਹਵਾਲਾ ਦੇ ਕੇ ਜ਼ਿੰਮੇਵਾਰੀ ਤੋਂ ਪੱਲਾ ਛੱਡ ਲੈਂਦੇ ਹਨ, ਜਿਸ ਨਾਲ ਆਮ ਲੋਕਾਂ ਨੂੰ ਘੰਟਿਆਂ ਦੀ ਉਡੀਕ ਅਤੇ ਬੇਲੋੜੀ ਦੌੜ-ਭੱਜ ਕਰਨੀ ਪੈਂਦੀ ਹੈ। ਬਿਨੈਕਾਰਾਂ ਨੇ ਦੱਸਿਆ ਕਿ ਕਰਮਚਾਰੀ ਦੀ ਘਾਟ ਕੋਈ ਨਵੀਂ ਸਮੱਸਿਆ ਨਹੀਂ। ਅਕਸਰ ਸਟਾਫ ਇੰਨਾ ਘੱਟ ਹੁੰਦਾ ਹੈ ਕਿ ਕੰਮ ਠੱਪ ਹੋ ਜਾਂਦਾ ਹੈ। ਪਰ ਅਧਿਕਾਰੀ ਇਸਨੂੰ ਹੱਲ ਕਰਨ ਦੀ ਬਜਾਏ ਅਸਥਾਈ ਰਣਨੀਤੀਆਂ ਨਾਲ ਕੰਮ ਚਲਾਉਂਦੇ ਹਨ। ਸਵਾਲ ਇਹ ਹੈ ਕਿ ਜਦੋਂ ਰਾਜ ਸਰਕਾਰ ਈ-ਗਵਰਨੈਂਸ ਅਤੇ ਆਟੋਮੇਸ਼ਨ ਦੀ ਗੱਲ ਕਰਦੀ ਹੈ ਤਾਂ ਅਜਿਹੇ ਦਫਤਰਾਂ ਦੀ ਦੁਰਦਸ਼ਾ ਕਿਉਂ ਨਹੀਂ ਸੁਧਾਰੀ ਜਾਂਦੀ?