Badshah: ਪਹਿਲਾ ਮਰਾਠੀ ਹਿਪ-ਹੌਪ ਗੀਤ ‘ਚਿਮਨਾ’ ਕੀਤਾ ਰਿਲੀਜ਼, ਬੋਲੇ- ਇਹ ਮਹਾਰਾਸ਼ਟਰ ਦੇ ਨਾਮ ਲਵ ਲੈਟਰ ਹੈ

2 weeks ਪਹਿਲਾ

Badshah: ਰੈਪਰ ਬਾਦਸ਼ਾਹ ਨੇ ਆਪਣਾ ਪਹਿਲਾ ਮਰਾਠੀ ਹਿਪ-ਹੌਪ ਗੀਤ ‘ਚਿਮਨਾ’ ਸੋਮਵਾਰ ਨੂੰ ਰਿਲੀਜ਼ ਕਰ ਦਿੱਤਾ ਹੈ। ਇਸ ਗੀਤ ਵਿੱਚ ਰਵਾਇਤੀ ਮਰਾਠੀ ਲੋਕ ਸੰਗੀਤ ਨੂੰ ਨਵੇਂ ਅਤੇ ਆਧੁਨਿਕ ਅੰਦਾਜ਼ ਵਿੱਚ ਪੇਸ਼ ਕੀਤਾ ਗਿਆ ਹੈ, ਤਾਂ ਜੋ ਹਰ ਉਮਰ ਦੇ ਲੋਕ ਇਸ ਨੂੰ ਪਸੰਦ ਕਰ ਸਕਣ।

ਇਹ ਗੀਤ ਦਰਅਸਲ ਆਉਣ ਵਾਲੀ ਮਰਾਠੀ ਫ਼ਿਲਮ ‘ਗੋਂਧਲ’ ਦਾ ਰਵਾਇਤੀ ਲੋਕਗੀਤ ‘ਏਕ ਚਿਮਣਾ ਚਿਵਚਿਵਲਾ’ ਹੈ। ਬਾਦਸ਼ਾਹ ਨੇ ਇਸ ਮਰਾਠੀ ਪੇਂਡੂ ਲੋਕਗੀਤ ਨੂੰ ਆਧੁਨਿਕ ਰੈਪ ਅਤੇ ਦਮਦਾਰ ਬੀਟਸ ਨਾਲ ਜੋੜ ਕੇ ਇਸ ਵਿੱਚ ਗਲੋਬਲ ਟੱਚ ਦਿੱਤਾ ਹੈ। ਗੀਤ ਦੀ ਸ਼ੁਰੂਆਤ ਮਸ਼ਹੂਰ ਪੇਂਡੂ ਹੁਕਲਾਈਨ ‘ਏਕ ਚਿਮਣਾ ਚਿਵਚਿਵਲਾ / ਮਾਝਾ ਸਜਣ ਜਾਗਾ ਝਾਲਾ ਹੋ / ਸੂਰਿਆ ਉਗਵਲਾ’ ਨਾਲ ਹੁੰਦੀ ਹੈ। ਇਸ ਤੋਂ ਬਾਅਦ ਬਾਦਸ਼ਾਹ ਆਪਣੇ ਖ਼ਾਸ ਹਿਪ-ਹੌਪ ਅੰਦਾਜ਼ ਵਿੱਚ ਲੋਕਲ ਫਲੇਵਰ ਜੋੜਦੇ ਹੋਏ ਹਿੰਦੀ-ਮਰਾਠੀ ਮਿਕਸ ਵਰਸੇਜ਼ ਗਾਉਂਦੇ ਹਨ।

ਆਪਣੇ ਪਹਿਲੇ ਮਰਾਠੀ ਗੀਤ ਨੂੰ ਹੋਰ ਵੀ ਖ਼ਾਸ ਬਣਾਉਣ ਲਈ ਬਾਦਸ਼ਾਹ ਨੇ ਕਈ ਵੱਡੇ ਕਲਾਕਾਰਾਂ ਨਾਲ ਕੰਮ ਕੀਤਾ ਹੈ। ਮਰਾਠੀ ਅਦਾਕਾਰਾ ਨੇਹਾ ਖਾਨ ਵੀ ਇਸ ਗੀਤ ਵਿੱਚ ਨਜ਼ਰ ਆ ਰਹੀ ਹੈ। ਉੱਥੇ ਹੀ ਬਾਲੀਵੁੱਡ ਗਾਇਕ ਦਿਵਿਆ ਕੁਮਾਰ ਅਤੇ ਮਸ਼ਹੂਰ ਮਰਾਠੀ ਲੋਕ ਗਾਇਕ ਨਾਗੇਸ਼ ਮੋਰਵੇਕਰ ਨੇ ਆਪਣੀ ਆਵਾਜ਼ ਦਿੱਤੀ ਹੈ।

ਗੀਤ ਦੇ ਮਿਊਜ਼ਿਕ ਪ੍ਰੋਡਿਊਸਰ ਹਿਤੇਨ ਹਨ। ਉਨ੍ਹਾਂ ਨੇ ਇਸ ਵਿੱਚ ਦੇਸੀ ਲੋਕ ਸੰਗੀਤ ਅਤੇ ਬਾਦਸ਼ਾਹ ਦੇ ਹਿੱਟ ਹਿਪ-ਹੌਪ ਸਟਾਈਲ ਦਾ ਮੇਲ ਕੀਤਾ ਹੈ। ਗੀਤ ਵਿੱਚ ਰਵਾਇਤੀ ਮਰਾਠੀ ਸੰਗੀਤ ਦੀ ਝਲਕ ਦੇ ਨਾਲ ਆਧੁਨਿਕ ਸੰਗੀਤ ਦੀ ਵਰਤੋਂ ਕੀਤੀ ਗਈ ਹੈ, ਜਿਸ ਕਾਰਨ ਇਸ ਦਾ ਅੰਦਾਜ਼ ਕਾਫ਼ੀ ਵੱਖਰਾ ਨਜ਼ਰ ਆਉਂਦਾ ਹੈ।

ਇਸ ਗੀਤ ਦਾ ਮਿਊਜ਼ਿਕ ਵੀਡੀਓ ਮਹਾਰਾਸ਼ਟਰ ਦੇ ਕੋਲਹਾਪੁਰ ਦੀਆਂ ਖ਼ੂਬਸੂਰਤ ਗਲੀਆਂ ਅਤੇ ਉੱਥੋਂ ਦੀ ਸੰਸਕ੍ਰਿਤੀ ਨੂੰ ਧਿਆਨ ਵਿੱਚ ਰੱਖ ਕੇ ਫ਼ਿਲਮਾਇਆ ਗਿਆ ਹੈ। ਵੀਡੀਓ ਵਿੱਚ ਇੱਕ ਖ਼ਾਸ ਹਲਦੀ ਸਮਾਰੋਹ ਵਾਲਾ ਮਾਹੌਲ ਵੀ ਦੇਖਣ ਨੂੰ ਮਿਲਦਾ ਹੈ। ਬਾਦਸ਼ਾਹ ਦੇ ਨਾਲ ਮਸ਼ਹੂਰ ਮਰਾਠੀ ਅਦਾਕਾਰਾ ਨੇਹਾ ਖਾਨ ਵੀ ਥਿਰਕਦੀ ਹੋਈ ਨਜ਼ਰ ਆ ਰਹੀ ਹੈ।

ਗੀਤ ਬਾਰੇ ਬਾਦਸ਼ਾਹ ਨੇ ਕਿਹਾ ਕਿ ਭਾਰਤ ਦਾ ਖੇਤਰੀ ਸੰਗੀਤ ਇੱਕ ਖ਼ਜ਼ਾਨਾ ਹੈ ਅਤੇ ਉਹ ਦੇਸ਼ ਦੇ ਹਰ ਕੋਨੇ ਦੇ ਸੰਗੀਤ ਦਾ ਜਸ਼ਨ ਮਨਾਉਣਾ ਚਾਹੁੰਦੇ ਹਨ। ਉਨ੍ਹਾਂ ਕਿਹਾ, “ਭਾਰਤ ਦਾ ਖੇਤਰੀ ਸੰਗੀਤ ਕਿਸੇ ਖ਼ਜ਼ਾਨੇ ਤੋਂ ਘੱਟ ਨਹੀਂ ਹੈ ਅਤੇ ਮੈਂ ਇਸ ਦੇ ਹਰ ਕੋਨੇ ਨੂੰ ਸੈਲੀਬ੍ਰੇਟ ਕਰਨਾ ਚਾਹੁੰਦਾ ਹਾਂ। ‘ਚਿਮਨਾ’ ਮਹਾਰਾਸ਼ਟਰ ਦੀ ਸ਼ਾਨਦਾਰ ਸੰਸਕ੍ਰਿਤੀ ਲਈ ਮੇਰੀ ਵੱਲੋਂ ਇੱਕ ਪਿਆਰ ਭਰੀ ਚਿੱਠੀ ਹੈ। ਮੈਂ ਬਹੁਤ ਖੁਸ਼ ਹਾਂ ਕਿ ਇਹ ਪ੍ਰੋਜੈਕਟ ਇੰਨਾ ਵਧੀਆ ਬਣਿਆ ਹੈ ਅਤੇ ਇਹ ਗੀਤ ਮੇਰੇ ਉਨ੍ਹਾਂ ਸਾਰੇ ਮਰਾਠੀ ਪ੍ਰਸ਼ੰਸਕਾਂ ਲਈ ਹੈ, ਜੋ ਸ਼ੁਰੂ ਤੋਂ ਹੀ ਮੇਰੇ ਨਾਲ ਹਨ।”